AKP ភ្នំពេញ ថ្ងៃទី២០ ខែមិថុនា ឆ្នាំ២០២៥ -- ជំនួយការប្រធានាធិបតីរុស្ស៊ីលោក យូរី យូស្សាកូវ (Yury Ushakov) បានប្រាប់អ្នកសារព័ត៌មានថាប្រធានាធិបតីរុស្ស៊ី លោក វ្ល៉ាឌីមៀ ពូទីន (Vladimir Putin) និងប្រធានាធិបតីចិន លោក ស៊ី ជីនពីង (Xi Jinping) បានកត់សម្គាល់ក្នុងអំឡុងពេលនៃការសន្ទនាតាមទូរស័ព្ទថា កិច្ចសហប្រតិបត្តិការសេដ្ឋកិច្ចរវាងប្រទេសទាំងពីរបន្តទទួលបានសន្ទុះរីកចម្រើន។

លោកបាននិយាយថា «ទោះបីជាមានកត្តាខាងក្រៅអវិជ្ជមានមួយចំនួនក៏ដោយ ក៏វាត្រូវបានកត់សម្គាល់ថាកិច្ចសហប្រតិបត្តិការក្នុងវិស័យពាណិជ្ជកម្ម និងសេដ្ឋកិច្ចកំពុងមានការកើនឡើង។ កាលពីឆ្នាំមុន ចំណូលពាណិជ្ជកម្មបានឈានដល់កម្រិតខ្ពស់បំផុត ដោយឈានដល់តម្លៃ ២៤៥ពាន់លានដុល្លារអាម៉េរិក»។

ដោយសំដៅទៅលើកិច្ចប្រជុំកំពូល G7 កាលពីពេលថ្មីៗនេះនៅក្នុងប្រទេសកាណាដា មេដឹកនាំរុស្ស៊ី និងចិនបានគូសបញ្ជាក់ពីចំណាប់អារម្មណ៍រួមគ្នារបស់ពួកគេក្នុងការពង្រឹងកិច្ចសហប្រតិបត្តិការបន្ថែមទៀតលើបញ្ហាសំខាន់ៗនៃរបៀបវារៈអន្តរជាតិ និងកិច្ចខិតខំប្រឹងប្រែងសម្របសម្រួលនៅក្នុងក្រុមប្រទេសប្រ៊ីកស៍ (BRICS) អង្គការ SCO អង្គការសហប្រជាជាតិ (UN)និងវេទិកាអន្តរជាតិផ្សេងៗទៀត។

មុនពេលកិច្ចប្រជុំកំពូលប្រ៊ីកស៍ នៅទីក្រុង Rio de Janeiro របស់ប្រទេសប្រេស៊ីលដែលគ្រោងធ្វើនៅដើមខែកក្កដាខាងមុខនេះ ប្រមុខរដ្ឋទាំងពីរបានពិភាក្សាគ្នាអំពីការជំរុញគំនិតផ្តួចផ្តើមរបស់រុស្ស៊ីដែលបានស្នើឡើងនៅក្នុងកិច្ចប្រជុំកំពូលប្រ៊ីកស៍កាលពីឆ្នាំមុននៅទីក្រុងកាហ្សាន់របស់ប្រទេសរុស្ស៊ី។ គំនិតផ្តួចផ្តើមទាំងនេះរួមមាន ការបង្កើតវេទិកាវិនិយោគថ្មីមួយក្នុងគោលបំណងជំរុញកំណើនសេដ្ឋកិច្ចក្នុងចំណោមប្រទេសប្រ៊ីកស៍និងដៃគូរបស់ពួកគេនៅក្នុងសកលលោកភាគខាងត្បូង។ លោក យូស្សាកូវបាននិយាយថា «វាត្រូវបានគេកត់សម្គាល់ថា ក្រុមអ្នកជំនាញរុស្ស៊ី និងចិនកំពុងទំនាក់ទំនងគ្នាយ៉ាងជិតស្និទ្ធ និងបន្តការងារទៅលើបញ្ហានេះ»៕

ដោយ៖ យា ចិន្ដាខន្ដី (ប្រភព៖ តាសស៍)