AKP ភ្នំពេញ ថ្ងៃទី០២ ខែមិថុនា ឆ្នាំ២០២៥ -- ក្រសួងការពារជាតិកូរ៉េខាងត្បូងបាននិយាយថា មន្ត្រីការពារជាតិជាន់ខ្ពស់កូរ៉េខាងត្បូង ជប៉ុន និងអូស្ត្រាលីបានជួបពិភាក្សាត្រីភាគីកាលពីថ្ងៃអាទិត្យ ដើម្បីពិភាក្សាអំពីស្ថានភាពសន្តិសុខក្នុងតំបន់ និងវិធីពង្រឹងកិច្ចសហប្រតិបត្តិការរបស់ពួកគេ។

អនុរដ្ឋមន្ត្រីការពារជាតិទទួលបន្ទុកគោលនយោបាយ លោក ចូ ឆាងរ៉េ (Cho Chang-rae) និងសមភាគីជប៉ុន និងអូស្ត្រាលី លោក តារ៉ូ យ៉ាម៉ាតូ (Taro Yamato) អគ្គនាយកគោលនយោបាយការពារជាតិ និងលោក ហ៊ូក ចេហ្វហ្វ្រីយ (Hugh Jeffrey) អនុលេខាផ្នែកយុទ្ធសាស្ត្រគោលនយោបាយ និងឧស្សាហកម្ម បានជួបពិភាក្សានៅខាងក្រៅកិច្ចប្រជុំវេទិកា Shangri-La Dialogue ដែលជាវេទិកាការពារប្រចាំឆ្នាំដែលធ្វើឡើងនៅប្រទេសសិង្ហបុរី។

កាល​ពី​ឆ្នាំ​មុន ប្រទេស​ទាំង​បី​បាន​ធ្វើ​កិច្ច​ប្រជុំ​រដ្ឋមន្ត្រី​ការពារ​ជាតិ​ជា​លើក​ដំបូង​មិន​ធ្លាប់​មាន​ក្នុង​ឱកាស​នៃ​វេទិកា​សន្តិសុខ​ដែល​បាន​ប្រារព្ធ​ធ្វើ​នៅ​ក្នុង​​ទីក្រុង។ នៅឆ្នាំនេះ លោក ចូ បានចូលរួមក្នុងការជួបជុំនេះជំនួសឱ្យរដ្ឋមន្ត្រីការពារជាតិស្តីទី លោក គីម ស៊ុនហូ (Kim Seon-ho) មុនការបោះឆ្នោតប្រធានាធិបតីថ្ងៃទី៣ ខែមិថុនា។

យោងតាមក្រសួងបានឱ្យដឹងថា ក្រៅពីកិច្ចប្រជុំត្រីភាគី លោក ចូ បានជួបប្រជុំទ្វេភាគីជាបន្តបន្ទាប់ជាមួយមន្ត្រីការពារជាតិជាន់ខ្ពស់មកពីប្រទេសកាណាដា ជប៉ុន ហ្វីលីពីន ប៉ូឡូញ និងសិង្ហបុរី ដើម្បីពិភាក្សាអំពីកិច្ចសហប្រតិបត្តិការលើវិស័យការពារជាតិ និងឧស្សាហកម្មអាវុធ។

លោក ចូ និងលោក យ៉ាម៉ាតូ មន្ត្រីការពារជាតិជប៉ុនបានបញ្ជាក់សារជាថ្មីអំពីសារៈសំខាន់នៃកិច្ចសហប្រតិបត្តិការសន្តិសុខទ្វេភាគី និងត្រីភាគីរបស់ពួកគេជាមួយសហរដ្ឋអាមេរិកក្នុងការប្រឈមមុខនឹងការគំរាមកំហែងនុយក្លេអ៊ែរ និងមីស៊ីលរបស់ប្រទេសកូរ៉េខាងជើង និងការធ្វើឱ្យកិច្ចសហប្រតិបត្តិការយោធាកាន់តែស៊ីជម្រៅជាមួយប្រទេសរុស្ស៊ី។

ក្រសួងបាននិយាយថា នៅក្នុងកិច្ចពិភាក្សាជាមួយអនុរដ្ឋមន្ត្រីការពារជាតិប៉ូឡូញ លោក ប៉ាវែល ហ្សាឡេវស្គី (Pawel Zalewski) កាលពីថ្ងៃសៅរ៍ ភាគីទាំងពីរបានលើកឡើងពីកិច្ចសហប្រតិបត្តិការឧស្សាហកម្មអាវុធរបស់ពួកគេដែលពាក់ព័ន្ធនឹងការនាំចេញរថក្រោះ K9 ហើយយល់ព្រមសហការយ៉ាងជិតស្និទ្ធលើការពង្រីកការផ្លាស់ប្តូរ និងកិច្ចសហប្រតិបត្តិការការពារជាតិរបស់ពួកគេ៕

ដោយ៖ មូល មិនា (ប្រភព៖ យ៉ុនហាប់)