AKP ភ្នំពេញ ថ្ងៃទី០៥ ខែឧសភា ឆ្នាំ២០២៥ -- ឯកឧត្ដម ប្រាជ្ញ ចន្ទ ប្រធានគណៈកម្មាធិការជាតិរៀបចំការបោះឆ្នោត( គ.ជ.ប ) បានអំពាវនាវដល់អាជ្ញាធរមានសមត្ថកិច្ច ជាពិសេស មេឃុំ ចៅសង្កាត់ និងមេភូមិផ្ទាល់ដែលរស់នៅជាមួយប្រជាពលរដ្ឋ ត្រូវកៀរគរផ្សព្វផ្សាយឱ្យបានជ្រួតជ្រាបអំពីរយៈពេលនៃការពិនិត្យបញ្ជីឈ្មោះ និងចុះឈ្មោះបោះឆ្នោតជូនដល់ប្រជាពលរដ្ឋឱ្យបានទូលំទូលាយផងដែរ។ ការអំពាវនាវបែបនេះក្នុងខណៈចុះត្រួតពិនិត្យដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោត ស្ថិតនៅសង្កាត់ចាក់អង្រែក្រោម ខណ្ឌមានជ័យ រាជធានីភ្នំពេញ នាព្រឹកថ្ងៃទី០៥ ខែឧសភា ឆ្នាំ២០២៥។

ឯកឧត្តម ប្រាជ្ញ ចន្ទ បានថ្លែងបញ្ជាក់ថា មកដល់ថ្ងៃនេះទាំងប្រទេសកំពុង តែមមាញឹក្នុងដំណើរការពិនិត្យបញ្ជីឈ្មោះ និងចុះឈ្មោះបោះឆ្នោត ហើយឆ្នាំនេះ គ.ជ.ប បានន្ថែមរឿងថ្មីមួយ គឺការធ្វើបច្ចុប្បន្នភាព ជីវមាត្រ គឺថាចំពោះប្រជាពលរដ្ឋដែលបានចុះឈ្មោះចាប់តាំងពីឆ្នាំ២០១៦ មកដល់បច្ចុប្បន្នគឺមានរយៈពេល១០ឆ្នាំហើយ ដូច្នេះអ្វីៗមានការប្រែប្រួល ដូចជា មុខ និងក្រយ៉ៅដៃ ហេតុនេះទើប គ.ជ.ប អញ្ជើញប្រជាពលរដ្ឋដែលមានចំនួនជាង ៦លាននាក់ នៅទូទាំងប្រទេសមកធ្វើបច្ចុប្បន្នភាព ជីវមាត្រ។ ឯកឧត្ដមបន្តថា ក្នុងឆ្នាំនេះ គ.ជ.ប មានផែនការធ្វើបច្ចុប្បន្នភាព ជីវមាត្រ យ៉ាងតិចឱ្យបានមួយលាននាក់ ខណៈនៅឆ្នាំក្រោយនឹងត្រូវជំរុញធ្វើឱ្យបានទាំងអស់ មុនការបោះឆ្នោតជ្រើសរើសក្រុមប្រឹក្សាឃុំ-សង្កាត់នៅឆ្នាំ២០២៧ និងបោះឆ្នោតជ្រើសតាំងតំណាងរាស្ត្រនៅឆ្នាំ២០២៨ មកដល់។ ដូច្នេះ គ.ជ.ប នៅតែបន្តអំពាវនាវដល់ប្រជាពលរដ្ឋ ដែលបានទទួលលិខិត និងបណ្ណព័ត៌មាន ត្រូវមកធ្វើបច្ចុប្បន្នភាព ជីវមាត្រ ឱ្យបានច្រើនដែលអាចធ្វើទៅបាន។ ឯកឧត្ដមប្រធាន គ.ជ.ប ក៏បានមានប្រសាសន៍រម្លឹកដល់រដ្ឋបាល ឃុំ សង្កាត់ ជាពិសេស មេភូមិ ត្រូវបែងចែកពេលវេលា ដើម្បីធ្វើយ៉ាងណាឱ្យបងប្អូនប្រជាពលរដ្ឋមកចូលរួមធ្វើបច្ចុប្បន្នភាព ជីវមាត្រនេះឱ្យបានគ្រប់ៗគ្នា។ ឯកឧត្ដមបានបញ្ជាក់បន្ថែមថា ការពិនិត្យបញ្ជីឈ្មោះបោះឆ្នោត និងការចុះឈ្មោះបោះឆ្នោត ក៏ដូចជា  ការធ្វើបច្ចុប្បន្នភាព ជីវមាត្រ មានរយៈពេល២៦ ថ្ងៃ ដោយចាប់ផ្ដើមពីថ្ងៃទី ០១ ដល់ថ្ងៃទី២៦ ខែឧសភា ឆ្នាំ២០២៥។ ទន្ទឹមនេះ ចំពោះបងប្អូនប្រជាពលរដ្ឋ ដែលមិនទាន់មានឈ្មោះក្នុងបញ្ជីឈ្មោះបោះឆ្នោត ឬក៏មានការប្រែប្រួលទិន្នន័យ ជីវប្រវត្តិក៏សូមអញ្ជើញមកធ្វើការកែសម្រួលផងដែរ។
សូមជម្រាបជូនផងដែរថា យោងតាមលទ្ធផលបណ្តោះអាសន្នគិតត្រឹមថ្ងៃទី០៣ ខែឧសភា ឆ្នាំ២០២៥ របស់    គ.ជ.ប បានបង្ហាញថា អ្នកដែលបានទៅធ្វើបច្ចុប្បន្នភាពទិន្នន័យជីវមាត្ររួចរាល់មានចំនួន ៨៦ ៣១៤ នាក់, ប្រជាពលរដ្ឋចុះឈ្មោះបោះឆ្នោតថ្មី មានចំនួន ១៤ ៤៩២ នាក់, អ្នកដែលបានផ្ទេរទីលំនៅចូលថ្មីក្នុងឃុំ-សង្កាត់ មានចំនួន ៥ ១០៦ នាក់, អ្នកដែលបានស្នើសុំកែតម្រូវទិន្នន័យជីវប្រវត្តិមានចំនួន ៥២ ៧២១ នាក់ និងអ្នកដែលនឹងត្រូវលុបឈ្មោះចេញពីបញ្ជីបោះឆ្នោតមានចំនួន ១២ ៣០៨ នាក់៕

ដោយ៖ ជឹម ណារី