AKP កំពត ថ្ងៃទី១២ ខែឧសភា ឆ្នាំ២០២៥ -- ឯកឧត្តម តាក ហាប់ ប្រធានក្រុមប្រឹក្សាខេត្ត និងលោកជំទាវ និងឯកឧត្តម ម៉ៅ ធនិន អភិបាលខេត្តកំពត និងលោកជំទាវ នៅព្រឹកថ្ងៃទី១២ ខែឧសភា ឆ្នាំ២០២៥ បានដឹកនាំមន្ទីរអង្គភាពជុំវិញខេត្ត លោកគ្រូអ្នកគ្រូ សិស្សានុសិស្ស និងបងប្អូនប្រជាពលរដ្ឋយ៉ាងច្រើនកុះករ ចូលរួមប្រារព្ធពិធីបុណ្យវិសាខបូជានៅបរិវេណប្រាសាទដើមពោធិ៍ក្រុងកំពត ដោយមានរៀបចំការដង្ហែចេញពីប្រាទដើមពោធិ៍ ប្រទក្សិណជុំវិញរង្វង់មូលទុរេន រួចចូលមកប្រាសាទដើមពោធិ៍វិញ និងមានការនិមន្តព្រះសង្ឃទ្រង់បិណ្ឌបាត្រចំនួន៥៦៩អង្គផងដែរ។

មានប្រសាសន៍សំណេះសំណាលក្នុងពិធីនោះ ឯកឧត្តម ម៉ៅ ធនិន អភិបាលខេត្តកំពត បានលើកឡើងថា បុណ្យវិសាខបូជាគឺជាបុណ្យប្រពៃណីសាសនាដ៏សំខាន់មួយក្នុងចំណោមពិធីបុណ្យផ្សេងៗនៅក្នុងព្រះពុទ្ធសាសនា។ ការប្រារព្ធពិធីបុណ្យវិសាខបូជានេះជាការរំលឹកដល់ព្រះគុណ និងកាលទាំងបីរបស់ព្រះសម្មាសម្ពុទ្ធ គឺទ្រង់ប្រសូត ទ្រង់ត្រាស់ដឹង និងទ្រង់បរិនិព្វាន។ រៀលរាល់ពេល នាវេលាថ្ងៃ១៥កើត ពេញបូណ៌មី ខែពិសាខ ថ្នាក់ដឹកនាំ មន្ត្រីរាជការជុំវិញខេត្ត និងបងប្អូនប្រជាពលរដ្ឋក្រុងកំពតតែងតែរៀបចំពិធីបុណ្យវិសាខបូជានេះនៅប្រាសាទដើមពោធិ៍ ជារៀងរាល់ឆ្នាំ។ ដោយឡែកសម្រាប់ឆ្នាំ២០២៥នេះ ការរៀបចំបានធំ មានកិច្ចកម្មវិធីសាសនាច្រើន និងមានពុទ្ធបរិស័ទចូលរួមច្រើនកុះករប្រកបដោយចិត្តជ្រះថ្លា និងសេចក្តីគោរព ដល់គុណព្រះរតនត្រ័យ មានគុណព្រះពុទ្ធ ព្រះធម៌ និងព្រះសង្ឃ ដែលបានណែនាំផ្លូវទៅរកសន្តិភាពទាំងផ្លូវកាយ និងផ្លូវចិត្ត និងការអភិវឌ្ឍប្រកបដោយសេចក្តីសុខ និងសេចក្តីចម្រើន។  

ឯកឧត្តមអភិបាលខេត្តបានបន្ថែមថា វិស័យព្រះពុទ្ធសាសនា ត្រូវបានស្ដារឡើងវិញ ក្រោយថ្ងៃរំដោះ ៧មករា ១៩៧៩ ហើយរហូតមកដល់បច្ចុប្បន្ននេះ រាជរដ្ឋាភិបាលកម្ពុជា បានយកចិត្តទុកដាក់ និងលើកកម្ពស់អភិវឌ្ឍឱ្យកាន់តែប្រសើរ ក្នុងនោះសមិទ្ធផលនានាមានដូចជាវត្តអារាម សាលាពុទ្ធិកសិក្សាគ្រប់កម្រិត មជ្ឈមណ្ឌលវិបស្សនាអប់រំផ្លូវចិត្តជាដើម បានលេចចេញជាបន្តបន្ទាប់ ដើម្បីជួយទ្រទ្រង់ដល់ការអប់រំ គុណធម៌ និងលើកកម្ពស់សីលធម៌សង្គមឱ្យកាន់តែល្អប្រសើរ។

បុណ្យវិសាខបូជាធ្វើឡើងដើម្បីគោរពដឹងគុណ  រំឭកនឹកដល់ព្រឹត្តិការណ៍ធំៗបី នៃសម័យកាលរបស់ព្រះសម្មាសម្ពុទ្ធសមណគោតម គឺថ្ងៃដែលព្រះអង្គទ្រង់បានប្រសូត បានត្រាស់ដឹង និងជាថ្ងៃចូលបរិនិព្វានផងដែរ។ ពិធីបុណ្យនេះក៏ត្រូវបានអង្គការសហប្រជាជាតិ (UN) ប្រកាសទទួលស្គាល់ «វិសាខបូជា» ជាពិធីបុណ្យសាសនាអន្តរជាតិ ដែលគេអាចប្រារព្ធធ្វើបាននៅជុំវិញពិភពលោក៕

ដោយ ប្រាក់ លាង