AKP ថ្ងៃទី២៩ ខែមេសា ឆ្នាំ២០២៥--ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា នាថ្ងៃទី២៨ ខែមេសា ឆ្នាំ២០២៥ បានជួបប្រជុំជាមួយប្រតិភូធនាគារពិភពលោក ដឹកនាំដោយលោកស្រី Tania Meyer តំណាងធនាគារពិភពលោកប្រចាំប្រទេសកម្ពុជា សម្រាប់បេសកកម្មគាំទ្រការអនុវត្តគម្រោងកែលម្អការអប់រំចំណេះទូទៅរបស់ធនាគារពិភពលោក លើកទី៦ ដោយក្នុងកិច្ចប្រជុំនេះលោកស្រី Tania Meyer បានកោតសរសើរដល់ក្រុមការងារក្រសួងអប់រំ យុវជន និងកីឡា ចំពោះកិច្ចសហប្រតិបត្តិការដ៏ល្អប្រសើរនាពេលកន្លងមក ជាពិសេសសម្រាប់គម្រោងកែលម្អការអប់រំចំណេះទូទៅនេះផ្ទាល់តែម្តង និងបានលើកឡើងពីគោលបំណងសំខាន់នៃបេសកកម្មគាំទ្រការអនុវត្តលើកទី៦នេះ គឺដើម្បីវាយតម្លៃវឌ្ឍនភាពដែលបានសម្រេចចាប់តាំងពីបេសកកម្មចុងក្រោយក្នុងខែវិច្ឆិកា ឆ្នាំ២០២៤ ក៏ដូចជាតាមដានការអនុវត្តសកម្មភាពដែលបានឯកភាពគ្នា និងពិនិត្យមើលផែនការសកម្មភាពគម្រោង ការគ្រប់គ្រងគម្រោង និងការការពារបរិស្ថាន និងសង្គម ជាពិសេសពិនិត្យមើលវឌ្ឍនភាពនៃសកម្មភាពនានាដែលទាក់ទងនឹងលក្ខខណ្ឌផ្អែកលើលទ្ធផល  និងពិភាក្សាអំពីបញ្ហាប្រឈមសំខាន់ៗក្នុងការអនុវត្ត ដើម្បីកំណត់រួមគ្នានូវសកម្មភាពឆ្ពោះទៅការអនុវត្តគម្រោងប្រកបដោយប្រសិទ្ធភាព។ 

ជាកិច្ចឆ្លើយតប ឯកឧត្តមបណ្ឌិតសភាចារ្យ ហង់ជួន ណារ៉ុន បានថ្លែងអំណរគុណយ៉ាងជ្រាលជ្រៅដល់ធនាគារពិភពលោក និងភាគីពាក់ព័ន្ធនានា ដែលបានចូលរួមគាំទ្រយ៉ាងសកម្មទាំងផ្នែកបច្ចេកទេស និងហិរញ្ញវត្ថុ ក្នុងការអនុវត្តគម្រោងកែលម្អការអប់រំចំណេះទូទៅនេះប្រកបដោយប្រសិទ្ធភាពនាពេលកន្លងមក និងបានផ្តល់អនុសាសន៍មួយចំនួនពាក់ព័ន្ធនឹងការកែលម្អគុណភាពអប់រំ ដែលទាមទារឱ្យមានការយកចិត្តទុកដាក់លើសមាសធាតុសំខាន់ៗជាច្រើន ដោយត្រូវចាប់ផ្ដើមពីការជំរុញទឹកចិត្តសាលារៀននានាឱ្យចាត់វិធានការកែលម្អសាលារៀនរបស់ខ្លួនផ្ទាល់ ជាពិសេសលើកទឹកចិត្តឱ្យធ្វើការអនុវត្តស្ដង់ដាសាលារៀនគំរូឱ្យកាន់តែច្រើនថែមទៀត។ ការអភិវឌ្ឍសមត្ថភាពសិស្សដោយប្រើប្រាស់លទ្ធផលតេស្ត (SEA-PLM និង PISA) ជាគោលក្នុងការវាយតម្លៃ និងអភិវឌ្ឍន៍សមត្ថភាពគ្រូក្នុងការបង្រៀនឱ្យឆ្លើយតបលើចក្ខុវិស័យនេះ។ ត្រូវប្រើប្រាស់វិធីសាស្រ្តបង្រៀនថ្មីៗ ដូចជាការលើកទឹកចិត្តសិស្សឱ្យចេះចោទសួរសំណួរដើម្បីជំរុញការគិត ចេះសង្ខេបមេរៀន និងគំនិតសំខាន់ៗ ដើម្បីអភិវឌ្ឍន៍សមត្ថភាពគិតកម្រិតខ្ពស់ អាចទាញសេចក្តីសន្និដ្ឋាន ឬអភិវឌ្ឍន៍សមត្ថភាពវិភាគដោយខ្លួនឯងបាន។ សៀវភៅគោលសិក្សាថ្មី គួរតែត្រូវបានរៀបចំឱ្យស្របទៅនឹងវិធីសាស្រ្តបង្រៀនថ្មីៗទាំងនេះ ដើម្បីឱ្យគ្រូបង្រៀនងាយស្រួលក្នុងការអនុវត្ត។ ក្រៅពីនេះក៏ត្រូវលើកទឹកចិត្តឱ្យមានការជជែកពិភាក្សា និងស្រាវជ្រាវឱ្យបានច្រើន ជាពិសេសការសិក្សាដោយខ្លួនឯងផងដែរ។ ត្រូវពិនិត្យមើលសាលារៀនដែលបានខិតខំប្រឹងប្រែងកែលម្អសាលា និងហេដ្ឋារចនាសម្ព័ន្ធ ដើម្បីជួយគាំទ្រ និងអភិវឌ្ឍន៍បន្ត៕

ដោយ៖ ចាន់ សុភឿន (ប្រភព៖ ក្រសួងអប់រំ)