AKP បន្ទាយមានជ័យថ្ងៃទី៣០ខែមេសាឆ្នាំ២០២៥--លោកឧត្តមសេនីយ៍ទោ សិទ្ធិ ឡោះ ស្នងការ នគរបាលខេត្តបន្ទាយមានជ័យ បានដឹកនាំកិច្ចប្រជុំសំខាន់មួយជាមួយលោកស្រី រ៉ែឈល ប៊ល (Rachel Ball) នាយនគរបាលជាន់ខ្ពស់ នៃនគរបាលសហព័ន្ធអូស្ត្រាលី (AFP) ប្រចាំរាជធានីភ្នំពេញ នៅស្នងការដ្ឋាននគរបាលខេត្តបន្ទាយមានជ័យកាលពីរសៀលថ្ងៃអង្គារ ទី២៩ ខែមេសា ឆ្នាំ២០២៥ ។ កិច្ចប្រជុំនេះមានការចូលរួមពីលោកឧត្តមសេនីយ៍ស្នងការរង និងលោកនាយការិយាល័យអន្តោប្រវេសន៍ផងដែរ ដែលបង្ហាញពីសារៈសំខាន់នៃកិច្ចសហប្រតិបត្តិការអន្តរជាតិក្នុងការដោះស្រាយបញ្ហាឧក្រិដ្ឋកម្ម។

នៅក្នុងជំនួបដ៏សំខាន់នេះ ភាគីទាំងពីរបានផ្តោតការពិភាក្សាទៅលើការពង្រឹងកិច្ចសហប្រតិបត្តិការក្នុងវិស័យសន្តិសុខ និងសណ្តាប់ធ្នាប់សង្គម ជាពិសេសលើការបង្ក្រាបបទល្មើសឆ្លងដែន។ ប្រធានបទសំខាន់ៗដែលត្រូវបានលើកយកមកពិភាក្សារួមមានការបង្ក្រាបបទល្មើសឧក្រិដ្ឋជនឆ្លងដែនការចែករំលែកព័ត៌មាន និងការសម្របសម្រួលប្រតិបត្តិការដើម្បីទប់ស្កាត់ និងបង្ក្រាបសកម្មភាពឧក្រិដ្ឋកម្មដែលពាក់ព័ន្ធនឹងជនល្មើសឆ្លងកាត់ព្រំដែន។

បទល្មើសគ្រឿងញៀនការបង្កើនកិច្ចសហប្រតិបត្តិការក្នុងការប្រយុទ្ធប្រឆាំងនឹងការផលិត ការជួញដូរ និងការប្រើប្រាស់គ្រឿងញៀន ដែលជាបញ្ហាប្រឈមសកល។

បទល្មើសជួញដូរមនុស្សការពង្រឹងយន្តការដើម្បីទប់ស្កាត់ និងជួយសង្គ្រោះជនរងគ្រោះនៃការជួញដូរមនុស្ស ដែលជាឧក្រិដ្ឋកម្មធ្ងន់ធ្ងរ និងរំលោភសិទ្ធិមនុស្ស។

បទល្មើសពលករឆ្លងដែនខុសច្បាប់ ការដោះស្រាយបញ្ហាពាក់ព័ន្ធនឹងការធ្វើចំណាកស្រុកដោយខុសច្បាប់ និងការការពារសិទ្ធិរបស់ពលករចំណាកស្រុក។

បទល្មើសឧក្រិដ្ឋបច្ចេកវិទ្យា ការសហការគ្នាដើម្បីប្រយុទ្ធប្រឆាំងនឹងបទល្មើសតាមប្រព័ន្ធអនឡាញផ្សេងៗ ដែលកំពុងមានការកើនឡើង និងមានភាពស្មុគស្មាញ។

លោកឧត្តមសេនីយ៍ទោ សិទ្ធិ ឡោះ បានគូសបញ្ជាក់អំពីសារៈសំខាន់នៃកិច្ចសហប្រតិបត្តិការអន្តរជាតិក្នុងការដោះស្រាយបញ្ហាឧក្រិដ្ឋកម្មឆ្លងដែន ដែលមិនត្រឹមតែប៉ះពាល់ដល់ប្រទេសកម្ពុជាប៉ុណ្ណោះទេ ប៉ុន្តែក៏ជាបញ្ហាដែលប៉ះពាល់ដល់តំបន់ និងពិភពលោកផងដែរ។ លោកបានបង្ហាញនូវការប្តេជ្ញាចិត្តរបស់ស្នងការដ្ឋាននគរបាលខេត្តបន្ទាយមានជ័យ ក្នុងការសហការយ៉ាងជិតស្និទ្ធជាមួយនគរបាលសហព័ន្ធអូស្ត្រាលី និងស្ថាប័នអនុវត្តច្បាប់អន្តរជាតិផ្សេងទៀត ដើម្បីធានាបាននូវសន្តិសុខ និងសណ្តាប់ធ្នាប់នៅក្នុងខេត្ត និងរួមចំណែកដល់ការប្រយុទ្ធប្រឆាំងឧក្រិដ្ឋកម្មជាសកល។

ស្របពេលជាមួយគ្នានោះ លោកស្រី រ៉ែឈល ប៊ល បានថ្លែងអំណរគុណចំពោះការទទួលបដិសណ្ឋារកិច្ចដ៏កក់ក្តៅពីថ្នាក់ដឹកនាំនគរបាលខេត្តបន្ទាយមានជ័យ និងបានកោតសរសើរចំពោះកិច្ចខិតខំប្រឹងប្រែងរបស់នគរបាលខេត្តក្នុងការថែរក្សាសន្តិសុខ និងសណ្តាប់ធ្នាប់។ លោកស្រីបានស្នើសុំឱ្យថ្នាក់ដឹកនាំនគរបាលខេត្តបន្ទាយមានជ័យ ជួយសម្រួលដល់កិច្ចសហប្រតិបត្តិការដ៏ល្អដែលមានស្រាប់ ដើម្បីឱ្យការទប់ស្កាត់ និងបង្ក្រាបបទល្មើសផ្សេងៗ កាន់តែមានប្រសិទ្ធភាពខ្ពស់។

ជំនួបសំណេះសំណាល និងពិភាក្សាការងារនេះ បានបង្ហាញពីឆន្ទៈរួមគ្នាក្នុងការពង្រឹងទំនាក់ទំនង និងកិច្ចសហប្រតិបត្តិការរវាងស្នងការដ្ឋាននគរបាលខេត្តបន្ទាយមានជ័យ និងនគរបាលសហព័ន្ធអូស្ត្រាលី ក្នុងការប្រយុទ្ធប្រឆាំងនឹងឧក្រិដ្ឋកម្មឆ្លងដែនគ្រប់ប្រភេទ ដើម្បីធានាបាននូវសន្តិសុខ សុវត្ថិភាព និងភាពសុខសាន្តសម្រាប់ប្រជាជនទាំងសងខាង។ នេះគឺជាជំហានដ៏សំខាន់មួយក្នុងការលើកកម្ពស់កិច្ចសហប្រតិបត្តិការអន្តរជាតិក្នុងការអនុវត្តច្បាប់ និងការដោះស្រាយបញ្ហាឧក្រិដ្ឋកម្មជាសកល៕

ដោយ ៖ឈុនសារ៉ាត