AKP បន្ទាយមានជ័យ ថ្ងៃទី០៨ ខែឧសភា ឆ្នាំ២០២៥--ឯកឧត្តម អ៊ុំ រាត្រី អភិបាលខេត្តបន្ទាយមានជ័យ បានកោតសរសើរ និងថ្លែងអំណរគុណចំពោះកងកម្លាំងដែលបានលះបង់កម្លាំងកាយចិត្ត អនុវត្តតាមបទបញ្ជាដ៏ម៉ឺងម៉ាត់របស់ប្រមុខរាជរដ្ឋាភិបាល សម្ដេចមហាបវរធិបតី ហ៊ុន ម៉ាណែត ក្នុងការបង្ក្រាបបទល្មើសនេសាទនៅបឹងទន្លេសាប ទោះបីជាជួបប្រទះនូវឧបសគ្គយ៉ាងណាក៏ដោយ។ ការថ្លែងយ៉ាងដូច្នេះរបស់ឯកឧត្តម អ៊ុំ រាត្រី បានធ្វើឡើងក្នុងឱកាសរួមដំណើរជាមួយឯកឧត្តម ប្លែក វ៉ារី ប្រធានក្រុមប្រឹក្សាខេត្ត បានដឹកនាំក្រុមការងាររដ្ឋបាលខេត្តបន្ទាយមានជ័យ អញ្ជើញចុះសំណេះសំណាលសួរសុខទុក្ខ និងនាំយកអំណោយជូនដល់នាយទាហាន នាយទាហានរង និងពលទាហាន ដែលកំពុងឈរជើងក្នុងការទប់ស្កាត់ និងបង្ក្រាបបទល្មើសនេសាទខុសច្បាប់ ក្នុងបឹងទន្លេសាបស្ថិតនៅភូមិសាស្រ្តខេត្តពោធិ៍សាត់ បាត់ដំបង និងសៀមរាប កាលពីថ្ងៃពុធ ទី០៧ ខែឧសភា ឆ្នាំ២០២៥។

ឯកឧត្តម អ៊ុំ រាត្រី បានលើកឡើងពីការខិតខំប្រឹងប្រែងរបស់កងកម្លាំងក្នុងការការពារមច្ឆជាតិ និងធនធានជីវចម្រុះនៅក្នុងបឹងទន្លេសាប ដែលជាកិច្ចការដ៏សំខាន់សម្រាប់បរិស្ថាន និងប្រជាជនកម្ពុជាទាំងមូល។

លោកឧត្តមសេនីយ៍ទោ សេង ធារិន មេបញ្ជាការរង នាយសេនាធិការនៃយោធភូមិភាគទី៥ និងជាប្រធានក្រុមការងារបង្ក្រាបបទល្មើសនេសាទបឹងទន្លេសាប បានថ្លែងអំណរគុណយ៉ាងជ្រាលជ្រៅចំពោះថ្នាក់ដឹកនាំខេត្តបន្ទាយមានជ័យ និងប្រតិភូដែលបានចុះសួរសុខទុក្ខ និងនាំយកនូវស្បៀងអាហារ គ្រឿងឧបភោគបរិភោគ និងថវិកាដ៏មានតម្លៃមកជូនកងកម្លាំងដែលកំពុងឈរជើងបំពេញបេសកកម្ម។

លោកបានរាយការណ៍អំពីលទ្ធផលនៃការបង្ក្រាបបទល្មើសនេសាទខុសច្បាប់ ដែលកងកម្លាំងជាង៨០០នាក់ បានប្រតិបត្តិការយ៉ាងសកម្មរឹបអូស និងកម្ទេចចោលសម្ភារនេសាទខុសច្បាប់ជាច្រើន ព្រមទាំងបានលែងត្រីរាប់សិបតោនចូលក្នុងបឹងទន្លេសាបវិញ និងបានអំពាវនាវដល់ប្រជាពលរដ្ឋកុំឱ្យប្រើប្រាស់ឧបករណ៍នេសាទខុសច្បាប់ ដែលបង្កគ្រោះថ្នាក់ដល់ពូជត្រី និងសូមចូលរួមក្នុងការអភិរក្សធនធានមច្ឆជាតិដ៏សំខាន់នេះ ព្រមទាំងបានស្នើឱ្យប្រជាពលរដ្ឋសហការជាមួយកងកម្លាំង ដោយរាយការណ៍អំពីសកម្មភាពនេសាទខុសច្បាប់នានា ដើម្បីឱ្យកងកម្លាំងអាចចុះអន្តរាគមន៍បានទាន់ពេលវេលា។

សូមបញ្ជាក់ថា អំណោយរដ្ឋបាលខេត្តបន្ទាយមានជ័យនាំយកទៅជូនដល់កងកម្លាំងដែលកំពុងឈរជើងក្នុងការទប់ស្កាត់ និងបង្ក្រាបបទល្មើសនេសាទខុសច្បាប់ រួមមានអង្ករ៣តោន ពងទា៣០០០គ្រាប់ មីជាតិ១០០កេស ប៊ីចេង១០០កញ្ចប់ ស្ករស១០០គីឡូក្រាម អំបិល២០០គីឡូក្រាម ប្រេងឆា៥០លីត្រ ខ្ទឹមស១០០គីឡូក្រាម ទឹកត្រី៥០យួរ ទឹកស៊ីអ៊ីវ៥០យួរ សាច់ក្រក ២០០គីឡូក្រាម សាច់ជ្រូកស្រស់ចំនួន៣ក្បាល សាច់គោចំនួន៣ក្បាល និងថវិកាមួយចំនួនផងដែរ៕

ដោយ ឈុន សារ៉ាត