AKP ភ្នំពេញ ថ្ងៃទី០១ ខែឧសភា ឆ្នាំ២០២៥-- ឯកឧត្តម ប៊ុន ហ៊ាន រដ្ឋលេខាធិការ និងជាប្រធានអង្គភាពត្រួតពិនិត្យគម្រោង ក្នុងនាមតំណាងដ៏ខ្ពង់ខ្ពស់ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម កាលពីថ្ងៃទី៣០ ខែមេសា ឆ្នាំ២០២៥ បានដឹកនាំក្រុមការងារអង្គភាព សហការជាមួយលោកអនុប្រធានយកដ្ឋាន និងមន្ត្រីបច្ចេកទេសនាយកដ្ឋានធារាសាស្ត្រកសិកម្ម ចុះពិនិត្យជាក់ស្តែងការអនុវត្តគម្រោងថែទាំជាប្រចាំ និងគម្រោងថែទាំខួបប្រព័ន្ធធារាសាស្ត្រ ក្នុងខេត្តកំពង់ឆ្នាំង។

ក្នុងឱកាសនោះ ឯកឧត្តមរដ្ឋលេខាធិការ និងក្រុមការងារបានចុះពិនិត្យជាក់ស្តែងការអនុវត្តការងារថែទាំខួបប្រព័ន្ធធារាសាស្ត្រលំហាច និងការងារថែទាំជាប្រចាំប្រព័ន្ធធារាសាស្ត្រអាចាង ស្ថិតក្នុងស្រុកបរិបូណ៍ ខេត្តកំពង់ឆ្នាំង។

ទន្ទឹមនឹងនេះ ឯកឧត្តមរដ្ឋលេខាធិការបានផ្តាំផ្ញើដល់ក្រុមការងារអនុវត្តគម្រោងរបស់នាយកដ្ឋានធារាសាស្ត្រកសិកម្ម ត្រូវបន្តយកចិត្តទុកដាក់លើការងាររជួសជុលថែទាំទំនប់ ប្រឡាយ និងសំណង់សិល្បការ្យដែលមានស្រាប់ឱ្យមានគុណភាព សោភ័ណភាព ត្រឹមត្រូវតាមលក្ខណៈបច្ចេកទេស និងបានណែនាំដល់មន្ទីរធនធានទឹក និងឧតុនិយមខេត្តកំពង់ឆ្នាំង បន្តការងារគ្រប់គ្រងសមិទ្ធផលទាំងនេះឱ្យមានសុវត្ថិភាព និងប្រើប្រាស់បានត្រឹមត្រូវ ជាពិសេសជំរុញសហគមន៍កសិករប្រើប្រាស់ទឹក និងអាជ្ញាធរដែនដី ចុះផ្សព្វផ្សាយការប្រើប្រាស់ប្រព័ន្ធធារាសាស្ត្រនេះឱ្យមាននិរន្តរភាព សម្រាប់ការងារស្រោចស្រព និងការប្រើប្រាស់ប្រចាំថ្ងៃ ជូនប្រជាពលរដ្ឋបានយូរអង្វែង។

សូមជម្រាបថា៖ ១. ប្រព័ន្ធធារាសាស្ត្រលំហាច លាតសន្ធឹងនៅផ្នែកខាងត្បូង តាមបណ្តោយស្ទឹងបរិបូណ៍ មានសក្តានុពលស្រោចស្រពផ្ទៃដីស្រូវវស្សាចំនួន ៥០៨៣ហិកតា ស្រូវប្រាំង ១៥៥៥ហិកតា និងដំណាំរួមផ្សំមួយចំនួន ជូនប្រជាពលរដ្ឋចំនួន ១៣៣៤គ្រួសារ របស់ឃុំចំនួន៤ នៃស្រុកបរិបូណ៍ និង២. ប្រព័ន្ធធារាសាស្រ្តអាចាង លាតសន្ធឹងផ្នែកខាងជើងតាមបណ្តោយ ស្ទឹងបរិបូណ៍ មានសក្តានុពលស្រោចស្រពផ្ទៃដីស្រូវវស្សាចំនួន ១០៣០០ហិកតា ស្រូវប្រាំងចំនួន ៥១៥០ហិកតា និងដំណាំរួមផ្សំមួយចំនួន ជូនប្រជាពលរដ្ឋចំនួន ៦៩៧៩គ្រួសារ របស់ឃុំចំនួន ១០ នៃស្រុកបរិបូណ៍ ខេត្តកំពង់ឆ្នាំង៕

ដោយ៖ ពេជ្រ សំអឿន (ប្រភព៖ ក្រសួងធនធានទឹក)