AKP ភ្នំពេញ ថ្ងៃទី០៩ ខែ ឧសភា ឆ្នាំ២០២៥-- 

លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី និងឯកឧត្តម វ៉ាន់ឡាល់វ៉ាវណា បាវីតលុង ឯកអគ្គរដ្ឋទូតឥណ្ឌាប្រចាំព្រះរាជាណាចក្រកម្ពុជា កាលពីថ្ងៃទី០៨ ខែឧសភា ឆ្នាំ២០២៥នេះ បានអញ្ជើញជាអធិបតី ក្នុងពិធីដាក់ឱ្យដំណើរការជាផ្លូវការគម្រោងទទួលផលរហ័សស្តីពី ការពង្រីកកាលានុវត្តភាពមរតកដូនតាសម្រាប់ក្រុមស្រ្តីរើសគោមផ្កា (ចរបាប់) ខេត្តកណ្តាល ក្រោមជំនួយឥតសំណងពីរដ្ឋាភិបាលឥណ្ឌា ស្ថិតនៅមជ្ឈមណ្ឌលអភិវឌ្ឍន៍ស្រ្តីស្រុកខ្សាច់កណ្តាល ដោយមានការអញ្ជើញចូលរួមពីលោកជំទាវ ស្រ៊ុន ស្រីនាង អភិបាលរងខេត្តកណ្ដាល ក្រសួង ស្ថាប័នពាក់ព័ន្ធ អាជ្ញាធរស្រុកខ្សាច់កណ្តាល ក្រុងអរិយក្សត្រ ព្រមទាំងបងប្អូនស្ត្រីតម្បាញ ក្រុមគោលដៅ នៃស្រុកខ្សាច់កណ្តាលប្រមាណ១០០នាក់។

លោកជំទាវកិត្តិបណ្ឌិត អ៊ឹង កន្ថាផាវី បានមានប្រសាសន៍ថា គម្រោងដែលដាក់ដំណើរការនេះបានរៀបចំឡើងជាផ្នែកមួយតាមការចង្អុលបង្ហាញរបស់សម្តេចតេជោ ហ៊ុន សែន អតីតនាយករដ្ឋមន្រ្តី ដែលបច្ចុប្បន្នជាប្រធានព្រឹទ្ធសភា។ កាលពីឆ្នាំ២០២៣ សម្តេចតេជោ បានចង្អុលឱ្យក្រសួងចំនួន៣ រួមមាន៖ ក្រសួងកិច្ចការនារី ក្រសួងការងារ និងបណ្តុះបណ្តាលវិជ្ជាជីវៈ និងក្រសួងវប្បធម៌ និងវិចិត្រសិល្បៈ ត្រូវរួមគ្នាសហការ និងសម្របសម្រួលបណ្តុះបណ្តាលជំនាញបែបប្រពៃណីមរតកដូនតា តាមតម្រូវការជាក់ស្តែង។ កិច្ចការនេះក៏ជាការជួយលើកកម្ពស់ជីវភាពរស់នៅរបស់បងប្អូនប្រជាជន ពិសេសបងប្អូន កូនក្មួយជាស្រ្តី និងជាសក្តានុពលក្នុងការចូលរួមចំណែកដល់ការរីកចម្រើននៃទេសចរណ៍បែបវប្បធម៌ផងដែរ។

\

លោកជំទាវកិត្តិបណ្ឌិតបានបន្ថែមទៀតថា នៅក្នុងគម្រោងនេះ គឺមានបំណងបំលែងការត្បាញចរបាប់ឱ្យទៅជានិមិត្តសញ្ញានៃការច្នៃប្រឌិត និងមោទនភាពវប្បធម៌តាមរយៈការផ្តល់គុណតម្លៃ ការលើកកម្ពស់គុណភាព និងភាពច្នៃប្រឌិត ដោយផ្សាភ្ជាប់នឹងការពង្រឹងសមត្ថភាពផ្នែកឌីជីថល សហគ្រិនភាព និងភាពជាអ្នកដឹកនាំរបស់ស្រ្តីនៅក្នុងសហគមន៍ ដែលនឹងអនុញ្ញាតឱ្យស្រ្តី អាចផ្សារភ្ជាប់ទំនាក់ទំនងទីផ្សារ និងពង្រីកវិសាលភាពទីផ្សារផលិតផលបែបបូរាណទំនើប។ វិធីសាស្រ្តដ៏ទូលំទូលាយនេះនឹងអាចធានាពីអត្ថប្រយោជន៍ដល់ស្រ្តីសហគមន៍ ព្រមទាំងរួមចំណែកដល់ការលើកកម្ពស់សុខុមាលភាពសេដ្ឋកិច្ច និងភាពចម្រើនរបស់គ្រួសារ និងសហគមន៍របស់ស្រ្តី និងដើម្បីរួមចំណែកថែរក្សា និងផ្តល់តម្លៃដល់កេរមរតកដូនតា ដែលបានបន្សល់ទុកឱ្យយើងទាំងអស់គ្នាផងដែរ៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)