AKP ភ្នំពេញ ថ្ងៃទី២៨ ខែមេសា ឆ្នាំ២០២៥--មន្រ្តីជាន់ខ្ពស់ក្រសួងអប់រំ យុវជន និងកីឡា និងក្រសួងវប្បធម៌ និងវិចិត្រសិល្បៈបានជួបជជែកពិភាក្សាគ្នាលើរឿងនាំយកទស្សនីយភាពសិល្បៈខ្មែរទៅសម្តែង ក្នុងពិធីទទួលទង់បន្តវេនរៀបចំការប្រកួតកីឡាយុវជនអាស៊ីពីប្រទេសបារ៉ែន ក្នុងខែតុលា ឆ្នាំ២០២៥ មករៀបចំនៅព្រះរាជាណាចក្រកម្ពុជា សម្រាប់ឆ្នាំ២០២៩។

នៅក្នុងកិច្ចប្រជុំចុងសប្តាហ៍នេះ នៅមជ្ឈមណ្ឌលជាតិហ្វឹកហ្វឺនកីឡា រាជធានីភ្នំពេញ ឯកឧត្តម វ៉ាត់ ចំរើន រដ្ឋលេខាធិការ ក្រសួងអប់រំ យុវជន និងកីឡាថ្លែងថា ការជួបជជែកពិភាក្សាគ្នារវាងក្រសួងអប់រំ និងក្រសួងវប្បធម៌ ពេលនេះ គឺបានផ្តោតលើ២ចំណុចសំខាន់ៗ ទី១-ពាក់ព័ន្ធនឹងខ្លឹមសារ និងទស្សនទាន ដែលជាសារត្រូវបង្ហាញតាមរយៈទស្សនីយភាព ដែលត្រូវសម្ដែងអបអរសាទរពិធីទទួលទង់កីឡាយុវជនអាស៊ី ក៏ដូចជាការស្វាគមន៍ប្រតិភូបណ្ដាប្រទេសក្នុងទ្វីបអាស៊ី មកកាន់ប្រទេសកម្ពុជា ដែលជាម្ចាស់ផ្ទះបន្ដវេនពីប្រទេសបារ៉ែន ឆ្នាំ២០២៥ មកឆ្នាំ២០២៩ និងទី២ គឺការបែងចែកតួនាទីភារកិច្ចទទួលខុសត្រូវ រវាងក្រសួងអប់រំ និងក្រសួងវប្បធម៌។

ឯកឧត្តមរដ្ឋលេខាធិការបានលើកឡើងថា ទស្សនីយភាព និងខ្លឹមសារសំខាន់ៗ ដែលត្រូវត្រៀមរៀបចំ ទី១-ការបង្ហាញនូវវប្បធម៌ជាតិរបស់យើង, ទី២-ការបង្ហាញនូវទេសចរណ៍ ដែលជាលក្ខណៈពិសេសនៃទេសចរណ៍ឯករបស់ប្រទេសយើង និងទី៣-ពាក់ព័ន្ធនឹងកីឡា ហើយកីឡានេះ ទាក់ទងនឹងកីឡាយុវជន វ័យក្រោម ១៨ឆ្នាំ។ នេះគឺជាខ្លឹមសាររួម ដែលត្រូវផ្ដោតការយកចិត្តទុកដាក់ និងត្រៀមរៀបចំនូវការសម្ដែងរយៈពេល ១០នាទីក្នុងព្រឹត្តិការណ៍ដ៏សំខាន់នេះ។ ជាមួយគ្នាក្រសួងអប់រំ ក៏ត្រៀមធ្វើការស្នើសុំគោលការណ៍ទៅប្រមុខរាជរដ្ឋាភិបាលកម្ពុជា ដើម្បីត្រៀមរៀបចំពិធីដង្ហែទង់កីឡាយុវជនអាស៊ី បន្ទាប់ពីប្រតិភូនាំទង់កីឡាយុវជនអាស៊ី លើកទី៤ ឆ្នាំ២០២៩ ត្រឡប់មកដល់ប្រទេសកម្ពុជា ពោលគឺក្រោយពិធីប្រគល់ និងទទួលទង់នៅថ្ងៃទី៣១ ខែតុលា ឆ្នាំ២០២៥ឱ្យបានអធិកអធម នៅរាជធានីភ្នំពេញ ដូចកាលពីពិធីដង្ហែទង់ស៊ីហ្គេម ឆ្នាំ២០២៣ ដើម្បីផ្សព្វផ្សាយឱ្យបានកាន់តែទូលំទូលាយអំពីការត្រៀមលក្ខណៈរួចរាល់ធ្វើម្ចាស់ផ្ទះព្រឹត្តិការណ៍កីឡាយុវជនអាស៊ី ដែលត្រូវបានរៀបចំរៀងរាល់៤ឆ្នាំម្ដងនេះផងដែរ។

សម្រាប់ការជជែកពិភាក្សាគ្នា ភាគីក្រសួងអប់រំ យុវជន និងកីឡា មានឯកឧត្តម វ៉ាត់ ចំរើន រដ្ឋលេខាធិការក្រសួងអប់រំ យុវជន និងកីឡា និងជាអគ្គលេខាធិការគណៈកម្មាធិការជាតិអូឡាំពិកកម្ពុជា ខណៈភាគីក្រសួងវប្បធម៌និងវិចិត្រសិល្បៈ លោកជំទាវ ឡងឌី សាន់ណារ៉ា រដ្ឋលេខាធិការ ក្រសួងវប្បធម៌ និងវិចិត្រសិល្បៈ។

គួរបញ្ជាក់ថា ការប្រកួតកីឡាយុវជនអាស៊ី លើកទី៣ នៅបារ៉ែន នឹងប្រព្រឹត្តទៅពីថ្ងៃទី២២-៣១ ខែតុលា ឆ្នាំ២០២៥ ដោយកម្ពុជានឹងបញ្ជូនអត្តពលិកចំនួន ១៧ប្រភេទកីឡាចូលរួមប្រកួតប្រជែងមេដាយ ដែលមានដូចជាប្រភេទកីឡាអត្តពលកម្ម ហែលទឹក វាយសី បាល់បោះ យូដូ ជឺជីតស៊ូ គុនចម្រុះ ទោចក្រយាន វាយកូនឃ្លីលើតុ តេក្វាន់ដូ WT ទ្រីយ៉ាត្លុង ចំបាប់ លើកទម្ងន់ បាល់ទះ បាល់ទាត់លើតុ ប្រដាល់ និងកីឡាប្រដាល់សកល៕

ដោយ ហេង ណាលីន