AKP ភ្នំពេញ ថ្ងៃទី០៩ ខែឧសភា ឆ្នាំ២០២៥

នៅក្នុងជំនួបជាមួយឯកឧត្តម San Lwin អគ្គលេខាធិការរងអាស៊ានក្នុងក្របខ័ណ្ឌនៃកិច្ចប្រជុំរដ្ឋមន្ត្រីព័ត៌មានអាស៊ាន នៅប្រទេសព្រុយណេ ឯកឧត្តម នេត្រ ភក្ត្រា រដ្ឋមន្រ្តីក្រសួងព័ត៌មានកម្ពុជាបានបញ្ជាក់ពីការប្តេជ្ញាចិត្តរបស់កម្ពុជានៅក្នុងការប្រយុទ្ធប្រឆាំងនឹងព័ត៌មានក្លែងក្លាយ និងពង្រឹងសន្តិសុខព័ត៌មាន សុវត្ថិភាពព័ត៌មានដើម្បីការពារអ្នកប្រើប្រាស់ តាមរយៈការបញ្ជ្រាបនូវអក្ខរកម្មវិស័យព័ត៌មាន។ 

ឯកឧត្តមរដ្ឋមន្រ្តីក៏បានជម្រាបជូនឯកឧត្តម San Lwin ពីការត្រៀមខ្លួនរៀបចំកិច្ចប្រជុំកំពូលប្រព័ន្ធផ្សព្វផ្សាយអាស៊ីលើកទី២០ នៅខែកក្កដា ឆ្នាំ២០២៥ និងប្រជុំរដ្ឋមន្ត្រីទទួលបន្ទុកព័ត៌មានអាស៊ានលើកទី១៨ នៅឆ្នាំ២០២៧ ខាងមុខ និងបានស្វែងរកការគាំទ្រពីសំណាក់អគ្គលេខាធិការដ្ឋានអាស៊ាន។

ជាការឆ្លើយតប ឯកឧត្តម San Lwin បានសម្តែងការគាំទ្រចំពោះការដឹកនាំរបស់ប្រទេសកម្ពុជា និងការខិតខំប្រឹងប្រែងក្នុងការពង្រឹងប្រព័ន្ធផ្សព្វផ្សាយក្នុងតំបន់ ដោយបានបញ្ជាក់ថា អគ្គលេខាធិការដ្ឋានអាស៊ានសន្យានឹងផ្តល់នូវការគាំទ្រកម្ពុជាក្នុងការរៀបចំកិច្ចប្រជុំសំខាន់ៗទាំងពីរ។
ក្នុងឱកាសនេះ ឯកឧត្តម នេត្រ ភក្ត្រា ក៏បានអញ្ជើញឯកឧត្តម កៅ គឹមហួន អគ្គលេខាធិការអាស៊ាន ដើម្បីចូលរួមក្នុងកិច្ចប្រជុំកំពូលប្រព័ន្ធផ្សព្វផ្សាយអាស៊ី(Asia Media Summit) លើកទី២០ ដែលកម្ពុជានឹងទទួលធ្វើជាម្ចាស់ផ្ទះ នៅខេត្តសៀមរាប នាខែកក្កដា ឆ្នាំ២០២៥ ខាងមុខនេះផងដែរ៕

ដោយ៖ រិទ្ធី រូបថត៖ ឡុង ដេវីត