AKP ភ្នំពេញ ថ្ងៃទី២៣ ខែមិថុនា ឆ្នាំ២០២៥ -- ប្រធានាធិបតីសហរដ្ឋអាមេរិក លោក ដូណាល់ ត្រាំ (Donald Trump) បានរាយការណ៍នៅលើបណ្តាញសង្គម Truth Social ថា កងកម្លាំងទ័ពអាកាសអាម៉េរិកបានធ្វើការវាយប្រហារដោយជោគជ័យទៅលើទីតាំងនុយក្លេអ៊ែរអ៊ីរ៉ង់ចំនួនបី ហើយយន្តហោះទាំងអស់បានត្រឡប់ទៅកាន់មូលដ្ឋានទ័ពអាកាសវិញ។

មេដឹកនាំអាម៉េរិករូបនេះបានសរសេរថា «យើងបានបញ្ចប់ការវាយប្រហារដោយជោគជ័យរបស់យើងទៅលើទីតាំងនុយក្លេអ៊ែរចំនួនបីក្នុងប្រទេសអ៊ីរ៉ង់ ដែលរួមមានទីតាំងនុយក្លេអ៊ែរ Fordow, Natanz និងEsfahan ហើយយន្តហោះទាំងអស់ឥឡូវនេះស្ថិតនៅក្រៅដែនអាកាសរបស់អ៊ីរ៉ង់» ។ លោក​បាន​បន្ថែម​ថា​ «​យន្តហោះ​ទាំងអស់​កំពុង​ធ្វើដំណើរ​ទៅ​កាន់មូលដ្ឋានវិញ​ដោយ​សុវត្ថិភាព​»​។

យោងតាមសារព័ត៌មានរ៉យទ័រស៍ បានឱ្យដឹងថា ការវាយប្រហារនេះពាក់ព័ន្ធនឹងយន្តហោះទម្លាក់គ្រាប់បែកយុទ្ធសាស្ត្រ B-2 ដែលពីមុនត្រូវបានដាក់ពង្រាយទៅកាន់កោះ Guam ដែលជាទឹកដីក្រៅប្រទេសរបស់សហរដ្ឋអាមេរិកនៅប៉ាស៊ីហ្វិក។ យន្តហោះទាំងនេះមានសមត្ថភាពផ្ទុកគ្រាប់បែក GBU-57 bunker-buster ដែលត្រូវបានរចនាឡើងជាពិសេសដើម្បីជ្រាបចូលទៅក្នុងគោលដៅក្រោមដីដែលមានកម្លាំងខ្លាំង។

អ្នកជំនាញជឿថា គ្រាប់បែកប្រភេទនេះ អាចប្រើ​ក្នុងការវាយប្រហារលើរោងចក្រនុយក្លេអ៊ែរ Fordow របស់ប្រទេសអ៊ីរ៉ង់ ដែលកប់នៅជម្រៅប្រហែល ៩០ម៉ែត្រទៅក្រោមដី។

ដោយ៖ យា ចិន្ដាខន្ដី (ប្រភព៖ តាសស៍)