AKP ភ្នំពេញ ថ្ងៃទី០៣ ខែមិថុនា ឆ្នាំ២០២៥ -- នាយករដ្ឋមន្ត្រីម៉ាឡេស៊ីលោក អាន់វ៉ា ប៊ីន អ៊ីប្រាហ៊ីម (Anwar Bin Ibrahim) បានថ្លែងសុន្ទរកថាពិសេសនៅឯកិច្ចសន្ទនាសាងរី-ឡា (Shangri-La) លើកទី២២ នៅប្រទេសសិង្ហបុរី ដោយបានបញ្ជាក់អំពីតួនាទីស្នូលរបស់សមាគមប្រជាជាតិអាស៊ីអាគ្នេយ៍ (អាស៊ាន) នៅក្នុងស្ថាបត្យកម្មសន្តិសុខក្នុងតំបន់ និងគាំទ្រដល់ស្ថាបត្យកម្មតំបន់ប្រកបដោយការបើកចំហ តម្លាភាព បរិយាប័ន្ន និងច្បាប់។

ក្នុងតួនាទីជាប្រធានអាស៊ានឆ្នាំ២០២៥ លោក អ៊ីប្រាហ៊ីម បានលើកឡើងពីគុណសម្បត្តិ និងគុណវិបត្តិមួយចំនួនសម្រាប់អាស៊ាននាពេលបច្ចុប្បន្ន។

ទាក់ទងនឹងគុណសម្បត្តិ លោកបានសង្កត់ធ្ងន់ថា អាស៊ានតែងតែមានការតភ្ជាប់ និងស្ថិរភាព កិច្ចសហប្រតិបត្តិការ និងការអភិវឌ្ឍ ជាពិសេសផ្នែកសេដ្ឋកិច្ច។ មិនត្រឹមតែនៅក្នុងសមាគមប៉ុណ្ណោះទេ អាស៊ានក៏សហការជាមួយដៃគូខាងក្រៅក្នុងវិស័យសេដ្ឋកិច្ច ការវិនិយោគ ថាមពល សន្តិសុខសាយប័រ សន្តិសុខស្បៀង និងវប្បធម៌។ លោក​ក៏​បាន​ប្រកាសផង​ដែរ​ថាអាស៊ាន​បាន​យល់ព្រម​ទទួល​ទីម័រឡេស្តេ​ជា​សមាជិក​ទី១១ របស់​អាស៊ាននៅ​ក្នុង​ខែ​តុលាខាងមុខ។

ទាក់​ទង​នឹង​គុណវិបត្តិ យោង​តាមលោក អ៊ីប្រាហ៊ីម បានឱ្យដឹងថា បើ​ទោះបី​ជា​ស្ថានភាព​នៅ​មីយ៉ាន់ម៉ា​នៅ​តែ​ធ្ងន់ធ្ងរ​ក៏​ដោយ ក៏​អាស៊ាន​មិន​នៅ​ស្ងៀម​ដែរ។

លោកបាននិយាយថា ជម្លោះនៅសមុទ្រខាងកើត គឺនៅតែស្មុគ្រស្មាញខ្លាំង ហើយគោលបំណងរបស់ភាគីពាក់ព័ន្ធមិនត្រូវបានសម្រេចតាមរយៈការកើនឡើងភាពតានតឹង ឬដោយការញុះញង់ឱ្យអ្នកដទៃមានការឆ្លើយតបមិនសមាមាត្រនោះទេ។ វា​ត្រូវ​បាន​អនុវត្ត​យ៉ាង​ល្អ​បំផុត​តាម​រយៈ​ការទូត​ដែល​មាន​ស្ថិរភាព។

យោងតាមលោកនាយករដ្ឋមន្ត្រីម៉ាឡេស៊ី បានឱ្យដឹងថា បន្ថែមពីលើជម្លោះនៅក្នុងតំបន់ជាច្រើនរបស់ពិភពលោក ភាពក្រីក្រ ការបែងចែកហានិភ័យនៃការប្រណាំងប្រជែងសព្វាវុធ សង្គ្រាមពាណិជ្ជកម្ម ក៏បង្កការលំបាកដល់តំបន់ដែលគំរាមកំហែងឈានទៅដល់អស្ថិរភាពក្នុងផ្នែកសន្តិសុខផងដែរ។ លោកបានកត់សម្គាល់ថា ពិភពលោកត្រូវតែធ្វើសកម្មភាពដើម្បីការពារសន្តិភាព និងស្ថិរភាព តាមរយៈគោលនយោបាយច្បាស់លាស់តម្លាភាព កិច្ចសហប្រតិបត្តិការ និងចក្ខុវិស័យរយៈពេលវែង៕

ដោយ៖ យា ចិន្ដាខន្ដី (ប្រភព៖ VNA)