AKP ភ្នំពេញ ថ្ងៃទី២៤ ខែមិថុនា ឆ្នាំ២០២៥ -- រដ្ឋាភិបាលស្លូវេនីបានប្រកាសកាលពីថ្ងៃអាទិត្យថា ខ្លួនកំពុងពង្រីកការគ្រប់គ្រងបណ្តោះអាសន្ននៅលើព្រំដែនតំបន់ Schengen របស់ខ្លួនជាមួយប្រទេសក្រូអាត និងហុងគ្រីសម្រាប់រយៈពេលប្រាំមួយខែទៀត ដោយលើកឡើងពីការព្រួយបារម្ភផ្នែកសន្តិសុខដែលកើនឡើង រួមទាំងការគំរាមកំហែងនៃអំពើភេរវកម្ម។

រដ្ឋមន្ត្រីមហាផ្ទៃស្លូវេនី លោក បូសចេន ប៉ុកលូការ (Bostjan Poklukar) បាននិយាយថា ការផ្លាស់ប្តូរនេះត្រូវបានជំរុញដោយស្ថានភាពសន្តិសុខកាន់តែអាក្រក់នៅតំបន់មជ្ឈិមបូព៌ា ជម្លោះដែលកំពុងបន្តនៅអ៊ុយក្រែន «ស្ថានភាពស្មុគស្មាញ» នៅតំបន់បាល់កង់ភាគខាងលិច និងការគំរាមកំហែងភេរវកម្មកើនឡើងនៅទូទាំងបណ្តាប្រទេសសហភាពអឺរ៉ុបមួយចំនួន។

លោក​បាន​កត់​សម្គាល់​ថា លក្ខខណ្ឌ​សន្តិសុខ​ក្នុង​តំបន់​ទាំង​នេះ​បាន​ធ្លាក់​ចុះ​ចាប់​តាំង​ពី​ការ​ពន្យារ​ពេល​ចុង​ក្រោយ​នៃ​ការ​ត្រួត​ពិនិត្យ​ព្រំដែន។

ទោះបីជាមានការពន្យារពេលក៏ដោយ រដ្ឋាភិបាលបានធានាដល់សាធារណជនថា វិធានការបន្ថែមនឹងមិនរំខានដល់ការធ្វើដំណើរក្នុងរដូវវិស្សមកាលរដូវក្តៅខាងមុខនេះទេ ព្រោះមានតែការត្រួតពិនិត្យតាមគោលដៅប៉ុណ្ណោះដែលនឹងត្រូវបានអនុវត្តន៍។

នៅខែតុលា ឆ្នាំ២០២៣ ប្រទេសស្លូវេនីបានណែនាំការគ្រប់គ្រងព្រំដែនភ្លាមៗបន្ទាប់ពីប្រទេសអ៊ីតាលីបានដាក់ការត្រួតពិនិត្យស្រដៀងគ្នានៅលើព្រំដែនរបស់ខ្លួនជាមួយប្រទេសស្លូវេនី។ ប្រទេស​ទាំង​ពីរ​បាន​បន្ត​វិធានការ​នេះ​ជា​ច្រើន​ដង​មក​ហើយ។

យោងតាមអាជ្ញាធរស្លូវេនីបានឱ្យដឹងថា ការឆ្លងកាត់ព្រំដែនខុសច្បាប់ចំនួន ៥.៧៨១លើក ត្រូវបានកត់ត្រាក្នុងរយៈពេល ៤ខែដំបូងនៃឆ្នាំ២០២៥ ដែលតំណាងឱ្យការថយចុះជិត ៦០% បើធៀបនឹងរយៈពេលដូចគ្នាកាលពីឆ្នាំមុន។ ពាក្យស្នើសុំការពារអន្តរជាតិក៏បានធ្លាក់ចុះជិត ៥០% ក្នុងអំឡុងពេលដូចគ្នានេះ។

បន្ថែមពីលើព្រំដែនប្រទេសស្លូវេនី និងអ៊ីតាលី ប្រទេសក្នុងតំបន់ Schengen មួយចំនួនទៀត រួមមាន អូទ្រីស អាល្លឺម៉ង់ ដាណឺម៉ាក បារាំង ន័រវេស និងស៊ុយអែត កំពុងអនុវត្តការត្រួតពិនិត្យព្រំដែនផងដែរ៕

ដោយ៖ មូល មិនា (ប្រភព៖ ស៊ីនហួ)