AKP ភ្នំពេញ ថ្ងៃទី១២ ខែមិថុនា ឆ្នាំ២០២៥ -- មន្ត្រីយោធាជាន់ខ្ពស់កូរ៉េខាងត្បូង និងបារាំងបានសម្តែងការព្រួយបារម្ភកាលពីថ្ងៃពុធ ជុំវិញការគំរាមកំហែងរបស់ប្រទេសកូរ៉េខាងជើងក្នុងការប្រឈមមុខនឹងការពង្រឹងទំនាក់ទំនងយោធាកាន់តែស៊ីជម្រៅជាមួយប្រទេសរុស្ស៊ី។

យោងតាមអគ្គសេនាធិការចម្រុះកូរ៉េខាងត្បូង (JCS) បានឱ្យដឹងថា លោក វ៉ុន យ៉ុងមីន (Kwon Young-min) ប្រធាននាយកដ្ឋានរៀបចំផែនការយុទ្ធសាស្រ្តនៅ JCS និងសមភាគីបារាំងលោក ប៉ាទ្រីក វ៉ាហ្គលីអូ (Patrick Vaglio) បានពិភាក្សាអំពីបញ្ហាសន្តិសុខជាច្រើនក្នុងអំឡុងពេលកិច្ចពិភាក្សាផ្លាស់ប្តូរយោធាទ្វេភាគីជាទៀងទាត់ដែលធ្វើឡើងនៅទីក្រុងសេអ៊ូល។

នៅក្នុងជំនួបនោះ លោក វ៉ុន និងលោក វ៉ាហ្គលីអូ បានសម្តែងការព្រួយបារម្ភចំពោះការធ្វើទំនើបកម្មនៃយោធាកូរ៉េខាងជើង ហើយបានបញ្ជាក់ជាថ្មីអំពីតម្រូវការក្នុងការធ្វើសកម្មភាពរួមគ្នាជាមួយសហគមន៍អន្តរជាតិប្រឆាំងនឹងការគំរាមកំហែងយោធារបស់ប្រទេសកូរ៉េខាងជើង។

លោក វ៉ាហ្គលីអូ ត្រូវបានដកស្រង់សម្តីដោយនិយាយថា កិច្ចប្រជុំនេះបានធ្វើជាឱកាសមួយដើម្បីផ្លាស់ប្តូរវិធានការលម្អិតដើម្បីអនុវត្តន៍កិច្ចសហប្រតិបត្តិការសន្តិសុខរវាងប្រជាជាតិនានានៅសហភាពអឺរ៉ុប និងក្នុងឥណ្ឌូប៉ាស៊ីហ្វិក។ នេះបើយោងតាម ​​JCS ។

កិច្ច​ប្រជុំ​បន្ទាប់​នឹង​ធ្វើ​ឡើង​នៅ​ទីក្រុង​ប៉ារីស​ឆ្នាំ​ក្រោយ។ កិច្ចប្រជុំកាលពីថ្ងៃពុធបានកត់សម្គាល់ជាជុំទី១៩ នៃកិច្ចចរចាយោធាទ្វេភាគីដែលបានចាប់ផ្តើមជាលើកដំបូងក្នុងឆ្នាំ២០០២៕

ដោយ៖ មូល មិនា (ប្រភព៖ យ៉ុនហាប់)