AKP ភ្នំពេញ ថ្ងៃទី២៤ ខែមិថុនា ឆ្នាំ២០២៥ -- ប្រទេសចិនបានថ្កោលទោសចំពោះតួនាទីរបស់សហរដ្ឋអាមេរិកក្នុងការបង្កើនភាពតានតឹងនៅមជ្ឈិមបូព៌ា ហើយបានជំរុញឱ្យភាគីទាំងអស់ត្រឡប់ទៅរកកិច្ចសន្ទនា និងកិច្ចចរចាវិញ ខណៈដែលអ៊ីស្រាអែលបានកំណត់គោលដៅទីតាំងនុយក្លេអ៊ែរ ពន្ធនាគារ និងហេដ្ឋារចនាសម្ព័ន្ធថាមពលនៅក្នុងរលកនៃការវាយប្រហារថ្មីៗនេះទៅលើអ៊ីរ៉ង់កាលពីថ្ងៃចន្ទ។

អ្នកនាំពាក្យក្រសួងការបរទេសចិន លោក គូ ចៃគុន (Guo Jiakun) បាននិយាយនៅក្នុងសន្និសីទសារព័ត៌មានប្រចាំថ្ងៃមួយកាលពីថ្ងៃចន្ទថា ការវាយប្រហាររបស់សហរដ្ឋអាមេរិកទៅលើរោងចក្រនុយក្លេអ៊ែរអ៊ីរ៉ង់ចំនួនបីកាលពីថ្ងៃអាទិត្យ បានបំពានយ៉ាងធ្ងន់ធ្ងរទៅលើគោលបំណង និងគោលការណ៍នៃធម្មនុញ្ញអង្គការសហប្រជាជាតិ ហើយបានធ្វើឱ្យភាពតានតឹងកាន់តែកើនឡើងខ្លាំងនៅក្នុងតំបន់មជ្ឈិមបូព៌ា ដោយលោកបាននិយាយបន្ថែមថា ក្រុមប្រឹក្សាសន្តិសុខអង្គការសហប្រជាជាតិ «មិនអាចឈរនៅស្ងៀមបានទេ»។

កាលពីថ្ងៃអាទិត្យ ក្រុមប្រឹក្សាសន្តិសុខអង្គការសហប្រជាជាតិបានបើកកិច្ចប្រជុំបន្ទាន់មួយតាមសំណើរបស់អ៊ីរ៉ង់ ក្នុងអំឡុងពេលដែលប្រទេសចិន រុស្ស៊ី និងប៉ាគីស្ថានបានស្នើឡើងនូវសេចក្តីព្រាងដំណោះស្រាយដែលជំរុញឱ្យក្រុមប្រឹក្សាដែលមានសមាជិក ១៥ប្រទេសធ្វើការអំពាវនាវឱ្យមានបទឈប់បាញ់ជាបន្ទាន់ និងដោយគ្មានលក្ខខណ្ឌនៅមជ្ឈិមបូព៌ា។

លោក គូ បាននិយាយថា ដំណោះស្រាយនេះក៏ដើម្បីការពារជនស៊ីវិល ការប្រកាន់ខ្ជាប់នូវច្បាប់អន្តរជាតិ និងការបន្តកិច្ចសន្ទនា និងកិច្ចចរចាផងដែរ ដោយលោកបានកត់សម្គាល់ថា វាបានឆ្លុះបញ្ចាំងពីបំណងប្រាថ្នាដ៏ខ្លាំងក្លារបស់សហគមន៍អន្តរជាតិ និងការដើរតួនាទីជាការអំពាវនាវរកយុត្តិធម៌។

លោកបាននិយាយបន្ថែមថា «យើងសង្ឃឹមថា សមាជិកទាំងអស់អាចរួមគ្នាគាំទ្រសេចក្តីព្រាងសេចក្តីសម្រេចនេះ ហើយអាចឱ្យក្រុមប្រឹក្សាសន្តិសុខដើរតួនាទីត្រឹមត្រូវរបស់ខ្លួនសម្រាប់ការថែរក្សាសន្តិភាព និងសន្តិសុខអន្តរជាតិ»។

លោក ហ្វូ កុង (Fu Cong) តំណាងអចិន្ត្រៃយ៍របស់ប្រទេសចិនប្រចាំអង្គការសហប្រជាជាតិបាននិយាយនៅក្នុងកិច្ចប្រជុំនោះថា សន្តិភាពនៅមជ្ឈិមបូព៌ាមិនអាចសម្រេចបានដោយការប្រើកម្លាំងនោះទេ។

លោក ហ្វូ បាននិយាយថា «កិច្ចសន្ទនា និងកិច្ចចរចា គឺជាមធ្យោបាយមូលដ្ឋាន។ នាពេលបច្ចុប្បន្ន មធ្យោបាយការទូតដើម្បីដោះស្រាយបញ្ហានុយក្លេអ៊ែរអ៊ីរ៉ង់មិនទាន់អស់នៅឡើយ ហើយនៅតែមានសង្ឃឹមសម្រាប់ដំណោះស្រាយដោយសន្តិវិធីសម្រាប់បញ្ហានេះ»។

ដោយ៖ យា ចិន្ដាខន្ដី (ប្រភព៖ ឆាយណាដេលី)