AKP ព្រះសីហនុ ថ្ងៃទី០៩ ខែឧសភា ឆ្នាំ២០២៥-- លោក មីន កុម្ភៈ អភិបាលនៃគណ:អភិបាលខេត្តព្រះសីហនុ និងលោក ម៉ី ច័ន្ទវាសនា ប្រធាននាយកដ្ឋានកិច្ចការគតិយុត្ត និងគ្រប់គ្រងអាជ្ញាបណ្ណនៃគណៈកម្មការគ្រប់គ្រងល្បែងពាណិជ្ជកម្មកម្ពុជា (គ.ល.ក) នាថ្ងៃទី០៩ ខែឧសភា ឆ្នាំ២០២៥ បានអញ្ជើញដឹកនាំកិច្ចប្រជុំពិភាក្សាស្តីពីការគ្រប់គ្រងប្រតិបត្តិការល្បែងពាណិជ្ជកម្ម និងការគ្រប់គ្រងផលប៉ះពាល់ពីល្បែងស៊ីសងគ្រប់ប្រភេទជូនអាជ្ញាធរសាធារណៈពាក់ព័ន្ធនៅក្នុងខេត្តព្រះសីហនុ ដោយមានការចូលរួមពីលោកអភិបាលក្រុង ស្រុក និងកងកម្លាំងមានសមត្ថកិច្ចក្នុងខេត្ត។

ការធ្វើបទបង្ហាញស្តីពីការគ្រប់គ្រងប្រតិបត្តិការល្បែងពាណិជ្ជកម្ម និងការគ្រប់គ្រងផលប៉ះពាល់ពីល្បែងស៊ីសងគ្រប់ប្រភេទមានពីរ៖ ១. ល្បែងស៊ីសងសំដៅដល់ល្បែងគ្រប់ប្រភេទដែលមិនមានអាជ្ញាបណ្ណពីគ.ល.ក ដែលស្ថិតក្រោមសមត្ថកិច្ចរបស់ក្រសួងមហាផ្ទៃ និងត្រូវអនុវត្តស្របតាមច្បាប់ស្តីពីការបង្ក្រាបល្បែងស៊ីសង និង២. ល្បែងពាណិជ្ជកម្មសំដៅដល់ល្បែងការស៊ីណូ ល្បែងភ្នាល់ ល្បែងផ្សងសំណាង និងល្បែងពាណិជ្ជកម្មដទៃទៀត ដែលត្រូវធ្វើប្រតិបត្តិការ ដើម្បីគោលបំណងបង្កើតប្រាក់ចំណូល ឬដើម្បីគោលបំណងពាណិជ្ជកម្ម។ ល្បែងពាណិជ្ជកម្មដែលមិនពាក់ព័ន្ធដល់ការតម្រូវឱ្យទូទាត់បង់ប្រាក់ ឬវត្ថុដែលមានតម្លៃជាប្រាក់ ដើម្បីមានលទ្ធភាព ឬមានសំណាងឈ្នះប្រាក់ ឬវត្ថុដែលមានតម្លៃជាប្រាក់ មិនត្រូវចាត់ទុកជាល្បែងពាណិជ្ជកម្មសម្រាប់គោលបំណងនៃច្បាប់នេះ ។

លោក មីន កុម្ភៈ អភិបាលរងខេត្តព្រះសីហនុ បានធ្វើការណែនាំដល់ក្រុង ស្រុក បន្តយកចិត្តទុកដាក់ពិនិត្យ តាមដានស្តីពីល្បែងស៊ីសងខុសច្បាប់ ព្រោះល្បែងផ្សងសំណាងនៅខេត្តព្រះសីហនុ ត្រូវបានបិទបញ្ចប់អាជ្ញាបណ្ណជាស្ថាពរ ប្រសិនបើមានទីតាំងណាដែលមានបើកល្បែងស៊ីសងខុសច្បាប់ ត្រូវចុះធ្វើការបង្ក្រាបឱ្យបានទាន់ពេលវេលា ព្រោះល្បែងផ្សងសំណាងនេះ មិនមានអ្នកមានមកលេងនោះទេ គឺមានតែបងប្អូនប្រជាពលរដ្ឋដែលមានជីវភាពមធ្យមចុះក្រោមជាអ្នកលេង ដែលធ្វើឪ្យប៉ះពាល់ដល់ជីវភាពគ្រួសាររបស់ពួកគាត់បន្ថែមតែប៉ុណ្ណោះ។

លោក ម៉ី ច័ន្ទវាសនា ប្រធាននាយកដ្ឋានកិច្ចការគតិយុត្ត និងគ្រប់គ្រងអាជ្ញាបណ្ណ  (គ.ល.ក) បានធ្វើការបូកសរុប និងវាយតម្លៃខ្ពស់ចំពោះការចូលរួមរបស់អាជ្ញាធរក្រុង ស្រុក និងកងកម្លាំងមានសមត្ថកិច្ច ដែលបានសហការផ្តល់ជាសំណួរ សំណូមពរក្នុងការគ្រប់គ្រង ទប់ស្កាត់ និងបង្ក្រាបកុំឱ្យល្បែងផ្សងសំណាងកើតមាននៅលើទឹកដីតំបន់ឆ្នេរដ៏ស្រស់បំព្រងនាទិសនិរតីនៃប្រទេសកម្ពុជា ព្រោះល្បែងផ្សងសំណាងត្រូវបានគណ:កម្មាធិការគតិយុត្ត និងគ្រប់គ្រងអាជ្ញាបណ្ណ គ.ល.ក បានធ្វើការបិទបញ្ចប់អាជ្ញាបណ្ណទាំងស្រុងនៅក្នុងព្រះរាជាណាចក្រកម្ពុជា ដូច្នេះប្រសិនបើមានទៀតនោះ គឺជាបើកដោយខុសច្បាប់ទាមទារឱ្យយើងចូលរួមសហការបង្ក្រាបបានទាន់ពេលវេលា។

ទន្ទឹមនោះ លោកប្រធាននាយកដ្ឋានកិច្ចការគតិយុត្តបានបញ្ជាក់ទៀតថា ចំពោះល្បែងអនឡាញដែលជ្រកក្រោមកាស៊ីណូ គឺជាល្បែងខុសច្បាប់ ព្រោះការស្នើសុំអាជ្ញាបណ្ណរបស់ម្ចាស់ការស៊ីណូ មិនមានល្បែងអនឡាញនោះទេ ព្រោះអាជ្ញាបណ្ណការស៊ីណូ តម្រូវឱ្យម្ចាស់អាជ្ញាបណ្ណស្មើសុំដាក់ឈ្មោះទីតាំងច្បាស់លាស់ និងមានល្បែងអ្វីខ្លះ បើមានលើសពីអាជ្ញាបណ្ណស្នើសុំ គឺជាការខុសច្បាប់តម្រូវឱ្យក្រុមការងារបច្ចេកទេសចុះទៅធ្វើការត្រួតពិនិត្យ និងបង្ក្រាប។

សូមជម្រាបជូនថា ច្បាប់ស្តីពីការបង្ក្រាបល្បែងស៊ីសងត្រូវបានប្រកាសឱ្យប្រើដោយព្រះរាជក្រមលេខ នស/រកម/០១៩៦/២៨ ចុះថ្ងៃទី២៦ ខែមករា ឆ្នាំ១៩៩៦ ដោយមាត្រា១៖ ត្រូវហាមឃាត់ជាដាច់ខាតការលេងល្បែងស៊ីសងគ្រប់ប្រភេទ លើកលែងតែទទួលបានការអនុញ្ញាតពីរាជរដ្ឋាភិបាល។ មាត្រា២៖ រាល់លិខិតដែលបានអនុញ្ញាតឱ្យបើកល្បែងស៊ីសងមោឃ: ក្រៅពីការអនុញ្ញាតរបស់រាជរដ្ឋាភិបាលត្រូវទុកជាមោឃ:។ មាត្រា៣៖ ការបង្ក្រាប និងទប់ស្កាត់ការលេងល្បែងស៊ីសងគ្រប់ប្រភេទជាសមត្ថកិច្ចរបស់ក្រសួងមហាផ្ទៃ។ មាត្រា៤ ដល់មាត្រា៩ ទោសទណ្ឌចំពោះអ្នកប្រព្រឹត្តល្បែងស៊ីសង។ មាត្រា១០៖ ក្រៅពីរាជរដ្ឋាភិបាល អាជ្ញាធរណាក៏ដោយ ក៏គ្មានសិទ្ធិចេញលិខិតអនុញ្ញាត ឱ្យបើកល្បែងស៊ីសងនៅទីណាក៏ដោយជាដាច់ខាត។ មន្ត្រី ឬភ្នាក់ងាររាជការដែលនៅតែចេញលិខិតអនុញ្ញាតឱ្យបើកល្បែងស៊ីសង ត្រូវផ្តន្ទាទោសដាក់ពន្ធនាគារពី១ឆ្នាំ ដល់៥ឆ្នាំ។ មាត្រា១១៖ ជនណាដែលចេញមុខការពារវង់ល្បែងស៊ីសង ឬល្បែងស៊ីសងគ្រប់ប្រភេទនៅទីណាក៏ដោយ ត្រូវផ្តន្ទាទោសដាក់ពន្ធនាគារពី១ឆ្នាំ ដល់៥ឆ្នាំ៕

ដោយ ងូ សុមុនី