AKP ភ្នំពេញ ថ្ងៃទី៣០ ខែមេសា ឆ្នាំ២០២៥-- 

ឯកឧត្តម ឧត្តមសេនីយ៍ទោ សែម រតនា អនុប្រធានទី១ គណៈកម្មាធិការជាតិ និងជាអគ្គនាយកស្តីទីមជ្ឈមណ្ឌលជាតិរក្សាសន្តិភាព នាថ្ងៃទី៣០ ខែមេសា ឆ្នាំ២០២៥ បានដឹកនាំក្រុមជំនាញចុះពិនិត្យរថយន្ត គ្រឿងចក្រ និងសម្ភារគ្រឿងបំពាក់ ដែលបានបញ្ជូនត្រឡប់មកកម្ពុជាវិញបន្ទាប់ពីបានបញ្ចប់បេសកកម្មអង្គការសហប្រជាជាតិនៅសាធារណរដ្ឋម៉ាលី នៅសាលាហ្វឹកហ្វឺនកងកម្លាំងរក្សាសន្តិភាពពហុជាតិ ស្រុកភ្នំស្រួច ខេត្តកំពង់ស្ពឺ ដើម្បីធ្វើការវាយតម្លៃទៅលើគុណភាព និងធ្វើការជួសជុលកែលម្អឡើងវិញ។

នាឱកាសនោះ ឯកឧត្តម ឧត្តមសេនីយ៍ទោ បានណែនាំដល់ក្រុមការងារជំនាញក្នុងការថែទាំ និងជួសជុលឱ្យពិនិត្យ និងយកចិត្តទុកដាក់ខ្ពស់បំផុតចំពោះរថយន្ត គ្រឿងចក្រ និងសម្ភារគ្រឿងបំពាក់ ដែលទើបបានបញ្ជូនមកដល់កម្ពុជាវិញ បន្ទាប់ពីបានបញ្ជូនទៅឱ្យចូលរួមក្នុងបេសកកម្មអង្គការសហប្រជាជាតិនៅសាធារណរដ្ឋម៉ាលីនាពេលកន្លងមក ដោយឯកឧត្តមបានគូសបញ្ជាក់ថា រថយន្ត គ្រឿងចក្រ និងសម្ភារគ្រឿងបំពាក់ទាំងនេះ មានតម្លៃយ៉ាងធំធេងចំពោះសេចក្តីត្រូវការរបស់កងកម្លាំងរក្សាសន្តិភាពកម្ពុជាក្រោមឆ័ត្រអង្គការសហប្រជាជាតិនៅតាមបណ្តាប្រទេសដែលត្រូវបំពេញបេសកកម្ម តួយ៉ាងដូចជានៅសាធារណរដ្ឋម៉ាលីនេះជាដើម ដែលកន្លងមកនេះកងកម្លាំងរបស់យើងបានប្រើប្រាស់នូវសម្ភារអស់ទាំងនេះក្នុងការបំពេញភារកិច្ចប្រកបដោយជោគជ័យ ហើយក៏មានគ្រឿងចក្រ និងសម្ភារមួយចំនួនត្រូវខូចខាត ដែលទាមទារនូវការជួសជុល និងថែទាំងវាឡើងវិញជាចាំបាច់ ជាពិសេសនៅក្រោយពេលបញ្ជូនមកដល់កម្ពុជាវិញ។

ឯកឧត្តម ឧត្តមសេនីយ៍ទោ សែម រតនា បានលើកឡើងថា នៅក្នុងរយៈពេល១៩ឆ្នាំនេះ កម្ពុជាបានបញ្ជូនកម្លាំងទៅចូលរួមបេសកកម្មរក្សាសន្តិភាពរបស់អង្គការសហប្រជាជាតិនៅតំបន់អាហ្វ្រិក មជ្ឈិមបូព៌ា និងអឺរ៉ុប ក្នុងការរួមវិភាគទានដល់កិច្ចប្រឹងប្រែងរបស់សហគមន៍អន្តរជាតិ ដើម្បីបុព្វហេតុសន្តិភាព សន្តិសុខ និងមនុស្សធម៌នៅលើពិភពលោកទទួលបានជោគជ័យជាបន្តបន្ទាប់ និងបានទទួលការកោតសរសើរលើឆាកអន្តរជាតិដែលជាការបង្ហាញពីឆន្ទៈដ៏មោះមុតរបស់កម្ពុជា ដោយគិតចាប់ពីឆ្នាំ២០០៦ មកកម្ពុជាមានលទ្ធភាពបានក្លាយជាប្រទេស ដែលបញ្ជូនកងកម្លាំងរបស់ខ្លួនទៅចូលរួមក្នុងប្រតិបតិ្តការរក្សាសន្តិភាពរបស់អង្គការសហប្រជាជាតិ។

សូមបញ្ជាក់ថា បេសកកម្មរក្សាសន្តិភាពនៅសាធារណរដ្ឋម៉ាលី  កម្ពុជាបានបញ្ជូនកម្លាំងរក្សាសន្តិភាពមួកខៀវជាលើកដំបូងនៅដើមឆ្នាំ២០១៤ មានចំនួន២កងអនុសេនាធំ គឺកងកម្ទេចគ្រាប់ និងកងវិស្វកម្មព្រលានយន្តហោះចំនួនសរុប៣០៩នាក់ ឈរជើងនៅទីក្រុងគីដាល់ហ្គាវ និងតេសសាលីត ដែលបានបញ្ចប់បេកកម្មទាំងស្រុង និងបញ្ជូនកម្លាំងធ្វើមាតុភូមិនិវត្តន៍វិញកាលពីចុងឆ្នាំ២០២៣៕

ដោយ៖ ចាន់ សុភឿន