AKP ភ្នំពេញ ថ្ងៃទី១៩ ខែមិថុនា ឆ្នាំ២០២៥ -- ពិធីបុណ្យដំណាំទុរេនមួយត្រូវបានប្រារព្ធឡើងកាលពីថ្ងៃពុធនៅក្នុងខេត្តជុមផុន ភាគខាងត្បូងប្រទេសថៃក្នុងគោលបំណងដើម្បីបង្ហាញពីគុណភាពនៃដំណាំទុរេនថៃ និងផ្សព្វផ្សាយផលិតផលកសិកម្មដែលមានគុណភាពខ្ពស់បន្ថែមទៀតដើម្បីចូលទៅក្នុងទីផ្សារប្រទេសចិន។

ក្នុងព្រឹត្តិការណ៍នេះ រួមមានការប្រមូលផលដំណាំទុរេន ដំណាំមង្ឃុតនិងពិព័រណ៍ផលិតផលកសិកម្មផ្សេងទៀត អភិបាលខេត្តជុមផុន លោក ថេនចៃ ជូគីតទីវិប៊ូន (Thienchai Chukittiwiboon) បានកាត់ផ្លែទុរេនដោយកាំបិតនៅចម្ការទុរេនខេត្តជុមផុនដែលជាការចាប់ផ្ដើមរដូវប្រមូលផលដំណាំទុរេនខេត្តជុមផុនឆ្នាំ២០២៥។

លោក ស៊ូបាន រ៉ាក់ថុង (Suban Rakthong) ប្រធានកសិកម្មខេត្តជុមផុន បាននិយាយថា ជាតំបន់ដាំផ្លែទុរេនធំជាងគេនៅភាគខាងត្បូងប្រទេសថៃ ដោយលក្ខខណ្ឌធម្មជាតិក្នុងខេត្តជុមផុន គឺសមរម្យសម្រាប់ការរីកលូតលាស់នៃផ្លែឈើត្រូពិច។ កសិករក្នុងស្រុកមានបទពិសោធន៍ច្រើនក្នុងការដាំដំណាំទុរេន និងបានប្រើប្រាស់បច្ចេកវិទ្យាទំនើបដែលធ្វើឱ្យដំណាំទុរេននៃខេត្តជុមផុន ល្បីល្បាញដោយសាររសជាតិឆ្ងាញ់ និងគុណភាពខ្ពស់។

លោក​បាន​បន្ថែម​ថា​ នឹង​មាន​ការ​ផលិត​ដំណាំទុរេន​ជាង៣០០.០០០តោន​នៅ​ក្នុង​ខេត្ត​នេះ​ក្នុង​ឆ្នាំ២០២៥ ដោយ​រដូវ​នេះ​មាន​រយៈ​ពេល​ចាប់​ពី​ខែ​ឧសភា​ដល់​ខែ​ធ្នូ ដោយ​នាំ​មក​នូវ​ប្រាក់​ចំណូល​ជាង ៣០ប៊ីលាន​បាត(៩១៩,៨លាន​ដុល្លារអាម៉េរិក)។

លោក ថេនចៃ បាននិយាយថា នាយកដ្ឋានរដ្ឋាភិបាល និងកសិករដាំផ្លែឈើ បានធ្វើការរួមគ្នាដើម្បីធានាគុណភាពនៃដំណាំទុរេន ដោយប្រកាន់ខ្ជាប់នូវការណែនាំនៃវិញ្ញាបនប័ត្រការអនុវត្តកសិកម្ម និងកំណត់ស្តង់ដារដំណើរការដាំដុះ។

អគ្គកុងស៊ុលចិនប្រចាំខេត្តសុងខ្លា លោក វ៉ាង ហ្សីចៀន (Wang Zhijian) បាននិយាយថា ប្រទេសចិនមានឆន្ទៈក្នុងការពង្រឹងកិច្ចសហប្រតិបត្តិការពាណិជ្ជកម្មជាមួយប្រទេសថៃបន្ថែមទៀត និងពង្រីកការនាំចូលផលិតផលកសិកម្មថៃដែលមានគុណភាពខ្ពស់ ជាមួយនឹងការធ្វើឱ្យប្រសើរឡើងនូវការប្រើប្រាស់របស់ប្រទេសចិន៕

ដោយ៖ មូល មិនា (ប្រភព៖ ភីបផលដេលី)