AKP ភ្នំពេញ ថ្ងៃទី១២ ខែមិថុនា ឆ្នាំ២០២៥ -- ប្រធានាធិបតីតួកគី លោក រេសិប តាយយីប អឺដូហ្គេន (Recep Tayyip Erdogan) បាននិយាយកាលពីថ្ងៃពុធថា ប្រទេសរបស់លោកបានចុះហត្ថលេខាលើកិច្ចព្រមព្រៀងការពារជាតិជាមួយប្រទេសឥណ្ឌូនេស៊ី ដើម្បីនាំចេញយន្តហោះចម្បាំងម៉ាកកេន(KAAN) ដែលផលិតក្នុងស្រុកចំនួន ៤៨គ្រឿង។

លោក អឺដូហ្គេន បាននិយាយនៅលើវេទិកាប្រព័ន្ធផ្សព្វផ្សាយសង្គមអ៊ិច ជាកន្លែងដែលលោកបានចែករំលែកវីដេអូអំពីយន្តហោះនេះថា «ខ្ញុំសង្ឃឹមថាកិច្ចព្រមព្រៀងដែលបង្ហាញពីការអភិវឌ្ឍ និងចំណុចដែលសម្រេចបានដោយឧស្សាហកម្មការពារជាតិក្នុងស្រុក និងជាតិរបស់យើងនឹងមានប្រយោជន៍សម្រាប់ប្រទេសតួកគី និងឥណ្ឌូនេស៊ី»។

លោក​បាន​បន្ត​ថា សមត្ថភាព​ក្នុង​ស្រុក​របស់​ប្រទេស​ឥណ្ឌូនេស៊ី​ក៏​នឹង​ត្រូវ​បាន​ប្រើប្រាស់​ក្នុង​ការ​ផលិតយន្ដហោះ KAAN ផង​ដែរ។

លោក អឺដូហ្គេន បានសរសើរកិច្ចព្រមព្រៀងនេះថាជានិមិត្តរូបនៃទំនាក់ទំនងកាន់តែស៊ីជម្រៅរវាងប្រទេសតួកគី និងឥណ្ឌូនេស៊ី ដោយសំដៅទៅលើប្រទេសឥណ្ឌូនេស៊ីថាជា «មិត្ត និងបងប្អូន»។

ឧស្សាហកម្មអាកាសចរណ៍តួកគីដែលជាក្រុមហ៊ុនការពារជាតិ និងអាកាសចរណ៍ធំមួយនៅប្រទេសតួកគីបានបង្កើត រចនា និងផលិតយន្ដហោះKAAN ដែលជាយន្តហោះចម្បាំងជាតិដំបូងគេរបស់ប្រទេសនេះ៕

ដោយ៖ មូល មិនា (ប្រភព៖ ស៊ីនហួ)