AKP ភ្នំពេញ ថ្ងៃទី១២ ខែមិថុនា ឆ្នាំ២០២៥ -- ប្រធានាធិបតីកូរ៉េខាងត្បូងលោក លី ចេយ៉ុង (Lee Jae-myung) បាននិយាយថា កិច្ចព្រមព្រៀងនាំចេញរោងចក្រនុយក្លេអ៊ែរថ្មីរបស់ប្រទេសកូរ៉េខាងត្បូងជាមួយសាធារណរដ្ឋឆេកបានដាក់មូលដ្ឋានសម្រាប់ការពង្រីកកិច្ចសហប្រតិបត្តិការសេដ្ឋកិច្ចទ្វេភាគី ក្នុងអំឡុងពេលការសន្ទនាតាមទូរស័ព្ទជាមួយនាយករដ្ឋមន្ត្រីឆែក លោក ផេទឺ ហ្វីអាឡា (Petr Fiala) កាលពីថ្ងៃពុធ។

យោងតាមអ្នកនាំពាក្យប្រធានាធិបតី លោក កាង យូជុង (Kang Yu-jung) បានឱ្យដឹងថា នៅក្នុងការសន្ទនាផ្លូវការលើកដំបូងរបស់ពួកគេ លោកលី និងលោក ហ្វីអាឡា បានស្វាគមន៍ចំពោះការចុះហត្ថលេខាលើកិច្ចសន្យាចុងក្រោយសម្រាប់គម្រោងសាងសង់រោងចក្រថាមពលនុយក្លេអ៊ែរ ហើយបានសម្តែងក្តីសង្ឃឹមថា គម្រោងនេះនឹងដើរតួជាមូលដ្ឋានគ្រឹះសម្រាប់ទំនាក់ទំនងសេដ្ឋកិច្ចកាន់តែស៊ីជម្រៅ។

លោក កាង បានប្រាប់អ្នកយកព័ត៌មានថា «មេដឹកនាំបានប្តេជ្ញាធ្វើការយ៉ាងជិតស្និទ្ធដើម្បីពង្រីកកិច្ចសហប្រតិបត្តិការនេះលើសពីថាមពលនុយក្លេអ៊ែរ ដើម្បីរួមបញ្ចូលឧស្សាហកម្មបច្ចេកវិទ្យាខ្ពស់ ហេដ្ឋារចនាសម្ព័ន្ធនិងថាមពល គោលបំណងសម្រាប់កិច្ចសហប្រតិបត្តិការដ៏ទូលំទូលាយលើគ្រប់វិស័យ»។

កាលពីថ្ងៃទី៤ ខែមិថុនា ក្រុមហ៊ុនរដ្ឋ Korea Hydro & Nuclear Power Co. បានចុះហត្ថលេខាលើកិច្ចសន្យាចុងក្រោយដើម្បីសាងសង់រោងចក្រថាមពលនុយក្លេអ៊ែរចំនួនពីរនៅក្នុងរោងចក្រ Dukovany របស់សាធារណរដ្ឋឆេក បន្ទាប់ពីការលុបចោលដីការបស់តុលាការដែលបានរារាំងដល់កិច្ចព្រមព្រៀងនេះ។

កិច្ចព្រមព្រៀងដែលប៉ាន់ប្រមាណថាមានចំនួន ២៦ទ្រីលានវ៉ុន(១៨,៦ប៊ីលានដុល្លារអាម៉េរិក) គឺជាកិច្ចសន្យារោងចក្រថាមពលនុយក្លេអ៊ែរនៅក្រៅប្រទេសលើកដំបូងរបស់ប្រទេស  កូរ៉េខាងត្បូងចាប់តាំងពីឆ្នាំ២០០៩នៅពេលដែលប្រទេសនេះបានធានាកិច្ចព្រមព្រៀងសាងសង់រោងចក្រថាមពលនុយក្លេអ៊ែរ Barakah នៅក្នុងប្រទេសអេមីរ៉េតអារ៉ាប់រួម។

ការិយាល័យរបស់លោក លី បាននិយាយថា ក្នុងអំឡុងពេលនៃការសន្ទនាទូរសព្ទរយៈពេល ២០នាទី លោក លី បានស្នើសុំការគាំទ្រពីរដ្ឋាភិបាលឆេកសម្រាប់ក្រុមហ៊ុនកូរ៉េប្រមាណ ១០០ក្រុមហ៊ុនដែលប្រតិបត្តិការនៅក្នុងសហភាពអឺរ៉ុប ហើយបានអញ្ជើញលោក ហ្វីអាឡា មកបំពេញទស្សនកិច្ចនៅប្រទេសកូរ៉េខាងត្បូង ខណៈដែលនាយករដ្ឋមន្ត្រីបានឆ្លើយតបដោយការថ្លែងអំណរគុណ៕

ឆ្នាំនេះ គឺជាខួបលើកទី៣៥ នៃទំនាក់ទំនងការទូតរវាងប្រទេសកូរ៉េខាងត្បូង និងសាធារណរដ្ឋឆេក និងខួបលើកទី១០ នៃការបង្កើតភាពជាដៃគូយុទ្ធសាស្ត្ររបស់ពួកគេ៕

ដោយ៖ មូល មិនា (ប្រភព៖ យ៉ុនហាប់)