AKP ភ្នំពេញ ថ្ងៃទី២៨ ខែមេសា ឆ្នាំ២០២៥ -- នាយកដ្ឋានតម្រង់ទិសវិជ្ជាជីវៈ ក្រោមការអនុវត្តគម្រោងបរិវត្តកម្មការអប់រំបច្ចេកទេស គាំទ្រដោយ European Union in Cambodia ចាប់ពីថ្ងៃទី២៧ ដល់ថ្ងៃទី២៩ ខែមេសា ឆ្នាំ២០២៥ បានរៀបចំសិក្ខាសាលាស្ដីពី «ការអភិវឌ្ឍកម្មវិធីសិក្សាដោយរួមបញ្ចូលកម្មវិធីអប់រំបៃតង និងឌីជីថល និងការរៀបចំរចនាសម្ព័ន្ធកម្មវិធីបណ្ដុះបណ្ដាលគ្រូអប់រំបច្ចេកទេស» នៅវិទ្យាល័យអង្គរ ខេត្តសៀមរាប ។

សិក្ខាសាលានេះមានគោលបំណងសំខាន់ចំនួន៦ គឺ៖ ទី១. អភិវឌ្ឍកម្មវិធីសិក្សាផ្នែកអប់រំបច្ចេកទេសឆ្នាំទី២ និងទី៣ លេីជំនាញអគ្គិសនី អេឡិចត្រូនិក មេកានិក កុំព្យូទ័រ និងជំនាញកែច្នៃអាហារ ដើម្បីឱ្យសមស្របទៅនឹងតម្រូវការទីផ្សារការងារនាពេលបច្ចុប្បន្ន។ ទី២. អភិវឌ្ឍកម្មវិធីសិក្សាផ្នែកអប់រំបច្ចេកទេសដែលបញ្ចូលការអប់រំបៃតងនិងអប់រំឌីជីថល ដើម្បីដាក់ឱ្យដំណើរការការបណ្តុះបណ្តាលនៅកម្រិតមធ្យមសិក្សាអប់រំបច្ចេកទេស ក្នុងគោលបំណងជួយសិស្សឱ្យទទួលបានជំនាញដោយប្រកាន់ខ្ជាប់ក្នុងលក្ខខណ្ឌជួយថែទាំបរិស្ថាន កែច្នៃប្រើប្រាស់ឡើងវិញ ដោយសន្សំសំចៃ និងដើម្បីបម្រើជីវភាពរស់នៅប្រចាំថ្ងៃ ផ្សារភ្ជាប់ជាមួយចំណង់ចំណូលចិត្ត ទេពកោសល្យរបស់ខ្លួន ស្របតាមតម្រូវការទីផ្សារការងារជាក់ស្តែងនៅក្នុងសហគមន៍ ធានានូវប្រសិទ្ធភាព គុណភាពនៃការបណ្តុះបណ្តាលជំនាញ និងជួយគាំទ្របន្តការសិក្សាផងដែរ។ ទី៣. រៀបចំឱ្យយុវជនដែលជាសមាជិកសកម្មនៃសេដ្ឋកិច្ចបៃតង បង្កើនបាននូវសុខុមាលភាព យុត្តិធម៌សង្គម កាត់បន្ថយហានិភ័យបរិស្ថាន និងកង្វះអេកូឡូស៊ី។ ទី៤. តម្រង់ទិសលើកម្មវិធីសិក្សាអប់រំបច្ចេកទេសដែលមានស្រាប់ និងអភិវឌ្ឍន៍ប្រកបដោយនិរន្តរភាព។ ទី៥. ពង្រឹងនិងពង្រីកការបណ្ដុះបណ្ដាលអប់រំផ្នែកបច្ចេកទេស និងទី៦. រៀបចំរចនាសម្ព័ន្ធកម្មវិធីបណ្ដុះបណ្ដាលគ្រូអប់រំបច្ចេកទេស ដែលមានលក្ខណៈពេញលេញ ក្នុងការបណ្តុះបណ្តាលគ្រូ ផ្នែកអប់រំបច្ចេកទេសនៅតាមវិទ្យាល័យចំណេះទូទៅនិងបច្ចេកទេស ពាក់ព័ន្ធទៅនឹងការអភិវឌ្ឍជំនាញស្នូល ជំនាញទន់ វិធីសាស្ត្របង្រៀន ការសិក្សាស្រាវជ្រាវនិងនវានុវត្តន៍ និងស្តង់ដាសុវត្ថិភាព និងការទទួលស្គាល់ ។

សិក្ខាសាលានេះត្រូវបានប្រារព្ធកម្មវិធីបើកក្រោមអធិបតីភាព ឯកឧត្តមបណ្ឌិត ហុង គឹមជាង អនុរដ្ឋលេខាធិការ ក្រសួងអប់រំ យុវជន និងកីឡា ដោយមានការចូលរួមពីសំណាក់ក្រុមការងារពីនាយកដ្ឋានជំនាញ សាស្ត្រាចារ្យនៃវិទ្យាស្ថានបច្ចេកវិទ្យាកម្ពុជា វិទ្យាស្ថានជាតិអប់រំ សាកលវិទ្យាល័យភូមិន្ទភ្នំពេញ វិទ្យាស្ថានបច្ចេកវិទ្យាកំពង់ស្ពឺ វិទ្យាស្ថានបច្ចេកវិទ្យាកំពង់ឈើទាល និងក្រុមការងារបច្ចេកទេសនៃគម្រោង Twinning សរុប ៨០ នាក់ ស្រី ២៣នាក់៕

ដោយ ណយ នឿន (ប្រភព៖ នាយកដ្ឋានតម្រង់ទិសវិជ្ជាជីវៈ)