AKP ភ្នំពេញ ថ្ងៃទី១៩ ខែមិថុនា ឆ្នាំ២០២៥ -- រដ្ឋមន្ត្រីការបរទេសអាល់ហ្សេរី លោក អាហ៍មេដ អាតតាហ្វ (Ahmed Attaf) បានសន្ទនាតាមទូរស័ព្ទជាមួយសមភាគីអ៊ីរ៉ង់ លោក សេយេដ អាប់បាស់ អារ៉ាហ្គជី (Seyed Abbas Araghchi) ដើម្បីពិភាក្សាអំពីការវិវត្តចុងក្រោយបន្ទាប់ពីជម្លោះអ៊ីស្រាអែល-អ៊ីរ៉ង់។

យោងតាមសេចក្តីថ្លែងការណ៍របស់ក្រសួងការបរទេសអាល់ហ្សេរីលោក អារ៉ាហ្គជី បានរាយការណ៍សង្ខេបដល់លោក អាតតាហ្វ អំពីផលប៉ះពាល់នៃការវាយប្រហាររបស់អ៊ីស្រាអែល ដោយព្រមានថាពួកគេបន្តគំរាមកំហែងដល់សន្តិសុខ និងស្ថិរភាពក្នុងតំបន់។

ជាការឆ្លើយតប លោក អាតតាហ្វ បានអះអាងសារជាថ្មីនូវការថ្កោលទោសយ៉ាងម៉ឺងម៉ាត់របស់ប្រទេសអាល់ហ្សេរីចំពោះ «ការឈ្លានពានរបស់អ៊ីស្រាអែល» ហើយលោកបានសង្កត់ធ្ងន់លើតម្រូវការបន្ទាន់សម្រាប់ក្រុមប្រឹក្សាសន្តិសុខអង្គការសហប្រជាជាតិ ដើម្បីបំពេញការទទួលខុសត្រូវរបស់ខ្លួនក្នុងការគោរពច្បាប់អន្តរជាតិ និងធម្មនុញ្ញអង្គការសហប្រជាជាតិ។

លោកបានសង្កត់ធ្ងន់ថា ការវាយប្រហារជាច្រើនរបស់អ៊ីស្រាអែលបានធ្វើឱ្យតំបន់នេះធ្លាក់ចូលទៅក្នុងវដ្តនៃអំពើហិង្សា និងអស្ថិរភាព ដោយជំរុញឱ្យមានសកម្មភាពអន្តរជាតិជាបន្ទាន់ដើម្បីបញ្ឈប់ការកើនឡើងបន្ថែមទៀតនិងស្តារសន្តិភាពឡើងវិញ។

នៅក្នុងការកើនឡើងនៃភាពតានតឹងក្នុងតំបន់ អ៊ីស្រាអែលបានបើកការវាយប្រហារតាមអាកាសទ្រង់ទ្រាយធំកាលពីព្រឹកថ្ងៃសុក្រ ដោយបានសម្លាប់មេបញ្ជាការយោធា អ្នកវិទ្យាសាស្ត្រ និងជនស៊ីវិលរាប់សិបនាក់។ អ៊ីរ៉ង់​បាន​ឆ្លើយតប​នឹង​ការ​វាយ​ប្រហារ​សងសឹក​នៅ​ថ្ងៃ​នោះ ហើយ​ការ​បាញ់​តបត​បាន​បន្ត​រហូត​ដល់​ថ្ងៃ​ចន្ទ៕

ដោយ៖ មូល មិនា (ប្រភព៖ ស៊ីនហួ)