AKP ព្រះសីហនុ ថ្ងៃទី២៨ ខែមេសា ឆ្នាំ២០២៥-- ឯកឧត្តម ម៉ាង ស៊ីណេត អភិបាលនៃគណ:អភិបាលខេត្តព្រះសីហនុ បានអញ្ជើញទទួលស្វាគមន៍ និងសហការជាមួយមេបញ្ជាការ និងនាវិកនាវាកងទ័ពជើងទឹករុស្ស៊ី ដែលបានចូលចតបំពេញទស្សនកិច្ចផ្លូវការនៅលើទឹកដីតំបន់ឆ្នេរដ៏ស្រស់បំព្រងនៃខេត្តព្រះសីហនុ នាព្រឹកថ្ងៃចន្ទ ទី២៨ ខែមេសា ឆ្នាំ២០២៥។

ឯកឧត្តមអភិបាលខេត្តព្រះសីហនុក៏បានជម្រាបជូនពីស្ថានភាពភូមិសាស្ត្រ និងវិទ្យាសាស្ត្ររបស់ខេត្តព្រះសីហនុ ស្ថិតនៅប៉ែកនិរតីនៃប្រទេសកម្ពុជា ជាខេត្តមួយមានសក្តានុពលខ្ពស់សម្បូរទៅដោយធនធានធម្មជាតិដ៏សម្បូរបែប ខេត្តព្រះសីហនុ ចែកចេញជា ៣ក្រុង ៣ស្រុក ស្មើនឹង ១៨ឃុំ និង ១១សង្កាត់ ស្មើនឹង ១១១ភូមិ។ ខេត្តមានកោះធំ-តូចចំនួន ៣២ និងមានឆ្នេរសមុទ្រប្រវែង ១៧៥,៨១គីឡូម៉ែត្រ មានប្រជាជនប្រមាណ ៣១ម៉ឺននាក់។ ខេត្តព្រះសីហនុមានឆ្នេរសមុទ្រស្រស់ស្អាត ដែលរាជរដ្ឋាភិបាលបានដាក់ឈ្មោះ ជា " តារារះនាទិសនិរតី" និងជាខេត្តស្នូលនៃខេត្តឆ្នេររបស់ប្រទេសកម្ពុជា។ ម្យ៉ាងទៀតឆ្នេរសមុទ្រកម្ពុជាត្រូវបានដាក់បញ្ជូលជាសមាជិកក្លឹបឆ្នេរស្អាតជាងគេលើសកលលោកកាលពីឆ្នាំ២០១១។ ទន្ទឹមនោះខេត្តព្រះសីហនុ មានផ្លូវគមនាគមន៍មានដូចជាផ្លូវគោក មានផ្លូវជាតិ ផ្លូវល្បឿនលឿន និងផ្លូវរថភ្លើង។ ផ្លូវអាកាសមានអាកាសយានដ្ឋានអន្តរជាតិខេត្តព្រះសីហនុ មានផ្លូវរត់ប្រវែង ៣ ៣០០ម៉ែត្រ ជាប្រភេទ 4E។ ផ្លូវទឹកមានកំពង់ផែស្វយ័តក្រុងព្រះសីហនុដែលមានទំនិញនាំចេញចូលឆ្លងកាត់មានប្រមាណ ៧០ភាគរយ បច្ចុប្បន្នកំពង់ផែស្វយ័តក្រុងព្រះសីហនុ ស្ថិតនៅក្នុងតំណាក់កាលកំពុងអភិវឌ្ឍ ហើយនៅឆ្នាំ២០២៩ និងមានជម្រៅទឹក ១៧.៥០ម៉ែត្រ អាចឪ្យនាវាដែលធ្វើចរាចរន៍នៅលើពិភពលោក អាចចូលចតបាន។  វិស័យដែលមានសក្តានុពលដែលរួមចំណែកក្នុងការអភិវឌ្ឍសេដ្ឋកិច្ចជាតិរួមមាន វិស័យសំណង់ អចលនទ្រព្យ ឧស្សាហកម្ម ពាណិជ្ជកម្ម ទេសចរណ៍ កសិឧស្សាហកម្ម។ លើសពីនេះ រាជរដ្ឋាភិបាលកម្ពុជាបានជ្រើសរើសខេត្តព្រះ សីហនុ ជា “តំបន់សេដ្ឋកិច្ចពិសេសគំរូពហុបំណង” សំដៅប្រែក្លាយខេត្តព្រះសីហនុ ជាច្រកចេញចូលអន្តរជាតិ មជ្ឈមណ្ឌលភស្តុភារកម្មជាតិមានទំនាក់ទំនងជាមួយទីផ្សារអាស៊ាន និងសកលលោក និងជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើបមានសុខដុមនីយកម្មជាមួយនឹងការថែរក្សាបរិស្ថាន។

ឯកឧត្តមបានបញ្ជាក់បន្ថែមទៀតថា ទំនាក់ទំនងការទូតរវាងប្រទេសកម្ពុជា និងប្រទេសរុស្ស៊ី បានបង្កើតឡើងជាផ្លូវការ ៦៩ឆ្នាំ។ ប្រទេសរុស្ស៊ីតែងផ្តល់ការគាំទ្រដល់ប្រទេសកម្ពុជា តាំងពីអតីតកាលមកដល់បច្ចុប្បន្ន និងមានការផ្លាស់ប្តូរសេដ្ឋកិច្ច ពាណិជ្ជកម្ម វិនិយោគ វប្បធម៌ ទេសចរណ៍ អប់រំជាដើម។ យើងគាំទ្រនូវកិច្ចសហការរវាងប្រទេសទាំងពីរ និងសូមឱ្យដំណើរបេសកកម្មរបស់នាវិកនៅលើទឹកដីនៃខេត្តតំបន់ឆ្នេរនៃព្រះរាជាណាចក្រកម្ពុជា ទទួលបានជោគជ័យគ្រប់ភារកិច្ច ដោយសង្ឃឹមថា នាវិកទាំងអស់នឹងផ្តិតយកនូវអនុស្សាវរីយ៍ល្អៗរបស់ខេត្តព្រះសីហនុ។

ក្នុងឱកាសនោះ លោក វរនាវីឯក អេឡិកស៊ី  អេនស៊ីហ្វើរ៉ូវ (Aleksi Antsiferov) ប្រធានក្រុម បញ្ជាការនាវា និងជានាយសេនាធិការកងនាវាប៉ាស៊ីហ្វិកនៃសហព័ន្ធរុស្ស៊ី បានថ្លែងអំណរគុណសម្រាប់ការធ្វើបទបង្ហាញអំពីសក្តានុពលរបស់ខេត្តព្រះសីហនុ ដោយបានលើកឡើងថាយើងខ្ញុំមានសេចក្តីរំភើបសប្បាយរីករាយដោយឃើញពីសេដ្ឋកិច្ចរបស់ខេត្តព្រះសីហនុ មានការរីកចម្រើនលូតលាស់ជាបន្តបន្ទាប់ និងសូមចូលរួមអបអរសាទរការអភិវឌ្ឍ និងកិច្ចសហប្រតិបត្តិការវាងប្រទេសទាំងពីរ និងជាខួបលើកទី ៦៩ឆ្នាំនៃទំនាក់ទំនង កិច្ចសហប្រតិបត្តិការរវាងប្រទេសយើងទាំងពីរ។ យើងខ្ញុំសង្ឃឹមយ៉ាងមុតមាំថា ការចូលចតរបស់នាវាកងទ័ពជើងទឹករុស្ស៊ីនៅលើទឹកដីនៃព្រះរាជាណាចក្រកម្ពុជានាពេលនេះនឹងពង្រឹងពង្រីកចំណងមិត្តភាព សាមគ្កីភាព កិច្ចសហប្រតិបត្តិការកាន់តែរឹងមាំ និងសូមយកឱកាសនេះថ្លែងអំណរគុណជំនួសនាវិករបស់នាវាកងទ័ពជើងទឹករុស្ស៊ីដែលបានចូលសំចតធ្វើទស្សនកិច្ចនៅកម្ពុជា ហើយនេះគឺជាការចូលចតលើកទី៣ដែលរូបខ្ញុំបានមកកាន់កម្ពុជា។ ក្នុងដំណើរទស្សនកិច្ចលើកនេះ នាវិករបស់យើងខ្ញុំកាន់តែស្វែងយល់កាន់តែច្បាប់អំពីវប្បធម៌ ទំនៀមទម្លាប់ប្រពៃណីរវាងប្រទេសទាំងពីរ ប្រជាជននៃប្រទេសទាំងពីរ ហើយយើងមានការបេជ្ញាចិត្តខ្ពស់ក្នុងការពង្រឹង និងពង្រីកកិច្ចសហប្រតិបត្តិការលើវិស័យយោធានៃប្រទេសទាំងពីរកាន់តែស៊ីជម្រៅបន្ថែមទៀត៕

ដោយ ងូ សុមុនី