AKP បន្ទាយមានជ័យ ថ្ងៃទី៣០ ខែឧសភា ឆ្នាំ២០២៥ -- ឯកឧត្តម អ៊ុ រាត្រី អភិបាលនៃគណៈអភិបាលខេត្តបន្ទាយមានជ័យ បានមានប្រសាសន៍ថា ការផ្ដល់សេវាសាធារណៈប្រកបដោយគុណភាព និងប្រសិទ្ធភាព គឺជាបេះដូងនៃការគ្រប់គ្រងរដ្ឋបាលល្អ និងជាកាតព្វកិច្ចដ៏ចម្បងរបស់រដ្ឋបាលខេត្ត ក៏ដូចជាគ្រប់អង្គភាពពាក់ព័ន្ធទាំងអស់។ ការថ្លែងយ៉ាងដូច្នេះក្នុងឱកាសឯកឧត្តម អ៊ុ រាត្រី អញ្ជើញជាអធិបតីភាពដ៏ខ្ពង់ខ្ពស់ក្នុងកិច្ចប្រជុំពិភាក្សាជ្រើសរើសបេក្ខភាព ដើម្បីចូលរួមប្រកួតប្រជែងជាអង្គភាពផ្ដល់សេវាសាធារណៈគំរូ សម្រាប់ឆ្នាំ២០២៥។ កិច្ចប្រជុំនេះបានប្រព្រឹត្តទៅប្រកបដោយបរិយាកាសរីករាយ និងស្និទ្ធស្នាល នៅសាលប្រជុំធំសាលាខេត្តបន្ទាយមានជ័យ នាព្រឹកថ្ងៃទី៣០ ខែឧសភា ឆ្នាំ២០២៥ ដោយមានការចូលរួមពីថ្នាក់ដឹកនាំ មន្ត្រីរាជការ និងតំណាងស្ថាប័នពាក់ព័ន្ធជាច្រើនរូប។

កិច្ចប្រជុំនេះមានគោលបំណងយ៉ាងសំខាន់ក្នុងការជំរុញ និងលើកកម្ពស់គុណភាពនៃការផ្ដល់សេវាសាធារណៈនៅក្នុងខេត្តបន្ទាយមានជ័យ ជាពិសេសក្នុងវិស័យអប់រំ និងវិស័យសុខាភិបាល។ ការជ្រើសរើសអង្គភាពគំរូនេះ គឺជាការឆ្លុះបញ្ចាំងពីការប្តេជ្ញាចិត្តរបស់រដ្ឋបាលខេត្ត ក្នុងការកែទម្រង់រដ្ឋបាលសាធារណៈ ស្របតាមយុទ្ធសាស្ត្ររបស់រាជរដ្ឋាភិបាលកម្ពុជា។ តាមរយៈការប្រកួតប្រជែងនេះ គេរំពឹងថានឹងបង្កើតបាននូវគំរូល្អៗ ដែលអាចជាបទពិសោធន៍សម្រាប់អង្គភាពដទៃទៀត ក្នុងការអភិវឌ្ឍ និងលើកកម្ពស់ប្រសិទ្ធភាពការងាររបស់ខ្លួន។

ឯកឧត្តម អ៊ុ រាត្រី បានសង្កត់ធ្ងន់ថា អង្គភាពនីមួយៗត្រូវខិតខំប្រឹងប្រែងឱ្យអស់ពីលទ្ធភាព ដើម្បីបម្រើផលប្រយោជន៍ជូនប្រជាពលរដ្ឋ ប្រកបដោយតម្លាភាព គណនេយ្យភាព និងការទទួលខុសត្រូវខ្ពស់។ ការជ្រើសរើសអង្គភាពគំរូគឺជាយន្តការមួយដ៏មានប្រសិទ្ធភាព ក្នុងការជំរុញឱ្យមានការប្រកួតប្រជែងផ្ទៃក្នុងប្រកបដោយស្មារតីស្ថាបនា។ ឯកឧត្តមបានលើកទឹកចិត្តឱ្យគ្រប់អង្គភាពទាំងអស់ ចូលរួមដាក់ពាក្យប្រកួតប្រជែង ដើម្បីបង្ហាញពីសមត្ថភាព និងការប្ដេជ្ញាចិត្តរបស់ខ្លួន ក្នុងការកែលម្អសេវា និងជឿជាក់ថា តាមរយៈការប្រកួតប្រជែងនេះ គុណភាពសេវាសាធារណៈនឹងត្រូវលើកកម្ពស់ជាលំដាប់។ វិស័យអប់រំ និងវិស័យសុខាភិបាល គឺជាសសរស្តម្ភដ៏សំខាន់សម្រាប់ការអភិវឌ្ឍធនធានមនុស្ស និងសុខុមាលភាពសង្គម។ ឯកឧត្តមបានសង្កត់ធ្ងន់ថា ការផ្ដល់សេវាល្អក្នុងវិស័យទាំងពីរនេះនឹងរួមចំណែកដោយផ្ទាល់ដល់ការកាត់បន្ថយភាពក្រីក្រ និងការលើកកម្ពស់កម្រិតជីវភាពរស់នៅរបស់ប្រជាពលរដ្ឋ។ ដូច្នេះហើយ ទាមទារឱ្យមានការយកចិត្តទុកដាក់ខ្ពស់ពីគ្រប់ភាគីពាក់ព័ន្ធ។ មន្ត្រីរាជការទាំងអស់ត្រូវតែបន្តពង្រឹងសមត្ថភាព ចំណេះដឹង និងសីលធម៌វិជ្ជាជីវៈ ដើម្បីឆ្លើយតបទៅនឹងតម្រូវការជាក់ស្ដែងរបស់ប្រជាពលរដ្ឋ ដែលមានការកើនឡើងជាលំដាប់។

ឯកឧត្តមបានបន្ថែមថា ការបម្រើសេវាសាធារណៈ គឺទាមទារឱ្យមានការអត់ធ្មត់ ស្មារតីលះបង់ និងការយល់ដឹងពីទុក្ខលំបាករបស់ប្រជាពលរដ្ឋ។ រដ្ឋបាលខេត្តត្រៀមខ្លួនជានិច្ចក្នុងការគាំទ្រ និងផ្ដល់កិច្ចសហការពេញលេញ ដើម្បីធានាបាននូវភាពជោគជ័យនៃកម្មវិធីជ្រើសរើសអង្គភាពគំរូនេះ។ ឯកឧត្តមបានអំពាវនាវដល់គណៈកម្មការ និងអង្គភាពពាក់ព័ន្ធទាំងអស់ ឱ្យបំពេញការងារប្រកបដោយយុត្តិធម៌ តម្លាភាព និងវិជ្ជាជីវៈខ្ពស់ ដើម្បីធានាបាននូវលទ្ធផលត្រឹមត្រូវ និងអាចទទួលយកបាន។

សូមបញ្ជាក់ថាកិច្ចប្រជុំបានពិភាក្សាលម្អិតអំពីលក្ខណៈវិនិច្ឆ័យ និងនីតិវិធីនៃការជ្រើសរើសបេក្ខភាព។ គណៈកម្មការនឹងវាយតម្លៃទៅលើទិដ្ឋភាពសំខាន់ៗមួយចំនួន រួមមានគុណភាពសេវា តម្លាភាព ការឆ្លើយតបទៅនឹងតម្រូវការសាធារណៈ ការប្រើប្រាស់បច្ចេកវិទ្យា និងការប្ដេជ្ញាចិត្តរបស់ថ្នាក់ដឹកនាំ។ គេរំពឹងថា អង្គភាពដែលត្រូវបានជ្រើសរើសជាគំរូ នឹងក្លាយជាគំរូដ៏ល្អសម្រាប់អង្គភាពដទៃទៀត ដើម្បីបន្តកែលម្អគុណភាពសេវាសាធារណៈឱ្យកាន់តែប្រសើរឡើង សម្រាប់ជាប្រយោជន៍ដល់ប្រជាពលរដ្ឋក្នុងខេត្តបន្ទាយមានជ័យទាំងមូល៕

ដោយ ឈុន សារ៉ាត