AKP ភ្នំពេញ ថ្ងៃទី៣០ ខែមេសា ឆ្នាំ២០២៥-- 

លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្រ្តីក្រសួងកិច្ចការនារី បានអនុញ្ញាតឱ្យគណៈប្រតិភូបណ្ដាញសហគ្រិនស្រ្តីកម្ពុជា (CamWEN) ដែលដឹកនាំដោយ លោកស្រីវេជ្ជបណ្ឌិត អេង លីគង់ ប្រធានបណ្ដាញ ចូលជួបសម្ដែងការគួរសម និងរាយការណ៍អំពីសមទ្ធិផលការងារដែលបណ្ដាញសហគ្រិនស្រ្តីកម្ពុជា និងទិសដៅការងាររបស់បណ្តាញសហគ្រិនស្រ្តីកម្ពុជា ក្នុងនាមជាប្រធាន CamWEN និងជាប្រធានបណ្តាញសហគ្រិនស្រ្តីអាស៊ាន (ASEAN Women Entrepreneurs Network – AWEN) កាលពីរសៀលថ្ងៃអង្គារ ទី២៩ ខែមេសា ឆ្នាំ២០២៥។

លោកស្រីវេជ្ជបណ្ឌិត អេង លីគង់ បានជម្រាបថា បច្ចុប្បន្នបណ្តាញមានសមាជិកមកពីសមាគម ដែលតំណាងឱ្យស្រ្តីនៅក្នុងវិស័យធុរកិច្ច ចំនួន៦ ដែលដើរតួនាទីក្នុងជាបណ្តាញទំនាក់ទំនងគ្នា នៅក្នុងស្រុក និងជាតំណាងឱ្យស្រ្តីសហគ្រិននៅក្នុងឆាកអន្តរជាតិ និងតំបន់។ នៅឆ្នាំ២០២៥នេះ ក្នុងនាមជាប្រធាន AWEN, កម្ពុជា ក៏គ្រោងនឹងរៀបចំវេទិកាប្រចាំឆ្នាំអាស៊ាន ស្តីពីសហគ្រិនស្រ្តី និងគ្រោងផ្ទេរប្រធានបណ្ដាញសហគ្រិនស្រ្តីអាស៊ាន ទៅកាន់ប្រទេសឡាវ នៅអំឡុងខែកញ្ញា ខាងមុខនេះ។

 
ក្នុងឱកាសនោះ លោកជំទាវកិត្តិបណ្ឌិតរដ្ឋមន្រ្តីបានកោតសរសើរ ចំពោះលទ្ធផលការងារកន្លងមករបស់បណ្តាញ និងគំនិតផ្តួចផ្តើមពាក់ព័ន្ធការគាំទ្រនិងលើកកម្ពស់សហគ្រិនស្រ្តី ជាពិសេសក្នុងនាមជាប្រធាន AWEN កន្លងមកនេះ។ ស្របតាមវឌ្ឍនភាពបច្ចុប្បន្ន និងភាពខ្លាំងរបស់ខ្លួន (CAMWEN) លោកជំទាវបានលើកទឹកចិត្តឱ្យ CamWEN បន្តផ្តោតលើការប្រមូលសំឡេង និងភាពជាតំណាងសម្រាប់សហគ្រិនស្រ្តីនៅកម្ពុជា ក្នុងតំបន់ (អាស៊ាន) និងឆាកអន្តរជាតិ, ភ្ជាប់ទំនាក់ទំនង និងឱកាសនានា រួមទាំងទីផ្សារ, អាជីវកម្ម, វិនិយោគ, កម្មវិធីអភិវឌ្ឍន៍អាជីវកម្ម ពីខាងក្រៅចូលមកក្នុង ដើម្បីផ្តល់ឱ្យ សមាគមដែលជាសមាជិកខ្លួន និងសហគ្រិនស្រ្តីទូទៅ។

ទន្ទឹមនឹងនេះ លោកជំទាវកិត្តិបណ្ឌិតរដ្ឋមន្រ្តីបានគូសបញ្ជាក់ថា ក្រសួងកិច្ចការនារីនឹងបន្តគាំទ្របច្ចេកទេស និងផ្តល់សហការដល់ CAMWEN លើទិសដៅបន្ត ក្នុងឆ្នាំ២០២៥នេះ ជាពិសេសក្នុងការរៀបចំវេទិកាអាស៊ាន នាពេលខាងមុខនេះ៕

ដោយ៖ ពេជ្រ សំអឿន (ប្រភព៖ ក្រសួងកិច្ចការនារី)