AKP ភ្នំពេញ ថ្ងៃទី០៩ ខែមិថុនា ឆ្នាំ២០២៥ -- ក្រសួងការបរទេសអេហ្ស៊ីបបាននិយាយថា រដ្ឋមន្ត្រីការបរទេសអេហ្ស៊ីប លោក បាដឺ អាប់ដេលឡាតទី (Badr Abdelatty) បានបញ្ជាក់ជាថ្មីនូវកិច្ចខិតខំប្រឹងប្រែងដែលកំពុងបន្តរបស់ទីក្រុងគែរ ក្នុងការស្វែងរកបទឈប់បាញ់នៅក្នុងតំបន់ហ្គាហ្សាក្នុងអំឡុងពេលការសន្ទនាតាមទូរស័ព្ទកាលពីថ្ងៃអាទិត្យជាមួយសមភាគីតួកគីលោក ហាកាន់ ហ្វីដាន (Hakan Fidan) ។

រដ្ឋមន្ត្រីទាំងពីរបានពិភាក្សាអំពី «ការឈ្លានពានរបស់អ៊ីស្រាអែលយ៉ាងព្រៃផ្សៃ» នៅក្នុងតំបន់ហ្គាហ្សា និងវិបត្តិមនុស្សធម៌ដែលកាន់តែអាក្រក់នៅក្នុងតំបន់។

យោងតាមក្រសួងការបរទេសអេហ្ស៊ីប បានឱ្យដឹងថា លោក អាប់ដេលឡាតទី បានលើកឡើងពីតួនាទីរបស់ប្រទេសអេហ្ស៊ីបក្នុងការជំរុញឱ្យមានបទឈប់បាញ់ ការដោះលែងចំណាប់ខ្មាំង និងអ្នកជាប់ឃុំ និងការផ្តល់ជំនួយមនុស្សធម៌ វេជ្ជសាស្ត្រ និងទីជម្រកដល់តំបន់ហ្គាហ្សា។

ប្រទេសតួកគីមិនបានចេញសេចក្តីថ្លែងការណ៍ជាផ្លូវការទេ ប៉ុន្តែប្រព័ន្ធផ្សព្វផ្សាយតួកគីបានដកស្រង់ប្រភពការទូតដែលមិនបញ្ចេញឈ្មោះបាននិយាយថា លោក ហ្វីដាន ក៏បានពិភាក្សាជាមួយសមភាគីអេហ្ស៊ីប និងហ្សកដានីកាលពីថ្ងៃអាទិត្យ អំពីការអភិវឌ្ឍនៅក្នុងតំបន់ហ្គាហ្សា និងការខិតខំប្រឹងប្រែងដើម្បីបញ្ចប់ជម្លោះ៕

ដោយ៖ មូល មិនា (ប្រភព៖ ស៊ីនហួ)