AKP ភ្នំពេញ ថ្ងៃទី១១ ខែមិថុនា ឆ្នាំ២០២៥ -- ក្រសួងកសិកម្មរបស់ប្រទេសកូរ៉េខាងត្បូងបាននិយាយកាលពីថ្ងៃអង្គារថា ប្រទេសកូរ៉េខាងត្បូងនឹងបន្តការនាំចូលសាច់បក្សី និងផលិតផលពាក់ព័ន្ធពីតំបន់នានាក្នុងប្រទេសប្រេស៊ីលដែលមិនរងផលប៉ះពាល់ដោយការផ្ទុះឡើងនៃជំងឺផ្តាសាយបក្សី(HPAI) កាលពីពេលថ្មីៗនេះ ចំពេលមានការព្រួយបារម្ភអំពីកង្វះខាតការផ្គត់ផ្គង់។

សេចក្តីសម្រេចនេះត្រូវបានធ្វើឡើងចំពេលដែលមានការព្រួយបារម្ភកាន់តែខ្លាំងឡើងអំពីកង្វះខាតក្នុងការផ្គត់ផ្គង់ផលិតផលសាច់បក្សីក្នុងស្រុកដែលអាចកើតមានបន្ទាប់ពីការផ្អាកការនាំចូលពីប្រទេសអាម៉េរិកខាងត្បូងដែលមានចំនួនជាង ៨០% នៃការនាំចូលសាច់បក្សីរបស់កូរ៉េខាងត្បូង។

ក្រសួងបាននិយាយថា ខ្លួនបានយល់ព្រមទៅលើលក្ខខណ្ឌនៃការនាំចូលសត្វបក្សីជាមួយអាជ្ញាធរប្រេស៊ីល។

ទីក្រុងសេអ៊ូលបានដាក់បម្រាមទៅលើការនាំចូលសត្វបក្សីពីប្រទេសប្រេស៊ីលកាលពីពាក់កណ្តាលខែឧសភា បន្ទាប់ពីមានការជូនដំណឹងជាផ្លូវការរបស់ប្រទេសនេះទៅកាន់អង្គការពិភពលោកសម្រាប់សុខភាពសត្វអំពីការផ្ទុះឡើងនៃមេរោគ HPAI នៅកសិដ្ឋានចិញ្ចឹមសត្វនៅរដ្ឋរីយ៉ូហ្រ្គង់ដូស៊ុលនៅភាគខាងត្បូង។

ប្រទេសប្រេស៊ីល គឺជាប្រទេសនាំចេញសាច់បក្សីធំបំផុតរបស់ពិភពលោក។

កាលពីឆ្នាំមុន ប្រទេសកូរ៉េខាងត្បូងបាននាំចូលសាច់បក្សីពីប្រទេសប្រេស៊ីលចំនួន ១៥៨.០០០តោន ដែលស្មើនឹង ៨៦% នៃការនាំចូលសរុបចំនួន១៨៣.៦០០តោន៕
ដោយ៖ យា ចិន្ដាខន្ដី (ប្រភព៖ កូរ៉េថែមស៍)