AKP ភ្នំពេញ ថ្ងៃទី២៩ ខែមេសា ឆ្នាំ២០២៥--សហគមន៍កសិកម្ម«តាសីសាមគ្គី» នៅស្រុកថ្មគោល ខេត្តបាត់ដំបង ទទួលបានការចុះកិច្ចព្រមព្រៀងហិរញ្ញប្បទានឥតសំណងពីគម្រោងពិពិធកម្មកសិកម្មកម្ពុជា(CASDP) ក្នុងតម្លៃជាទឹកប្រាក់ទំហំជិត ១,៨៩លានដុល្លារ សម្រាប់ជាទុនបំពេញបន្ថែមលើការវិនិយោគផ្ទះសំណាញ់ចំនួន ២២៥ខ្នង ផ្លូវលំជនបទ ៧,៥គីឡូម៉ែត្រ ប្រព័ន្ធស្រោចស្រព និងឧបករណ៍សម្ភារៈជាច្រើនទៀត។

ឯកឧត្តម ឃឹម ហ្វីណង់ អនុរដ្ឋលេខាធិការ ក្រសួងកសិកម្មរុក្ខាប្រមាញ់ និងនេសាទ បានឱ្យដឹងនៅថ្ងៃទី២៨ ខែមេសា ឆ្នាំ២០២៥ថានេះគឺជាការវិនិយោគសាធារណៈក្នុងទ្រង់ទ្រាយធំមួយពីសំណាក់រាជរដ្ឋាភិបាល ចាក់បញ្ចូលទៅក្នុងការអភិវឌ្ឍសេដ្ឋកិច្ចនៃសហគមន៍មូលដ្ឋាន នៅលើទីតាំងដែលសក្តានុពលសម្រាប់វិស័យកសិកម្ម។ ឯកឧត្តម ជឿជាក់ថា បងប្អូនកសិករជាច្រើនគ្រួសារទៀតនៅក្នុងតំបន់នេះ នឹងទទួលបានផលប្រយោជន៍ដោយផ្ទាល់ផង និងដោយប្រយោលផង ពីការវិនិយោគដ៏មានអត្ថន័យមួយនេះ។

សហគមន៍កសិកម្មតាសីសាមគ្គី គឺជាសហគមន៍កសិកម្មដំបូងគេបង្អស់ដែលបានបំប្លែងគំរូអាជីវកម្មរបស់ពួកគាត់ដើម្បីធ្វើការផ្គត់ផ្គង់ផ្ទះសំណាញ់ជូនដល់កសិករ និងសមាជិក ដោយពួកគេមានបទពិសោធន៍ក្នុងការសាងសង់ជាង ១ ០០០ ខ្នង។ 

សព្វថ្ងៃ សហគមន៍កំពុងធ្វើការជាមួយកសិករជាង ២៧២ គ្រួសារ និងបានប្រើប្រាស់ផ្ទះសំណាញ់ដើម្បីដាំបន្លែសុវត្ថិភាពនាំចេញទៅកាន់ខេត្តជិតខាង និងទីក្រុងភ្នំពេញជាង ២ ទៅ ២,៥ តោនក្នុងមួយថ្ងៃៗ ៕

ដោយ៖ ណយ នឿន