AKP ភ្នំពេញ ថ្ងៃទី២៨ ខែមេសា ឆ្នាំ២០២៥-- នៅសាលប្រជុំធំនៃទីស្ដីការរដ្ឋលេខាធិការដ្ឋានកិច្ចការព្រំដែន ឯកឧត្ដម ឡាំ ជា រដ្ឋមន្រ្ដីទទួលបន្ទុករដ្ឋលេខាធិការដ្ឋានកិច្ចការព្រំដែន នាព្រឹកថ្ងៃទី២៨ ខែមេសា ឆ្នាំ២០២៥ បានអញ្ជើញដឹកនាំកិច្ចប្រជុំពិភាក្សា និងប្រមូលធាតុចូលបន្ថែមសម្រាប់ចូលរួមកិច្ចប្រជុំពេញអង្គនៃគណៈកម្មាធិការព្រំដែនទូទៅកម្ពុជា-ថៃ ថៃ-កម្ពុជា(GBC) លើកទី១៧ នៅរាជធានីបាងកក ប្រទេសថៃ ដោយមានការអញ្ជើញចូលរួមពីសំណាក់ឯកឧត្ដមរដ្ឋលេខាធិការប្រចាំការ ឯកឧត្តមរដ្ឋលេខាធិការ ឯកឧត្តមអនុរដ្ឋលេខាធិការ និងមន្ត្រីបច្ចេកទេសព្រំដែនកម្ពុជា-ថៃ។

ក្នុងឱកាសនៃកិច្ចប្រជុំនេះ ឯកឧត្តមរដ្ឋមន្រ្តី បានអនុញ្ញាតឱ្យមន្រ្តីបច្ចេកទេសព្រំដែនកម្ពុជា-ថៃ ធ្វើសេចក្តីរាយការណ៍អំពីវឌ្ឍនភាពការងារព្រំដែនកម្ពុជា-ថៃ និង សមាជិក សមាជិកា អង្គប្រជុំមានមតិយោបល់ ព្រមទាំងបានពិនិត្យឯកសារពាក់ព័ន្ធសម្រាប់ចូលរួមក្នុងកិច្ចប្រជុំពេញអង្គនៃគណៈកម្មាធិការព្រំដែនទូទៅ កម្ពុជា-ថៃ ថៃ-កម្ពុជា(GBC) លើកទី១៧ ដែលគណៈប្រតិភូកម្ពុជានឹងត្រូវអញ្ជើញដឹកនាំដោយ ឯកឧត្ដម នាយឧត្ដមសេនីយ៍ ទៀ សីហា ឧបនាយករដ្ឋមន្រ្ដី រដ្ឋមន្រ្ដីក្រសួងការពារជាតិ និងជាប្រធានគណៈកម្មាធិការព្រំដែនទូទៅ កម្ពុជា-ថៃ (GBC)។

ទន្ទឹមនឹងនេះ ឯកឧត្តមរដ្ឋមន្ត្រីបានជូនពរថ្នាក់ដឹកនាំ និងមន្ត្រីបច្ចេកទេសទាំងអស់សូមមានសុខភាពល្អបរិបូរណ៍ សម្រេចបានជោគជ័យគ្រប់ភារកិច្ចការងារ និងសូមប្រសិទ្ធពរជ័យជូនដល់ឯកឧត្តម លោក លោកស្រីទាំងអស់ សូមជួបប្រទះតែនឹងពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ៕

ដោយ៖ ពេជ្រ សំអឿន (ប្រភព៖ រដ្ឋលេខាធិការដ្ឋានកិច្ចការព្រំដែន)