AKP តាកែវ ថ្ងៃទី២៩ ខែមេសា ឆ្នាំ២០២៥--សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជាបានគូសបញ្ជាក់ថា យើងធ្វើពាណិជ្ជកម្មគ្រប់ប្រទេសទាំងអស់ យើងធ្វើការងារលើគ្រប់បណ្ដាញ យើងនាំចេញគ្រប់ទំនិញទាំងអស់ យើងមិនពឹងផ្អែកទៅលើទេសចរណ៍ យើងមិនពឹងផ្អែកទៅលើតែឧស្សាហកម្ម ហើយយើងក៏មិនពឹងផ្អែកទៅលើកសិកម្មនោះទេ ដើម្បីពង្រាយសក្ដានុពលឱ្យបានគ្រប់វិស័យ។ ការគូសបញ្ជាក់របស់សម្ដេចធិបតីនាយករដ្ឋមន្រ្ដីបែននេះ ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវផ្លូវជាតិចំនួន៣ខ្សែ រួមមាន ផ្លូវជាតិលេខ៣១ ផ្លូវជាតិលេខ៣៣ និងផ្លូវជាតិលេខ៤១ ដែលមានប្រវែងសរុបជាង២០០គីឡូម៉ែត្រ ស្ថាបនាឡើងក្រោមឥណទានសម្បទានពីរដ្ឋាភិបាលនៃសាធារណរដ្ឋប្រជាមានិតចិន ស្ថិតនៅក្នុងស្រុកត្រាំកក់  ខេត្តតាកែវ នាព្រឹកថ្ងៃទី២៩ ខែមេសា ឆ្នាំ២០២៥។

សម្ដេចធិបតី ហ៊ុន ម៉ាណែត បានលើកឡើងថា៖ «យើងត្រូវពង្រាយសក្ដានុពល និងទាញយកសក្ដានុពលរបស់ប្រទេសរបស់យើង ដើម្បីឱ្យបានគ្រប់វិស័យ ហើយបង្កើតការងារឱ្យបានគ្រប់ច្រកល្ហកជូនប្រជាពលរដ្ឋរបស់យើង ទាំងទីផ្សារក្នុងស្រុក ទាំងទីផ្សារក្រៅស្រុក បន្ដធ្វើយ៉ាងណាឱ្យប្រទេសរបស់យើងដើរទៅមុខទៀត»។

ជាមួយគ្នានេះដែរ សម្ដេចធិបតីនាយករដ្ឋមន្រ្ដីក៏បានអំពាវនាវដល់ប្រជាពលរដ្ឋជឿជាក់លើរាជរដ្ឋាភិបាល ដោយរាជរដ្ឋាភិបាលមិនរត់ចោលបងប្អូនទេ ហើយយើងនៅខាំស្មៅជាមួយគ្នា ដោយគិតគូរពិចារណា និងផ្ដល់ផលប្រយោជន៍ជូនប្រជាពលរដ្ឋ។ សម្ដេចធិបតីបានបន្ថែមថា រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ នឹងប្រកាសវិធានការ ដើម្បីទប់ស្កាត់ការឆ្លៀតឱកាសនាំចេញ និងវិធានការផ្សេងៗទៀត ដើម្បីបង្ហាញឆន្ទៈរបស់រាជរដ្ឋាភិបាលក្នុងការពង្រឹងការអនុវត្ដ៕

ដោយ៖ រិទ្ធី