AKP ភ្នំពេញ ថ្ងៃទី២០ ខែមិថុនា ឆ្នាំ២០២៥ -- ប្រទេសម៉ាឡេស៊ី និងអាល់ហ្សេរី បានចាប់ផ្តើមជាផ្លូវការនូវគម្រោងកិច្ចសហប្រតិបត្តិការឧស្សាហកម្មជាយុទ្ធសាស្ត្រដែលមានតម្លៃ ៨ពាន់លានដុល្លារអាម៉េរិក ដែលគាំទ្រដោយក្រុមហ៊ុន Lion Group របស់ម៉ាឡេស៊ី ដែលជាការបោះជំហានឆ្ពោះទៅមុខដ៏សំខាន់ក្នុងទំនាក់ទំនងទ្វេភាគី និងចាប់ផ្តើមដំណាក់កាលអភិវឌ្ឍន៍ថ្មីសម្រាប់វិស័យរុករករ៉ែរបស់ប្រទេសអាល់ហ្សេរី។

យោងតាមក្រសួងថាមពល រ៉ែ និងថាមពលកកើតឡើងវិញរបស់អាល់ហ្សេរី បានឱ្យដឹងថា អនុស្សរណៈនៃការយោគយល់ (MoU) សម្រាប់គម្រោងនេះ ត្រូវបានចុះហត្ថលេខានៅអាល់ហ្សេរីកាលពីថ្ងៃទី១៥ ខែមិថុនាឆ្នាំ២០២៥ រវាងក្រុមហ៊ុនជាតិអាល់ហ្សេរីសម្រាប់ការស្រាវជ្រាវ និងការធ្វើអាជីវកម្មរ៉ែ (Sonarem) និងក្រុមហ៊ុន Lion Group ។

ភាពជាដៃគូនេះមានគោលបំណងពង្រឹងកិច្ចសហប្រតិបត្តិការក្នុងការរុករក និងធ្វើអាជីវកម្មធនធានរ៉ែ រួមទាំងរ៉ែមាស ទង់ដែង និងម៉ង់ហ្គាណែស ក៏ដូចជាក្នុងការអភិវឌ្ឍឧស្សាហកម្មរ៉ែដែក អាលុយមីញ៉ូម និងថាមពលកកើតឡើងវិញ។

គម្រោង​នេះ​ត្រូវ​បាន​គេ​រំពឹង​ថា​នឹង​បង្កើត​ការងារ​ប្រហែល១០.០០០កន្លែង និង​រួម​បញ្ចូល​ទាំង​គម្រោង​សាងសង់​កំពង់ផែ​នាំ​ចេញ​ដ៏​សំខាន់​មួយ​ក្នុង​ទីក្រុង​ឆ្នេរសមុទ្រ Boumerdès។ ក្នុង​រយៈពេល​វែង ក្រុមហ៊ុន Lion Group ក៏​មាន​បំណង​ពង្រីក​ទៅ​ក្នុង​វិស័យ​ឧស្សាហកម្ម ទេសចរណ៍និង​ការ​អភិវឌ្ឍ​កសិកម្ម​នៅក្នុង​ប្រទេស​អាល់ហ្សេរីផងដែរ។

កិច្ចព្រមព្រៀងនេះត្រូវបានចុះហត្ថលេខាត្រឹមតែមួយថ្ងៃប៉ុណ្ណោះមុនពេលសភារបស់ប្រទេសអាល់ហ្សេរីបានអនុម័តច្បាប់រុករករ៉ែថ្មី ដែលសម្រួលដល់នីតិវិធីនៃការផ្តល់អាជ្ញាប័ណ្ណ និងពង្រីកក្របខ័ណ្ឌច្បាប់សម្រាប់ការវិនិយោគឯកជនពីបរទេស ដែលជាលក្ខខណ្ឌសំខាន់ដែលភាគីពាក់ព័ន្ធម៉ាឡេស៊ីបានរង់ចាំអស់រយៈពេលជាងមួយឆ្នាំមកហើយដើម្បីបន្តគម្រោងនេះ។

ការវិនិយោគដែលបានរៀបរាប់ខាងលើពីប្រទេសម៉ាឡេស៊ី គឺជាផ្នែកមួយនៃយុទ្ធសាស្ត្រអភិវឌ្ឍន៍រ៉ែដែលរដ្ឋាភិបាលអាល់ហ្សេរីកំពុងស្វែងរកក្នុងគោលបំណងបង្កើនតម្លៃសេដ្ឋកិច្ចជាតិសរុបដល់ទៅ ៤០០ពាន់លានដុល្លារអាម៉េរិកនៅត្រឹមឆ្នាំ២០២៧៕

ដោយ៖ យា ចិន្ដាខន្ដី (ប្រភព៖ VNA)