AKP ភ្នំពេញ ថ្ងៃទី១៧ ខែមិថុនា ឆ្នាំ២០២៥ -- ប្រធានាធិបតីចិន លោក ស៊ី ជីនពីង (Xi Jinping) បានចាកចេញពីទីក្រុងប៉េកាំងកាលពីថ្ងៃចន្ទទៅកាន់ទីក្រុងអាស្តាណារបស់ប្រទេសកាហ្សាក់ស្ថាន ជាកន្លែងដែលលោកនឹងចូលរួមកិច្ចប្រជុំកំពូលចិន-អាស៊ីកណ្តាលលើកទី២។

ប្រធានាធិបតីកាហ្សាក់ស្ថានបាននិយាយថា លោក ស៊ី នឹងបើកកិច្ចប្រជុំទ្វេភាគី មុនពេលចូលរួមកិច្ចប្រជុំកំពូលនៅថ្ងៃអង្គារនេះ។

ប្រមុខរដ្ឋនៃប្រទេសកៀហ្ស៊ីស៊ីស្ថាន អ៊ូសបេគីស្ថាន តាជីគីស្ថាន និងតូមិននីស្ថាន ក៏នឹងចូលរួមនៅក្នុងកិច្ចប្រជុំកំពូលនេះផងដែរ។

ដំណើរ​ទស្សនកិច្ច​នេះ​ជា​ដំណើរ​ទស្សនកិច្ច​ទៅបរទេស​លើក​ទី​បី​របស់​លោក ស៊ី នៅក្នុង​ឆ្នាំ​នេះ បន្ទាប់​ពី​ទស្សនកិច្ច​នៅតំបន់​អាស៊ីអាគ្នេយ៍ និង​រុស្ស៊ី។

ប្រទេសចិនកំពុងប្រកួតប្រជែងជាមួយរុស្ស៊ី ដែលជាអតីតមហាអំណាចអាណានិគមនៅអាស៊ីកណ្តាលសម្រាប់ឥទ្ធិពលនៅក្នុងតំបន់ដ៏ធំ ដែលស្ទើរតែស្មើនឹងសហភាពអឺរ៉ុប ប៉ុន្តែមានប្រជាជនសរុបត្រឹមតែ ៨០លាននាក់ប៉ុណ្ណោះ។

អាស៊ីកណ្តាល គឺជាគោលដៅយុទ្ធសាស្ត្រដ៏សំខាន់សម្រាប់ប្រទេសចិននៅក្នុងគំនិតផ្តួចផ្តើមខ្សែក្រវ៉ាត់ និងផ្លូវរបស់ខ្លួន ដែលប្រើប្រាស់ការវិនិយោគហេដ្ឋារចនាសម្ព័ន្ធដ៏ធំជាគន្លឹះនយោបាយ និងការទូត។

តំបន់នេះក៏សម្បូរទៅដោយធនធានធម្មជាតិ ហើយការវិនិយោគរបស់ប្រទេសចិនអាចជួយសម្រួលដល់វិស័យពាណិជ្ជកម្មជាមួយអឺរ៉ុប។

សាធារណរដ្ឋទាំង៥ នៅ​អាស៊ី​កណ្តាល​ ​បាន​ព្យាយាម​កាត់​បន្ថយ​ការ​ពឹង​ផ្អែក​លើ​រុស្ស៊ី និង​បង្កើន​ភាព​ជា​ដៃគូ​ជាមួយ​បណ្តាប្រទេស​ផ្សេង​ទៀត៕

ដោយ៖ យា ចិន្ដាខន្ដី (ប្រភព៖ កូរ៉េថែមស៍)