AKPកំពង់ធំថ្ងៃទី២៩ខែមេសា ឆ្នាំ២០២៥--ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករងកំពង់ធំអមដំណើរ​ដោយ​លោក​សុទ្ធ​ ម៉ារី​ អភិបាល​រង​ស្រុក​បបារាយណ៍កាលពីរសៀលថ្ងៃទី២៨ខែមេសាឆ្នាំ២០២៥បានដឹកនាំកងកម្លាំង នាំយកអំណោយមនុស្សធម៌របស់សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នីឧបត្ថម្ភជូនប្រជាពលរដ្ឋ ដែលរងគ្រោះដោយខ្យល់កន្ត្រាក់ខូចខាតផ្ទះទាំងស្រុងចំនួន៥ខ្នងនិងជួយដោះស្រាយការលំបាកជូនប្រជាពលរដ្ឋក្រីក្រចំនួន៥គ្រួសារផ្សេងទៀត​ នៅភូមិគូរនិង​ភូមិ​សសំរោងឃុំចុងដូងស្រុកបារាយណ៍ខេត្តកំពង់ធំ ។

ឧត្តមសេនីយ៍ទោ សោម ស៊ុន បានមានប្រសាសន៍បញ្ជាក់ថាកាលពីថ្ងៃទី២៥ ខែមេសា ឆ្នាំ២០២៥ មានគ្រោះមហន្តរាយខ្យល់កន្ត្រាក់ ធ្វើឱ្យខូចខាតផ្ទះសម្បែងប្រជាពលរដ្ឋនៅក្នុងឃុំចុងដូងទាំងមូលចំនួន៦៣​ ខ្នងដែលមាន​ប្រជាពលរដ្ឋរងផលប៉ះពាល់ចំនួន៦៣គ្រួសារលេីភូមិចំនួន០៥ក្នុងនោះនៅភូមិគូរនិង​ភូមិ​សសំរោងត្រូវបានខ្យល់កន្ត្រាក់ធ្វើឱ្យខូចខាតរលំផ្ទះប្រជាពលរដ្ឋទាំងស្រុងចំនួន៥ខ្នង ហើយបច្ចុប្បន្នប្រជាពលរដ្ឋកំពុងជួបការលំបាកក្នុងការស្នាក់នៅនិងការដោះស្រាយជីវភាពក្នុងគ្រួសារ។ 

ដោយឃើញពីការលំបាកនេះ ឧត្តមសេនីយ៍ទោ សោម ស៊ុន បាននាំយកស័ង្កសី និងស្បៀងអាហារគ្រឿងឧបភោគបរិភោគដែលជាអំណោយដ៏ថ្លៃថ្លារបស់សម្ដេចមហាបវរធិបតីហ៊ុន ម៉ាណែតនាយករដ្ឋមន្ត្រីនៃព្រះរាជាណាចក្រកម្ពុជាឧបត្ថម្ភជូនប្រជាពលរដ្ឋដែលរងគ្រោះដោយខ្យល់កន្ត្រាក់ចំនួន៥គ្រួសារនិងឧបត្ថម្ភជូនប្រជាពលរដ្ឋ ដែលជួបការលំបាកក្នុងជីវភាពរស់នៅប្រចាំថ្ងៃចំនួន ៥គ្រួសារផ្សេងទៀតដោយក្នុងមួយគ្រួសារទទួលបានអង្ករចំនួន ២៥ គីឡូក្រាម មីជាតិចំនួន១កេស ទឹកត្រីទឹកស៊ីអ៊ីវចំនួន២យួរនិងត្រីខកំប៉ុងចំនួន១យួរ ដោយ​ឡែក​ប្រជាពលរដ្ឋ​ដែល​រងគ្រោះ​រលំ​ផ្ទះ​ទាំង​ស្រុង​ ចំនួន០៣គ្រួសារ​ទទួល​បាន​ស័ង្កសី​ចំនួន​១០០​ សន្លឹក​ ព្រមទាំងបានចាត់តាំងកងកម្លាំងជួយរុះរើនិងរៀបចំ ផ្ទះសម្បែងជូនពួកគាត់ផងដែរ។

លោក​កែវ​ អូក​ មេឃុំ​ចុង​ដូង​តតំណាងឱ្យប្រជាពលរដ្ឋដែលរងគ្រោះដោយគ្រោះមហន្តរាយខ្យល់កន្ត្រាក់ នៅភូមិគូរ និង​ភូមិ​សំរោង​ ឃុំចុងដូង ស្រុកបារាយណ៍ខេត្តកំពង់ធំបានសូមគោរពថ្លែងអំណរគុណដ៏ជ្រាលជ្រៅជាទីបំផុតចំពោះសម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ព្រមទាំងឧត្តមសេនីយ៍ទោ សោម ស៊ុន និងសហការី ដែលបាននាំយកស័ង្កសី ស្បៀងអាហារគ្រឿងឧបភោគបរិភោគនិងជួយរុះរើការបែកបាក់ផ្ទះសម្បែងរបស់ពួកគាត់នៅពេលនេះនិងសូមគោរពជូនពរសម្ដេចនិងលោកជំទាវព្រមទាំងកងកម្លាំងនៃបញ្ជាការដ្ឋានតំបន់ប្រតិបត្តិការសឹករងកំពង់ធំសូមទទួលបាននូវពុទ្ធពរទាំង៤ប្រការកុំបីឃ្លៀងឃ្លាតឡើយ៕

ដោយ៖ ស៊ុម វណ្ណា, ប្រភព៖តំបន់សឹករងកំពង់ធំ