AKP ភ្នំពេញ ថ្ងៃទី១០ ខែមិថុនា ឆ្នាំ២០២៥ -- នាយករដ្ឋមន្រ្តីថៃ លោកស្រី ផែថុងថាន ស៊ីណាវ៉ាត្រា (Paetongtarn Shinawatra) បានទៅទស្សនកិច្ចទីក្រុងបានប៉ាកឆាតណុងបួ នៅក្នុងខេត្តកាន់ចាណាបុរី កាលពីថ្ងៃទី០៩ ខែមិថុនា ឆ្នាំ២០២៥ ដើម្បីពិនិត្យមើលវឌ្ឍនភាពនៃគម្រោងទឹកក្រោមដីខ្នាតធំមួយ។ ដោយមានទីតាំងនៅក្នុងស្រុកឡៅខ្វាន់ គំនិតផ្តួចផ្តើមនេះត្រូវបានរៀបចំឡើងដើម្បីបន្ធូរបន្ថយគ្រោះរាំងស្ងួត និងកែលម្អលទ្ធភាពប្រើប្រាស់ទឹកសម្រាប់ប្រើប្រាស់ក្នុងគ្រួសារ និងកសិកម្ម។ លោកស្រីត្រូវបានចូលរួមអមដំណើរដោយមន្ត្រីជាន់ខ្ពស់នៃក្រសួងធនធានធម្មជាតិ និងបរិស្ថាន និងក្រសួងដឹកជញ្ជូនថៃ។

នៅក្នុង​ដំណើរ​ទស្សនកិច្ច​នេះ លោកស្រី​នាយក​រដ្ឋមន្ត្រី​បាន​ទៅទស្សនា​ការ​តាំង​ពិព័រណ៍​ស្តីពី​ការ​គ្រប់​គ្រង​ទឹក​ក្នុង​តំបន់ និង​ទស្សនា​ប្រព័ន្ធ​ទឹក​ក្រោម​ដី និង​ប្រព័ន្ធ​ចែកចាយ​ទឹក​រ៉ែ។ គម្រោងនេះបានជួយដល់ប្រជាជនប្រមាណជិត ១០០.០០០គ្រួសាររួចហើយ និងរួមបញ្ចូលនូវកញ្ចប់ហេដ្ឋារចនាសម្ព័ន្ធដែលបានស្នើឡើងចំនួន១២ ដែលរួមមានទាំងគម្រោងរងជាង ៣.០០០គម្រោងផងដែរ។ ជាមួយនឹងថវិការួមបញ្ចូលគ្នាចំនួន ១៤,៨៥៩ពាន់លានបាត សំណើនេះត្រូវបានគេរំពឹងថានឹងផ្តល់ទិន្នផលទឹកបានជាង ២១១លានម៉ែត្រគូបជារៀងរាល់ឆ្នាំ។

គម្រោង​នេះ​ត្រូវ​បាន​គេ​រំពឹង​ថា​នឹង​ផ្តល់​អត្ថប្រយោជន៍​ដល់​ប្រជាជន​ជាង ៥៦០.០០០គ្រួសារ និង​អាច​បង្កើត​ការងារ​បាន​ជាង ២៩.០០០កន្លែង​។ គម្រោងនេះក្លាយជាផ្នែកមួយនៃយុទ្ធសាស្ត្រទូលំទូលាយរបស់រដ្ឋាភិបាលថៃក្នុងការពង្រឹងហេដ្ឋារចនាសម្ព័ន្ធសំខាន់ៗ ពង្រឹងសន្តិសុខទឹក និងលើកកម្ពស់ភាពធន់នឹងសេដ្ឋកិច្ចនៅក្នុងតំបន់ដែលរងផលប៉ះពាល់ដោយគ្រោះរាំងស្ងួតរបស់ប្រទេសថៃ។

លោកស្រីនាយករដ្ឋមន្ត្រីក៏បានជួបសំណេះសំណាលជាមួយប្រជាពលរដ្ឋ និងបានចែកធុងទឹកគំរូដល់ពួកគាត់ផងដែរ។ លោកស្រីបានបញ្ជាក់អំពីការត្រៀមខ្លួនរបស់រដ្ឋាភិបាលក្នុងការពង្រីកគម្រោងស្រដៀងគ្នានេះទៅកាន់តំបន់ជិតៗ និងខេត្តផ្សេងទៀត ដើម្បីលើកកម្ពស់គុណភាពជីវិត។ ដំណើរ​ទស្សនកិច្ច​របស់​លោកស្រីនាយករដ្ឋមន្រ្តី​បាន​បន្ត​ទៅកាន់​ស្រុកហួយក្រាចៅ ជា​កន្លែង​ដែល​លោកស្រី​បាន​ពិនិត្យមើល​ដំណាក់កាល​ទី២ នៃ​គម្រោង​ការ​ពង្រឹង​ហេដ្ឋារចនាសម្ព័ន្ធ​ទឹកដែល​ជា​ផ្នែក​ស្នូល​នៃ​របៀបវារៈ​នៃ​ការ​អភិវឌ្ឍ​ជាតិថៃ៕

ដោយ៖ យា ចិន្ដាខន្ដី (ប្រភព៖ NNT)