AKP ភ្នំពេញ ថ្ងៃទី៣០ ខែឧសភា ឆ្នាំ២០២៥--
លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានអចិន្ត្រៃយ៍នៃគណៈកម្មាធិការជាតិប្រឆាំងអំពើជួញដូរមនុស្សមានប្រសាសន៍ថា មជ្ឈដ្ឋានខាងក្រៅដែលគាត់មិនបានធ្វើការជាមួយយើង គាត់មិនយល់ពីយើង ដោយពួកគេគិតថាកម្ពុជាហាក់ដូចជាប្រទេសមួយ ឬក្នុងចំណោមពីរបីប្រទេសនៅក្នុងតំបន់ ដែលកំពុងតែបង្កើតឱ្យមានជាមជ្ឈមណ្ឌលប្រព្រឹត្តបទល្មើសនៅក្នុងប្រទេសរបស់ខ្លួន ហើយធ្វើឱ្យជះឥទ្ធិពលទៅដល់ប្រទេសគេដទៃទៀត ធ្វើឱ្យគេរងគ្រោះរហូត ដល់គេផ្សព្វផ្សាយ ឬ ហាមឃាត់ពលរដ្ឋរបស់គេ ឬអ្នកវិនិយោគមិនឱ្យមកប្រទេសកម្ពុជា។ល។ និង។ល។ ដែលធ្វើឱ្យក្លាយទៅជាការបំផ្លាញដល់សេដ្ឋកិច្ចកម្ពុជាយ៉ាងធ្ងន់ធ្ងរ ដោយលោកជំទាវបានដាក់ជាសំណួរថា តើរដ្ឋាភិបាលណាមួយដែលចង់រក្សាបទល្មើសនៅក្នុងប្រទេសខ្លួនឯងដើម្បីអភិវឌ្ឍន៍សេដ្ឋកិច្ច? ដោយលោកជំទាវបានគូសបញ្ជាក់ថា ការចាប់យកបទល្មើសមកធ្វើការអភិវឌ្ឍសេដ្ឋកិច្ចនេះគឺវាមិនបានផលចំពោះរដ្ឋាភិបាលទេ អ្នកដែលបានផលគឺជនល្មើស ចំណែកអ្នកដែលខាតបង់គឺប្រជាពលរដ្ឋ និងរដ្ឋាភិបាលខ្លួនឯងទៅវិញទេ។ ការថ្លែងបញ្ជាក់របស់លោកជំទាវ ជូ ប៊ុនអេង យ៉ាងដូច្នេះធ្វើឡើងក្នុងសន្និសីទសារព័ត៌មានស្តីពីលទ្ធផលនៃកិច្ចខិតខំប្រឹងប្រែងរបស់ក្រសួងមហាផ្ទៃក្នុងការបង្ការ ទប់ស្កាត់ និងបង្ក្រាបបទល្មើសតាមអនឡាញ និងអំពើជួញដូរមនុស្ស នៅទីស្តីការក្រសួងមហាផ្ទៃ នាព្រឹកថ្ងៃទី៣០ ខែឧសភា ឆ្នាំ២០២៥។ ការលើកឡើងរបស់លោកជំទាវក្នុងគោលបំណងឆ្លើយតបទៅនឹងមជ្ឈដ្ឋានខាងក្រៅដែលបានចោទប្រកាន់កម្ពុជាថាជាអ្នកទទួលផលពីការប្រព្រឹត្តបទល្មើសតាមអនឡាញ និងអំពើជួញដូរមនុស្ស។

លោកជំទាវរដ្ឋលេខាធិការបានបន្តថា ដោយមើលឃើញពីការខាតបង់ចំពោះរដ្ឋាភិបាល និងចំពោះពល រដ្ឋរបស់ខ្លួនប្រទេសនីមួយៗបានខិតខំប្រឹងប្រែងក្នុងការបោសសម្អាតបទល្មើស ប៉ុន្តែការបោសសម្អាត បទល្មើសនេះគឺប្រៀបបានទៅនឹងការបោសសម្អាតសំរាមអ៊ីចឹងដែរ ព្រោះបើយើងបោសសម្អាតសំរាមនៅក្នុងផ្ទះរបស់យើង ហើយបើវាប៉ើងតាមខ្យល់ចូលមកក្នុងផ្ទះរបស់យើងថែមទៀតនោះតើយើងបោស ឯណាអស់ វាទាល់តែអ្នកជិតខាងរបស់យើងព្យាយាមបោសសម្អាតផ្ទះខ្លួនឯងដែរ ទើបបរិស្ថានវាស្អាត ទាំងអស់គ្នា គឺមិនអាចចង្អុលដាក់គ្នា និងមិនត្រូវសាចទឹកដាក់គ្នានោះទេ ផ្ទុយទៅវិញត្រូវតែបង្កើនកិច្ច សហការគ្នា។

លោកជំទាវ ជូ ប៊ុនអេង ក៏សូមធ្វើការអំពាវនាវទៅដល់ពលរដ្ឋកម្ពុជាគ្រប់វ័យ សូមឱ្យយក ចិត្តទុកដាក់ចំពោះសុវត្ថិភាពផ្ទាល់ខ្លួន ប្រសិនបើមិនបានគិតអំពីប្រទេសជាតិទេ សូមឱ្យគិតដល់ខ្លួនឯង ដោយធ្វើយ៉ាងណាឱ្យខ្លួនមានសុវត្ថិភាពចៀសផុតពីបទល្មើសតាមអនឡាញ និងអំពើជួញដូរមនុស្ស ក្នុងនោះជាពិសេសសូមយុវជនកុំមានភាពភ្លើតភ្លើនជឿតាមការអូសទាញដោយផ្ទាល់ក្តី តាមអនឡាញក្តី ឬពីក្រុមណាមួយក្តីដែលអាចឱ្យយើងចូលក្នុងអន្ទាក់នៃការកេងប្រវ័ញ្ច ព្រោះកលល្បិចនៃការលួងលោម នាពេលបច្ចុប្បន្ននេះមានមនុស្សច្រើនណាស់បានចាញ់បញ្ឆោតការលួងលោមនេះ ដែលនាំទៅដល់ការ បាត់បង់នូវអ្វីៗគ្រប់បែបយ៉ាង ព្រមទាំងមានការឈឺចាប់យ៉ាងធ្ងន់ធ្ងរផងដែរ ជាពិសេសយុវនារីដែលសព្វ ថ្ងៃនេះមួយចំនួនហាក់ដូចជាកំពុងផ្សងព្រេងក្នុងការស្វែងរកគូស្រករនៅក្រៅប្រទេសនោះឃើញថា មានមួយចំនួនក៏កំពុងរងគ្រោះដោយសារការចាញ់បោកគេ។លោកជំទាវក៏បានថ្លែងអំណរគុណយ៉ាងេជ្រាលជ្រៅចំពោះបណ្តាប្រទេស និង ដៃគូសហការដទៃទៀត ដែលបានរួមចំណែកដល់កិច្ចខិតខំប្រឹងប្រែងរបស់កម្ពុជាក្នុងការបង្ការ ទប់ស្កាត់ និងបង្ក្រាបបទល្មើសតាមអនឡាញ និងអំពើជួញដូរមនុស្ស ដែលជាកិច្ចការមួយដ៏ស្មុគស្មាញមិនមែន សម្រាប់តែកម្ពុជាតែមួយប៉ុណ្ណោះទេ តែវាសម្រាប់ពិភពលោកទាំងមូលផងដែរ ដែលគេមិនត្រូវចោទថា កម្ពុជាកំពុងតែសម្ងំទទួលផលពីបទល្មើសតាមអនឡាញ និងអំពើជួញដូរមនុស្សនោះឡើយ។

ឆ្លើយតបទៅនឹងបញ្ហានេះដែរ លោកបណ្ឌិត ទូច សុឃៈ អ្នកនាំពាក្យរងក្រសួងមហាផ្ទៃ ដែលជាអ្នក សម្របសម្រួលក្នុងសន្និសីទសារព័ត៌មានស្តីពីលទ្ធផលនៃកិច្ចខិតខំប្រឹងប្រែងរបស់ក្រសួងមហាផ្ទៃ ក្នុងការបង្ការ ទប់ស្កាត់ និងបង្ក្រាបបទល្មើសតាមអនឡាញ និងអំពើជួញដូរមនុស្សនេះបានថ្លែងថា មួយរយៈ ចុងក្រោយនេះគឺមានការវាយប្រហារ ដាក់បន្ទុក និងការមួលបង្កាច់មកលើថ្នាក់ដឹកនាំក្រសួងមហាផ្ទៃ ដោយចោទប្រកាន់ថា មានទំនាក់ទំនងជាមួយក្រុមហ៊ុននេះ ក្រុមហ៊ុននោះ ដើម្បីឱ្យមានករណីឆបោក និងការជួញដូរមនុស្សអាចកើតឡើងបាន ដែលបញ្ហានេះលោកបណ្ឌិត ទូច សុឃៈ សូមច្រានចោល ដោយមិនអាចទទួលយកបានជាដាច់ខាត ព្រោះថ្នាក់ដឹកនាំក្រសួងមហាផ្ទៃ ជាពិសេសឯកឧត្តមអភិសន្តិ បណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ពិតជាមានឆន្ទៈយ៉ាងមោះមុតក្នុងការបង្ក្រាប នូវរាល់បទល្មើសទាំងការឆបោកតាមអនឡាញ ទាំងការជួញដូរមនុស្ស វាផ្ទុយពីការចោទប្រកាន់ថា ឯកឧត្តមគឺជាអ្នកសម្របសម្រួលកណ្តាលឱ្យបង្កើតចេញជាបទល្មើសនោះគឺជាការមួលបង្កាច់ដែលមិនអាច ទទួលយកបានជាដាច់ខាត៕

ដោយ៖ ចាន់ សុភឿន