AKP ភ្នំពេញ ថ្ងៃទី០៥ ខែមិថុនា ឆ្នាំ២០២៥ -- ប្រធានាធិបតីចិន លោក ស៊ី ជីនពីង (Xi Jinping) បានជួបជាមួយប្រធានាធិបតីបេឡារុស្ស លោក អាឡិចសាន់ដឺរ លូកាស្សិនកូ (Alexander Lukashenko) នៅទីក្រុងប៉េកាំងកាលពីថ្ងៃពុធ ដោយលោកបានអបអរសាទរលោក លូកាស្សិនកូ ម្តងទៀតដែលជាប់ឆ្នោតជាប្រធានាធិបតីបេឡារុស្សឡើងវិញ។ លោក ស៊ី បាននិយាយថា ប្រទេសទាំងពីរ គឺជាមិត្តពិត និងជាដៃគូដ៏ល្អ ដោយបានប្រព្រឹត្តចំពោះគ្នាទៅវិញទៅមកដោយស្មោះត្រង់ និងមានទំនុកចិត្ត។

ដោយកត់សម្គាល់ដែលប្រទេសចិន និងបេឡារុស្សចែករំលែកនូវមិត្តភាពជាប្រពៃណី ការជឿទុកចិត្តគ្នាទៅវិញទៅមកផ្នែកនយោបាយដ៏រឹងមាំ និងកិច្ចសហប្រតិបត្តិការដែលកំពុងរីកចម្រើនលើគ្រប់វិស័យនោះ លោក ស៊ី បាននិយាយថា ប្រទេសចិនតែងតែអភិវឌ្ឍន៍ទំនាក់ទំនងចិន-បេឡារុស្ស តាមទស្សនៈយុទ្ធសាស្ត្រ និងយូរអង្វែង។

លោក ស៊ី បាននិយាយថា ប្រទេសចិនមានឆន្ទៈក្នុងការធ្វើការងារជាមួយប្រទេសបេឡារុស ដើម្បីជំរុញការអភិវឌ្ឍប្រកបដោយស្ថិរភាពនៃទំនាក់ទំនងទ្វេភាគី និងកិច្ចសហប្រតិបត្តិការឈ្នះ-ឈ្នះ។

លោកបានអំពាវនាវឱ្យភាគីទាំងពីរបង្កើនការសម្របសម្រួល និងកិច្ចសហប្រតិបត្តិការក្នុងក្របខ័ណ្ឌពហុភាគី ដូចជាអង្គការសហប្រជាជាតិ និងអង្គការសហប្រតិបត្តិការសៀងហៃ រួមគ្នាប្រឆាំងនឹងអនុត្តរភាព ការសម្លុតកំហែង និងការពារភាពត្រឹមត្រូវ និងយុត្តិធម៌អន្តរជាតិ។

លោក លូកាស្សិនកូ ដែល​កំពុង​បំពេញ​ទស្សនកិច្ច​ជា​លើក​ទី១៥ នៅ​ប្រទេស​ចិននោះ ​បាន​និយាយ​ថា លោក​បាន​ទទួល​អារម្មណ៍​ពី​មិត្តភាព​ពិត​ប្រាកដ​ពី​ប្រទេស​ចិន​ក្នុង​អំឡុង​ពេល​នៃ​ការ​ធ្វើ​ដំណើរ​ទស្សនកិច្ចម្តងៗ​របស់​លោក។

ដោយអរគុណប្រទេសចិនចំពោះការគាំទ្រ និងជំនួយដ៏រឹងមាំរយៈពេលវែងដល់ប្រទេសបេឡារុស្ស លោកបាននិយាយថា ប្រទេសបេឡារុស្សមានការជឿទុកចិត្តខ្ពស់ចំពោះប្រទេសចិន ហើយនឹងជំរុញកិច្ចសហប្រតិបត្តិការយ៉ាងសកម្មជាមួយប្រទេសចិន។

លោក លូកាស្សិនកូ បាននិយាយថា ប្រទេសចិនធ្វើជាគំរូមួយសម្រាប់ពិភពលោក ដោយប្រកាន់ខ្ជាប់នូវពហុភាគីនិយម និងប្រឆាំងនឹងឯកតោភាគីនិយម ព្រមទាំងការដាក់ទណ្ឌកម្ម និងសម្ពាធ ដោយបានបង្ហាញអំពីការកោតសរសើរចំពោះប្រទេសចិន និងឆន្ទៈក្នុងការធ្វើការងារជាមួយប្រទេសចិន ដើម្បីការពារយុត្តិធម៌ និងយុត្តិធម៌អន្តរជាតិ៕

ដោយ៖ យា ចិន្ដាខន្ដី (ប្រភព៖ ឆាយណាដេលី)