AKP ភ្នំពេញ ថ្ងៃទី០៣ ខែមិថុនា ឆ្នាំ២០២៥ -- ទិន្នន័យផ្លូវការបានបង្ហាញកាលពីថ្ងៃសៅរ៍សប្តាហ៍មុនថា សកម្មភាពផលិតកម្មរបស់ប្រទេសចិនបានបន្តបង្ហាញសញ្ញានៃភាពប្រសើរឡើងនៅក្នុងខែឧសភា ខណៈដែលផលិតកម្មបានកើនឡើង និងការរំពឹងទុករបស់ទីផ្សារត្រូវបានពង្រឹង។

យោងតាមការិយាល័យស្ថិតិជាតិ (NBS) បានឱ្យដឹងថា សន្ទស្សន៍អ្នកគ្រប់គ្រងការទិញ (PMI) សម្រាប់វិស័យផលិតកម្មរបស់ប្រទេសចិនមាន ៤៩,៥ពិន្ទុនៅក្នុងខែឧសភា ដែលកើនឡើង ០,៥ពិន្ទុពីខែមេសា។

អ្នកស្ថិតិរបស់ NBS លោក ហ្សៅ គីងហេ (Zhao Qinghe) បាននិយាយថា ការកែលម្អនេះឆ្លុះបញ្ចាំងពីការបង្កើនល្បឿនផលិតកម្ម និងការរំពឹងទុកអាជីវកម្មវិជ្ជមានបន្ថែមទៀត។
សន្ទស្សន៍រងសម្រាប់ផលិតកម្មបានកើនឡើងដល់ ៥០,៧ពិន្ទុ ដែលកើនឡើង ០,៩ពិន្ទុពីខែមុន ដែលបង្ហាញពីទិន្នផលផលិតកម្មលឿនជាងមុន។ សន្ទស្សន៍ការបញ្ជាទិញថ្មីក៏បានកើនឡើង ០,៦ពិន្ទុដែលឡើងដល់ ៤៩,៨ពិន្ទុផងដែរ។

គួរកត់សម្គាល់ថា PMI សម្រាប់សហគ្រាសធំៗបានឡើងដល់ ៥០,៧ពិន្ទុ ដែលកើនឡើង ១,៥ពិន្ទុពីខែមេសា ដែលចង្អុលទៅរកការកែលម្អលក្ខខណ្ឌសម្រាប់ក្រុមហ៊ុនធំៗ។
ការផលិតបច្ចេកវិទ្យាខ្ពស់បានបន្តកើនឡើងសម្រាប់ខែទី៤ ជាប់ៗគ្នា ដោយឈានដល់ ៥០,៩ពិន្ទុ។ សន្ទស្សន៍រងសម្រាប់វិស័យផលិតឧបករណ៍ និងទំនិញប្រើប្រាស់បានកើនឡើងដល់ ៥១,២ពិន្ទុ និង ៥០,២ពិន្ទុរៀងៗគ្នា។

ការរំពឹងទុករបស់ទីផ្សារក៏មានភាពប្រសើរឡើងផងដែរនៅក្នុងអំឡុងពេលនេះ។ លោក ហ្សៅ បាននិយាយថា សន្ទស្សន៍នៃការរំពឹងទុកនៃសកម្មភាពផលិតកម្ម និងអាជីវកម្មបានកើនឡើងដល់ ៥២,៥ពិន្ទុ ដែលកើនឡើង ០,៤ពិន្ទុពីខែមុន ដែលបង្ហាញថា សហគ្រាសផលិតរក្សាបាននូវទំនុកចិត្តថេរចំពោះទស្សនវិស័យកំណើនរយៈពេលខ្លី។

អ្នកវិភាគបាននិយាយថា ការបន្តស្ទុះងើបឡើងវិញនៃ PMI ផលិតកម្មបានបង្ហាញថា ឥទ្ធិពលនៃវិធានការគោលនយោបាយម៉ាក្រូសេដ្ឋកិច្ចកាន់តែខ្លាំងកំពុងចាប់ផ្តើមលេចឡើង ជាមួយនឹងការកែលម្អការរំពឹងទុកអាជីវកម្ម និងសញ្ញានៃការងើបឡើងវិញនៅក្នុងសកម្មភាពផលិតកម្ម។

ទិន្នន័យកាលពីថ្ងៃសៅរ៍សប្តាប៍មុនក៏បានបង្ហាញផងដែរថា PMI ដែលមិនផលិតបានឈរនៅកម្រិត ៥០,៣ពិន្ទុនៅក្នុងខែឧសភា ដែលធ្លាក់ចុះបន្តិចពី ៥០,៤ពិន្ទុនៅក្នុងខែមេសា។
លោក ហ្សៅ បានកត់សម្គាល់ថា វិស័យសេវាកម្មរក្សាបាននូវសន្ទុះស្ថិរភាព ដែលត្រូវបានគាំទ្រដោយទេសចរណ៍ទាក់ទងនឹងថ្ងៃឈប់សម្រាក និងការប្រើប្រាស់ម្ហូបអាហារក្នុងអំឡុងពេលថ្ងៃឈប់សម្រាកខែឧសភា។

លោក វេន តៅ (Wen Tao) អ្នកវិភាគនៅមជ្ឈមណ្ឌលព័ត៌មានភស្តុភារចិន បាននិយាយថា កិច្ចខិតខំប្រឹងប្រែងគួរតែត្រូវបានធ្វើឡើងដើម្បីជំរុញតម្រូវការក្នុងស្រុក និងជំរុញការបើកចំហកម្រិតខ្ពស់ ដើម្បីជំរុញកំណើនថ្មីនៃតម្រូវការខាងក្រៅ ដែលជួយពង្រឹងសម្រាប់ភាពធន់នឹងសេដ្ឋកិច្ចរបស់ប្រទេស និងពង្រឹងសមត្ថភាពរបស់ខ្លួនក្នុងការទប់ទល់នឹងហានិភ័យ៕

ដោយ៖ យា ចិន្តាខន្តី