AKP ភ្នំពេញ ថ្ងៃទី០៤ ខែមិថុនា ឆ្នាំ២០២៥ -- អ្នកនាំពាក្យវិមានក្រឹមឡាំង លោក ឌីមីទ្រី ប៉េសកូវ (Dmitry Peskov) បាននិយាយកាលពីថ្ងៃអង្គារថា កិច្ចព្រមព្រៀងមួយចំនួនដែលសម្រេចបានរវាងរុស្ស៊ី និងអ៊ុយក្រែននៅក្នុងកិច្ចពិភាក្សាកាលពីថ្ងៃច័ន្ទក្នុងទីក្រុងអ៊ីស្តង់ប៊ុល គឺមានសារៈសំខាន់ណាស់ប៉ុន្តែការទម្លាយយ៉ាងឆាប់រហ័សឆ្ពោះទៅរកការបញ្ចប់ជម្លោះមិនគួរត្រូវបានរំពឹងទុកនៅឡើយនោះទេ។

ថ្លែងនៅក្នុងសន្និសីទសារព័ត៌មានមួយនៅទីក្រុងម៉ូស្គូ លោក ប៉េសកូវ បានសង្កត់ធ្ងន់ថា មិនគួររំពឹងទុកថានឹងមានដំណោះស្រាយ និងរបកគំហើញភ្លាមៗនោះទេ ដោយសារតែនៅតែមានភាពស្មុគស្មាញនៃបញ្ហានៅឡើយ ប៉ុន្តែការងារនៅតែបន្ត។

លោកបាននិយាយថា «ជាការពិតណាស់ វានឹងខុសពីការរំពឹងទុកនូវដំណោះស្រាយភ្លាមៗ ប៉ុន្តែការងារកំពុងដំណើរការ ហើយកិច្ចព្រមព្រៀងមួយចំនួនត្រូវបានសម្រេចនៅក្នុងទីក្រុងអ៊ីស្តង់ប៊ុល»។

លោក ប៉េសកូវ ក៏បាននិយាយផងដែរថា ប្រទេសរុស្ស៊ីបានប្រគល់ទៅឱ្យអ៊ុយក្រែននូវអនុស្សរណៈដែលមានចក្ខុវិស័យរបស់ទីក្រុងម៉ូស្គូស្តីពីការដោះស្រាយជាមួយនឹងបទប្បញ្ញត្តិជាច្រើន រួមទាំងជម្រើសជាច្រើនផងដែរ។

លោកបាននិយាយថា «សារជាថ្មីម្តងទៀត ខ្ញុំសូមសង្កត់ធ្ងន់ថា យើងបាននិយាយម្តងហើយម្តងទៀតថាបញ្ហានៃដំណោះស្រាយជម្លោះ គឺមានភាពស្មុគស្មាញខ្លាំងណាស់ ហើយរួមបញ្ចូលនូវព័ត៌មានលម្អិតដ៏ស្មុគស្មាញជាច្រើន។ អ្វីៗគ្រប់យ៉ាងត្រូវបានតម្រង់ទិសឆ្ពោះទៅរកការលុបបំបាត់បុព្វហេតុដំបូងនៃជម្លោះ និងការផ្លាស់ប្តូរទៅកាន់គន្លងនៃដំណោះស្រាយប្រកបដោយនិរន្តរភាព»៕

ដោយ៖ យា ចិន្តាខន្តី (ប្រភព៖ AA-AKP)