AKP ភ្នំពេញ ថ្ងៃទី២៤ ខែមិថុនា ឆ្នាំ២០២៥ -- នាយករដ្ឋមន្ត្រីប៉ាគីស្ថាន លោក សេហ៍បាហ្ស សារីហ្វ (Shehbaz Sharif) កាលពីថ្ងៃអាទិត្យបានធ្វើការសន្ទនាតាមទូរស័ព្ទជាមួយប្រធានាធិបតីអ៊ីរ៉ង់ លោក ម៉ាសូដ ប៉េហ្សេស្គីអាន (Masoud Pezeshkian) ដើម្បីពិភាក្សាអំពីការវាយប្រហាររបស់សហរដ្ឋអាមេរិកលើរោងចក្រនុយក្លេអ៊ែរអ៊ីរ៉ង់ និងការឈ្លានពានដែលមិនបង្កហេតុ និងអយុត្តិធម៌របស់អ៊ីស្រាអែលក្នុងរយៈពេលប៉ុន្មានថ្ងៃកន្លងមកនេះ។

ខណៈពេលដែលបញ្ជាក់សារជាថ្មីអំពីសាមគ្គីភាពឥតងាករេរបស់ប្រទេសប៉ាគីស្ថានជាមួយប្រជាជន និងរដ្ឋាភិបាលអ៊ីរ៉ង់ លោក សារីហ្វ បានសម្តែងការរំលែកទុក្ខយ៉ាងស្មោះស្ម័គ្រចំពោះការបាត់បង់ជីវិតដ៏មានតម្លៃ និងបានបួងសួងឱ្យមានការជាសះស្បើយយ៉ាងឆាប់រហ័ស។

លោកបាននិយាយថា ការវាយប្រហាររបស់សហរដ្ឋអាមេរិកបានកំណត់គោលដៅលើទីតាំងដែលស្ថិតនៅក្រោមការការពាររបស់ទីភ្នាក់ងារថាមពលអាតូមិកអន្តរជាតិ (IAEA) ហើយការវាយប្រហារនេះបានបង្កើតជាការបំពានយ៉ាងធ្ងន់ធ្ងរលើច្បាប់អន្តរជាតិ និងលក្ខន្តិកៈរបស់ទីភ្នាក់ងារ IAEA ។

ដោយសង្កត់ធ្ងន់លើភាពចាំបាច់ក្នុងការវិលត្រលប់ទៅរកការសន្ទនា និងការទូតវិញភ្លាមៗជាផ្លូវដែលអាចសម្រេចបានតែមួយគត់ឆ្ពោះទៅមុខនោះ នាយករដ្ឋមន្ត្រីបានអំពាវនាវឱ្យមានកិច្ចខិតខំប្រឹងប្រែងរួមជាបន្ទាន់ដើម្បីបន្ធូរបន្ថយស្ថានការណ៍ ដោយបានរំលឹកឡើងវិញនូវការត្រៀមខ្លួនរបស់ប្រទេសប៉ាគីស្ថានក្នុងការដើរតួនាទីស្ថាបនាក្នុងបរិបទនេះ។

ក្នុងឱកាសនោះ ប្រធានាធិបតីអ៊ីរ៉ង់បានថ្លែងអំណរគុណយ៉ាងជ្រាលជ្រៅចំពោះការគាំទ្ររបស់ប្រទេសប៉ាគីស្ថានចំពោះប្រទេសអ៊ីរ៉ង់ និងបានថ្លែងអំណរគុណចំពោះរដ្ឋាភិបាល និងប្រជាជនប៉ាគីស្ថានដែលបានឈរក្នុងសាមគ្គីភាពជាមួយប្រជាជន និងរដ្ឋាភិបាលនៃប្រទេសអ៊ីរ៉ង់។

មេដឹកនាំទាំងពីរក៏បានសង្កត់ធ្ងន់លើតម្រូវការ និងភាពបន្ទាន់នៃការបង្រួបបង្រួមជាតិនៅដំណាក់កាលដ៏សំខាន់នេះ ហើយបានយល់ព្រមរក្សាទំនាក់ទំនងជិតស្និទ្ធ៕

ដោយ៖ មូល មិនា (ប្រភព៖ ស៊ីនហួ)