AKP ភ្នំពេញ ថ្ងៃទី០៩ ខែមិថុនា ឆ្នាំ២០២៥ -- រដ្ឋមន្ត្រីក្រសួងសេដ្ឋកិច្ច និងឧស្សាហកម្មរបស់ប្រទេសប៊ុលហ្គារី លោក ភែតទ័រ ឌីឡូវ (Peter Dilov)បាននិយាយនៅទូរទស្សន៍ជាតិប៊ុលហ្គារីកាលពីថ្ងៃសៅរ៍សប្តាហ៍មុនថា ការចូលជាសមាជិករបស់ប្រទេសប៊ុលហ្គារីទៅកាន់តំបន់ចាយប្រាក់អឺរ៉ូនឹងជួយបង្កើនអំណាចទិញរបស់ប្រជាជន។ លោកបានរំលឹកថា ដំណើរការនៃការចូលជាសមាជិកនេះបានចាប់ផ្តើមឡើងវិញនៅក្នុងឆ្នាំ២០១៨ នៅពេលដែលប្រទេសប៊ុលហ្គារីបានចាត់វិធានការដំបូងឆ្ពោះទៅរកការចូលរួមក្នុងសហភាពធនាគារ និងយន្តការ ERM II ។ យោងតាមលោក ឌីឡូវ បានឱ្យដឹងថា ការចូលទៅកាន់តំបន់ចាយប្រាក់អឺរ៉ូជាធម្មតានឹងនាំទៅរកចំណាត់ថ្នាក់ឥណទានដែលមានភាពប្រសើរឡើង។

លោក ឌីឡូវ បានសង្កត់ធ្ងន់ថា សហគ្រាសធុនតូច និងមធ្យមនៅក្នុងប្រទេសប៊ុលហ្គារីត្រូវបានរៀបចំយ៉ាងពេញលេញ និងទទួលស្គាល់យ៉ាងច្បាស់អំពីអត្ថប្រយោជន៍នៃការទទួលយកប្រាក់អឺរ៉ូ។

លោក ឌីឡូវ បានកត់សម្គាល់ថា «គ្រប់វិស័យទាំងអស់នឹងទទួលបានអត្ថប្រយោជន៍ពីប្រាក់អឺរ៉ូ រួមទាំងវិស័យទេសចរណ៍ផងដែរ»។

លោក ឌីឡូវ បានគូសបញ្ជាក់ថា សេដ្ឋកិច្ចប៊ុលហ្គារីកំពុងដំណើរការល្អដោយផលិតផលក្នុងស្រុកសរុបរបស់ប្រទេសកើនឡើង ៣,១% ពីមួយឆ្នាំទៅមួយឆ្នាំ គិតត្រឹមខែមីនា ឆ្នាំ២០២៥។ ជាងនេះទៅទៀត ប្រទេសប៊ុលហ្គារីជាប់ចំណាត់ថ្នាក់ទី២ នៅក្នុងសហភាពអឺរ៉ុប ទាក់ទងនឹងសមាមាត្របំណុលទៅផលិតផលក្នុងស្រុកសរុប។

លោករដ្ឋមន្ត្រីបាននិយាយថា ប្រទេសប៊ុលហ្គារីក៏កំពុងធ្វើការយ៉ាងសកម្មឆ្ពោះទៅរកការចូលជាសមាជិកនៃអង្គការសម្រាប់កិច្ចសហប្រតិបត្តិការ និងអភិវឌ្ឍន៍សេដ្ឋកិច្ច (OECD) ផងដែរ។

លោក ឌីឡូវ បាននិយាយថា កិច្ចខិតខំប្រឹងប្រែងកំពុងដំណើរការផងដែរដើម្បីដកប្រទេសប៊ុលហ្គារីចេញពីបញ្ជីពណ៌ប្រផេះរបស់ក្រុមការងារកិច្ចការហិរញ្ញវត្ថុ (FATF) សម្រាប់ការលាងលុយកខ្វក់ ដែលជាឧបសគ្គចម្បងក្នុងការទាក់ទាញការវិនិយោគផ្ទាល់ពីបរទេស៕
ដោយ៖ យា ចិន្ដាខន្ដី (ប្រភព៖ BTA)