AKP ភ្នំពេញ ថ្ងៃទី២៣ ខែមិថុនា ឆ្នាំ២០២៥ -- ប្រធានាធិបតីអ៊ីរ៉ង់ លោក ម៉ាសាអ៊ូដ ប៉េហ្សេសគីអាន់ (Masoud Pezeshkian) បាននិយាយក្នុងអំឡុងពេលសន្ទនាតាមទូរស័ព្ទជាមួយសមភាគីបារាំងលោក អេមម៉ានុយអ៊ែល ម៉ាក្រុន (Emmanuel Macron) ថា ប្រទេសអ៊ីរ៉ង់បានត្រៀមខ្លួនរួចជាស្រេចក្នុងការចូលរួមក្នុងកិច្ចសន្ទនាមួយដើម្បីបញ្ជាក់ពីលក្ខណៈសន្តិភាពនៃកម្មវិធីនុយក្លេអ៊ែររបស់ខ្លួន ប៉ុន្តែមិនមានបំណងបោះបង់ចោលវាទាំងស្រុងនោះទេ។

រដ្ឋបាលប្រធានាធិបតីអ៊ីរ៉ង់បានដកស្រង់សម្តីរបស់លោក ប៉េហ្សេសគីអាន់ ដែលបាននិយាយថា «យើងបានត្រៀមខ្លួនរួចជាស្រេចសម្រាប់កិច្ចសន្ទនា និងកិច្ចសហប្រតិបត្តិការដើម្បីកសាងទំនុកចិត្តក្នុងការប្រើប្រាស់ថាមពលនុយក្លេអ៊ែរដោយសន្តិវិធី។ យើងនឹងមិនយល់ព្រមចំពោះការទប់ស្កាត់ទាំងស្រុងនៃកម្មវិធីនុយក្លេអ៊ែរនោះទេ។ ការឆ្លើយតបរបស់យើងចំពោះការឈ្លានពានដែលកំពុងបន្តដោយរបប Zionist របស់អ៊ីស្រាអែល នឹងធ្វើការកម្ទេច​ឱ្យកាន់តែខ្លាំង»។ មេដឹកនាំអ៊ីរ៉ង់រូបនេះបានកត់សម្គាល់ថា ទីក្រុងតេអេរ៉ង់ស្វាគមន៍ចំពោះការសន្ទនា និងកិច្ចចរចា ប៉ុន្តែក្នុងករណីសិទ្ធិស្របច្បាប់របស់ប្រទេសត្រូវបានគោរពតែប៉ុណ្ណោះ។

ពេញមួយយប់រហូតឈានចូលដល់ថ្ងៃទី១៣ ខែមិថុនា អ៊ីស្រាអែលបានចាប់ផ្តើមប្រតិបត្តិការ Rising Lion សំដៅប្រឆាំងនឹងកម្មវិធីនុយក្លេអ៊ែររបស់អ៊ីរ៉ង់ ហើយមិនដល់ ២៤ម៉ោងក្រោយមក អ៊ីរ៉ង់បានបើកការវាយប្រហារសងសឹកវិញ។ នៅថ្ងៃបន្ទាប់ ទីក្រុងតេលអាវីវ និងទីក្រុងតេអេរ៉ង់ បានធ្វើការវាយប្រហារគ្នាទៅវិញទៅមកម្តងទៀត។ ភាគីទាំងពីរបានរាយការណ៍ពីជនរងគ្រោះដែលបណ្តាលមកពីការវាយប្រហារទាំងនោះ ហើយបានទទួលស្គាល់ការវាយលុកទៅលើគោលដៅជាច្រើននៅក្នុងទឹកដីរបស់ពួកគេបើទោះបីជាពួកគេបានអះអាងថា ការខូចខាតនៅមានកម្រិតក៏ដោយ៕

ដោយ៖ យា ចិន្ដាខន្ដី (ប្រភព៖ តាសស៍)