AKP ភ្នំពេញ ថ្ងៃទី០៩ ខែឧសភា ឆ្នាំ២០២៥-- បន្ទាប់ឆ្លងកាត់ការហ្វឹកហ្វឺន អស់រយៈពេល ៦ខែ សិក្ខាកាមវគ្គហ្វឹកហ្វឺនបណ្តុះបណ្តាល នាយទាហានរង ថ្នាក់ពួក/ក្រុមថ្មើរជើង ជំនាន់ទី៥ របស់សាលាពលទាហានទី១ យោធភូមិភាគទី១ បានឈានដល់វគ្គបង្ហាញសមត្ថភាពពិតរបស់សិក្ខាកាមម្នាក់ៗ  តាមរយៈមេរៀនការបាញ់គ្រាប់ពិតក្រុមថ្មើរជើងបាញ់ប្រយុទ្ធក្នុងពេលវាយលុកខ្មាំង នៅទីលានបាញ់គ្រាប់ពិតអាវុធគាំទ្រយោធភូមិភាគី១ តំបន់ភ្នំឡេង ឃុំសំអាង ស្រុកថាឡាបរិវ៉ាត់់ ខេត្តស្ទឹងត្រែង ក្រោមការត្រួតពិនិត្យដោយផ្ទាល់ពីសំណាក់លោកឧត្តមសេនីយ៍ទោ ហួត សុវណ្ណ មេបញ្ជាការរង នាយសេនាធិការ តំណាងឯកឧត្តម ឧត្តមសេនីយ៍ទោ លី សូរ៉ារិទ្ធ មេបញ្ជាការយោធភូមិភាគទី១។

កាលពីថ្ងៃទី០៨ ខែឧសភា ឆ្នាំ២០២៥ នៅទីលានបាញ់គ្រាប់ពិតអាវុធគាំទ្រយោធភូមិភាគទី១ តំបន់ភ្នំឡេង ឃុំសំអាង ស្រុកថាឡាបរិវ៉ាត់់ ខេត្តស្ទឹងត្រែង មានរៀបចំការបាញ់គ្រាប់ពិតក្រុមថ្មើរជើងបាញ់ប្រយុទ្ធក្នុងពេលវាយលុកខ្មាំង របស់សិក្ខាកាមវគ្គហ្វឹកហ្វឺនបណ្តុះបណ្តាល នាយទាហានរង ថ្នាក់ពួក/ក្រុមថ្មើរជើង ជំនាន់ទី៥ របស់សាលាពលទាហានទី១យោធភូមិភាគទី១ ក្នុងនោះសិក្ខាកាមមានមុខចូលរួមហ្វឹកហាត់ចំនួន៥០នាក់បែងចែកជា៦ក្រុមថ្មើរជើងប្រយុទ្ធ។ ធ្វើការវាយលុកខ្មាំងលើ៣គោលដៅសំខាន់។ ជាលទ្ធផលយើងទទួលបាន ក្រុមទី៦កំទេចគោលដៅបាន៧៣ ភាគរយ ទទួលបានចំណាត់ថ្នាក់ពូកែ និង៥ក្រុមទៀត កម្ទេចគោលដៅបាន៦៥ភាគរយ  ទទួលបានចំណាត់ថ្នាក់បង្គួរ។ វាយតម្លៃ អង្គភាពទទួលបាននិទ្ទេសពូកែស្មើនឹង៧៣ភាគរយ ។

ក្នុងឱកាសនោះ ឧត្តមសេនីយ៍ទោ ហួត សុវណ្ណ មេបញ្ជាការរង នាយសេនាធិការយោធភូមិភាគទី ១ បានថ្លែងនូវការកោតសរសើរ ចំពោះការខិតខំប្រឹងប្រែងរបស់ប្អូនៗ សិក្ខាកាមទាំអស់ ដែលបានយកចិត្តទុកដាក់ខិតខំរៀនសូត្រ ក្រេបជញ្ជក់នូវចំណេះវិជ្ជារយៈពេលកន្លងមក រហូតដណ្តើមបាននូវលទ្ធផល ជាទីគាប់ចិត្តដូចថ្ងៃនេះ។ ឧត្តមសេនីយ៍ទោបានសំណូមពរដល់ប្អូនៗសិក្ខាកាមអស់ ពេលត្រឡប់ទៅកាន់អង្គភាពដើមវិញ ត្រូវបន្តដុសខាត់បង្កើនសមត្ថភាពរបស់ខ្លួនបន្ថែមទៀត ដើម្បីក្លាយជាសរសរទ្រូងយ៉ាងរឹងមាំរបស់ប្រទេសជាតិនាថ្ងៃអនាគត។

ឧត្តមសេនីយ៍ទោ ហួត សុវណ្ណ បានផ្តាំផ្ញើដល់កម្មសិក្សាការីទាំងអស់ត្រូវខិតខំគោរពវិន័យ និងបទបញ្ជារបស់ថ្នាក់លើ ឱ្យបានម៉ឺងម៉ាត់។ ពង្រឹងសាមគ្គីភាពរវាងមិត្តរួមអាវុធ ចេះជួយគ្នាទៅវិញទៅមកនៅគ្រប់កាលៈទេសៈ។ ត្រូវចៀសវាងដាច់ខាតការប្រព្រឹត្តបទល្មើសនានាដែលខុសនឹងច្បាប់រដ្ឋ៕

ដោយ ណយ នឿន (ប្រភព៖ កងទ័ពជើងគោក)