AKP ភ្នំពេញ ថ្ងៃទី២៤ ខែមិថុនា ឆ្នាំ២០២៥ -- ប្រទេសចិន និងសិង្ហបុរី បានប្តេជ្ញាកាលពីថ្ងៃចន្ទដើម្បីបង្កើនទំនាក់ទំនងទ្វេភាគី ពង្រីកយ៉ាងសកម្មនូវកិច្ចសហប្រតិបត្តិការទីផ្សារទីបី រួមគ្នាការពារប្រព័ន្ធពាណិជ្ជកម្មពហុភាគី និងលើកកម្ពស់ខ្សែសង្វាក់ផ្គត់ផ្គង់ និងឧស្សាហកម្មសកលលោកដែលមានស្ថិរភាព និងគ្មានការរារាំង។

លោក លី ឈាង (Li Qiang) នាយករដ្ឋមន្ត្រីចិន និង​លោក ឡរេនស៍ វ៉ុង (Lawrence Wong) នាយក​រដ្ឋមន្ត្រី​សិង្ហបុរី​ដែល​កំពុង​បំពេញ​ទស្សនកិច្ច​នៅ​ប្រទេសចិន ​បាន​សន្យា​ក្នុង​អំឡុង​ពេល​កិច្ច​ពិភាក្សា​របស់​ពួកគេ​ក្នុង​ទីក្រុង​ប៉េកាំង។

លោក លី បាននិយាយថា ប្រទេសចិន និងសិង្ហបុរី គឺជាប្រទេសជិតខាងដែលមានមិត្តភាព និងជាដៃគូដ៏សំខាន់។ លោកបាននិយាយថា ក្នុងរយៈពេល ៣៥ឆ្នាំចាប់តាំងពីការបង្កើតទំនាក់ទំនងការទូតមកនោះ ទំនាក់ទំនងទ្វេភាគីបាននិងកំពុងប្រសើរឡើងជាបន្តបន្ទាប់ ហើយកិច្ចសហប្រតិបត្តិការជាក់ស្តែងទទួលបានលទ្ធផលជាផ្លែផ្កា។

លោក លី បានសម្តែងនូវឆន្ទៈរបស់ប្រទេសចិនក្នុងការរក្សាការផ្លាស់ប្តូរកម្រិតខ្ពស់យ៉ាងជិតស្និទ្ធជាមួយសិង្ហបុរី ពង្រឹងទំនាក់ទំនងជាយុទ្ធសាស្ត្រ ពង្រឹងការជឿទុកចិត្តគ្នាផ្នែកនយោបាយ និងផ្តល់លទ្ធផលជាផ្លែផ្កាបន្ថែមទៀតពីទំនាក់ទំនង និងកិច្ចសហប្រតិបត្តិការទ្វេភាគី។

លោកបានគូសបញ្ជាក់អំពីតម្រូវការសម្រាប់ប្រទេសទាំងពីរក្នុងការប្រើប្រាស់ឱ្យបានល្អនូវយន្តការកិច្ចសហប្រតិបត្តិការទ្វេភាគី អនុវត្តផែនការកិច្ចសហប្រតិបត្តិការក្រោមគំនិតផ្តួចផ្តើមខ្សែក្រវ៉ាត់ និងផ្លូវ ព្រមទាំងពង្រីក និងពង្រឹងគម្រោងសហប្រតិបត្តិការដ៏លេចធ្លោបន្ថែមទៀត។

លោកក៏បានអំពាវនាវឱ្យប្រទេសទាំងពីរពង្រីកទំហំពាណិជ្ជកម្ម និងការវិនិយោគទ្វេភាគី បង្កើតការគូសបញ្ជាក់បន្ថែមទៀតនៅក្នុងកិច្ចសហប្រតិបត្តិការរបស់ពួកគេក្នុងវិស័យសេដ្ឋកិច្ចឌីជីថល និងបញ្ញាសិប្បនិមិត្ត (AI) ពង្រីកកិច្ចសហការទីផ្សារទីបីយ៉ាងសកម្ម និងបង្កើនការផ្លាស់ប្តូររវាងប្រជាជន និងប្រជាជន៕

ដោយ៖ យា ចិន្ដាខន្ដី (ប្រភព៖ ឆាយណាដេលី)