AKP ភ្នំពេញ ថ្ងៃទី១៧ ខែមិថុនា ឆ្នាំ២០២៥ -- អ៊ីស្រាអែល​បាន​បើក​ការ​វាយ​ប្រហារ​ជា​បន្តបន្ទាប់​ទៅ​លើប្រទេសអ៊ីរ៉ង់​ភាគ​កណ្តាល​កាល​ពី​ថ្ងៃ​ចន្ទ ដោយ​នាយក​រដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ (Benjamin Netanyahu) បានអះអាងនូវ​ការគ្រប់​គ្រង​ដែន​អាកាស​ទាំងស្រុង​លើ​ទីក្រុង​តេអេរ៉ង់។

លោក ណេតាន់យ៉ាហ៊ូ បាននិយាយនៅក្នុងសេចក្តីថ្លែងការណ៍មួយនៅឯមូលដ្ឋានទ័ពអាកាសទែលណូហ្វ (Tel Nof) ក្នុងទីក្រុងរ៉េហូវ៉ូតនៅភាគកណ្តាលអ៊ីស្រាអែលថា «កងកម្លាំងអាកាសអ៊ីស្រាអែលមានការគ្រប់គ្រងទាំងស្រុងនៅលើផ្ទៃមេឃនៃទីក្រុងតេអេរ៉ង់»។

ទូរទស្សន៍ប៉ុស្តិ៍លេខ១២ របស់អ៊ីស្រាអែលបាននិយាយថា កងទ័ពកំពុងវាយលុកទៅលើគោលដៅរាប់សិបកន្លែងនៅភាគកណ្តាលរបស់ប្រទេសអ៊ីរ៉ង់ ប៉ុន្តែមិនបានផ្តល់ព័ត៌មានលម្អិតណាមួយឡើយ។

សេចក្តីថ្លែងការណ៍យោធាមួយបាននិយាយថា ឡានដឹកទំនិញជាច្រើនដែលត្រូវបានចោទប្រកាន់ថាបានដឹកសព្វាវុធ រួមទាំងគ្រាប់កាំជ្រួចមីស៊ីលបាញ់ពីដីទៅលើអាកាស ត្រូវបានគេកំណត់គោលដៅនៅពេលធ្វើដំណើរទៅកាន់ទីក្រុងតេអេរ៉ង់ពីភាគខាងលិចប្រទេសអ៊ីរ៉ង់ចាប់តាំងពីព្រឹកថ្ងៃចន្ទ។

កង​ទ័ព​បាន​និយាយ​ថា «​យើង​បាន​វាយ​ប្រហារទៅ​លើ​រថយន្ត​ដឹក​ទំនិញទាំងនោះ ដោយកម្ទេចសព្វាអាវុធ និង​គ្រាប់​ផ្លោង​ទាំងនោះ»។

ភាពតានតឹងក្នុងតំបន់បានកើនឡើងចាប់តាំងពីថ្ងៃសុក្រសប្តាហ៍មុននៅពេលដែលអ៊ីស្រាអែលបានចាប់ផ្តើមការវាយប្រហារតាមអាកាសទៅលើទីតាំងជាច្រើននៅទូទាំងប្រទេសអ៊ីរ៉ង់ រួមទាំងកន្លែងយោធា និងនុយក្លេអ៊ែរ ដែលជំរុញឱ្យទីក្រុងតេអេរ៉ង់ចាប់ផ្តើមការវាយប្រហារសងសឹកវិញ។

អាជ្ញាធរអ៊ីស្រាអែលបាននិយាយថា មនុស្សយ៉ាងហោចណាស់ ២៤នាក់បានស្លាប់ និងរាប់រយនាក់ទៀតបានរងរបួសនៅក្នុងការវាយប្រហារដោយគ្រាប់កាំជ្រួចមីស៊ីលរបស់អ៊ីរ៉ង់ចាប់តាំងពីថ្ងៃសុក្រសប្តាហ៍មុនមក។

ចំណែកអ៊ីរ៉ង់វិញ បាននិយាយថា យ៉ាងហោចណាស់មនុស្ស ២២៤នាក់ត្រូវបានសម្លាប់ និងជាង ១.០០០នាក់ផ្សេងទៀតបានរងរបួសនៅក្នុងការវាយប្រហារបស់អ៊ីស្រាអែល៕

ដោយ៖ យា ចិន្ដាខន្ដី (ប្រភព៖ AA-AKP)