AKP ព្រះសីហនុ ថ្ងៃទី២៤ ខែមេសា ឆ្នាំ២០២៥--លោក សុខ ភា អភិបាលរងនៃគណៈអភិបាលខេត្តព្រះសីហនុ បានទទួលជំនួបសម្តែងការគួរសម និងពិភាក្សាការងារជាមួយគណៈប្រតិភូខេត្តស៊ីឈួននៃសាធារណរដ្ឋប្រជាមានិតចិន ដឹកនាំដោយលោក He Yanzheng អនុប្រធានគណៈកម្មាធិការអចិន្ត្រៃយ៍សភាប្រជាជនខេត្តស៊ីឈួន នៅសណ្ឋាគារឆ្នេរសុខា ក្រុងព្រះសីហនុ នារសៀលថ្ងៃទី២៣ ខែមេសា ឆ្នាំ២០២៥។

លោកអភិបាលរងខេត្តបានទទួលស្វាគមន៍ប្រតិភូខេត្តស៊ីឈួនដែលមកកាន់ខេត្តព្រះសីហនុ ព្រមទាំងបានជំរាបជូនពីសក្តានុពលភូមិសាស្ត្រ និងវិទ្យាសាស្រ្តរបស់ខេត្តព្រះសីហនុ ស្តិតនៅប៉ែកនីរតីនៃប្រទេសកម្ពុជា ជាខេត្តមានសក្តានុពលសម្បូរបែបនៃប្រទេសកម្ពុជា ខេត្តព្រះសីហនុ ចែកចេញជា ៣ក្រុង ៣ស្រុក ស្មើនឹង ១៨ឃុំ និង ១១សង្កាត់ ស្មើនឹង ១១១ភូមិ ។ ខេត្តមានកោះធំ-តូច ៣២ និងឆ្នេរសមុទ្រប្រវែង ១៧៥គីឡូម៉ែត្រ មានប្រជាជនប្រមាណ ៣១ម៉ឺននាក់។ ហើយវិស័យដែលមានសក្តានុពលក្នុងការរួមចំណែកការអភិវឌ្ឍសេដ្ឋកិច្ចជាតិរួមមាន វិស័យសំណង់ អចលន ទ្រព្យ ឧស្សាហកម្ម ពាណិជ្ជកម្ម ទេសចរណ៍ កសិឧស្សាហកម្ម និងមានកំពង់ផែសមុទ្រទឹកជ្រៅជាងគេក្នុងប្រទេសកម្ពុជា។ ក្នុងឆ្នាំ២០២៤ ខេត្តព្រះសីហនុទទួលបានផលិតផលសរុបចំនួន ១.៦១៦,៧ លានដុល្លារអាមេរិក ចំណូលជា មធ្យមសម្រាប់មនុស្សម្នាក់ៗ (GDP per capita) ចំនួន ៤.៦០២ដុល្លារអាមេរិក អត្រាកំណើនសេដ្ឋកិច្ច ៦ភាគរយ កាត់បន្ថយអត្រាភាពក្រីក្រធ្លាក់ចុះមកនៅត្រឹម ១,២២%។ លើសពីនេះ រាជរដ្ឋាភិបាលកម្ពុជា បានជ្រើសរើសខេត្តព្រះសីហនុជា "តំបន់សេដ្ឋកិច្ចពិសេសគំរូពហុបំណង” សំដៅប្រែក្លាយខេត្តព្រះសីហនុ ជាច្រកចេញចូលអន្តរជាតិ មជ្ឈមណ្ឌលភស្តុភារកម្មជាតិ ដោយមានទំនាក់ទំនងជាមួយទីផ្សារអាស៊ាន និងសកលលោក និងជាមជ្ឈមណ្ឌលឧស្សាហកម្ម ផលិតកម្មបែបបច្ចេកវិទ្យាទំនើបដែលមានសុខដុមនីយកម្មជាមួយនឹងការការពារ និងថែ រក្សាបរិស្ថាន។ ក្រៅពីនេះខេត្តព្រះសីហនុ មានតំបន់សេដ្ឋកិច្ចពិសេស អាកាសយានដ្ឋានអន្តរជាតិ ផ្លូវល្បឿនលឿន ផ្លូវជាតិ ផ្លូវដែក ជាពិសេសកំពង់ផែសមុទ្រទឹកជ្រៅ ហើយ កាលពីថ្ងៃទី២១ ខែធ្នូ ឆ្នាំ២០២៤ កំពង់ផែស្វយ័តក្រុងព្រះសីហនុ សម្រេចបានបរិមាណកុងតឺន័រឆ្លងកាត់ចំនួន ១លានTEUs។ ទាំងនេះសុទ្ធតែជាការចូលរួមចំណែកដល់ការអភិវឌ្ឍខេត្តព្រះសីហនុ ដើម្បីអាចក្លាយជាក្បាលម៉ាស៊ីនស្នូលថ្មីមួយសម្រាប់ជំរុញកំណើនសេដ្ឋកិច្ច និងការអភិវឌ្ឍជាតិ។

លោកអភិបាលរងខេត្តបានបញ្ជាក់ថា ថ្មីៗនេះ ឯកឧត្តម ស៊ី ជីនពីង ប្រធានាធិបតីចិន បានមកធ្វើទស្សនកិច្ចនៅព្រះរាជាណាចក្រកម្ពុជា ព្រមទាំងបានចុះកិច្ចព្រមព្រៀងយោគយល់គ្នាលើឯកសារមួយចំនួន និងបានគាំទ្រតំបន់សេដ្ឋកិច្ចពិសេសក្រុងព្រះសីហនុ ក្នុងការជំរុញការវិនិយោគបន្ថែមទៀតនាពេលខាងមុខ។

លោក He Yanzheng អនុប្រធានគណៈកម្មាធិការអចិន្ត្រៃយ៍សភាប្រជាជនខេត្តស៊ីឈួន បានមានប្រសាសន៍ថា ឯកឧត្តម ស៊ី ជីនពីង ប្រធានាធិបតីចិន បានអញ្ជើញមកធ្វើទស្សនកិច្ចនៅព្រះរាជាណាចក្រកម្ពុជា និងបានចុះកិច្ចព្រមព្រៀងលើឯកសារមួយចំនួន ម្យ៉ាងទៀតគណៈប្រតិភូរបស់លោកមកកាន់កម្ពុជា ជាពិសេសខេត្តព្រះ សីហនុ គឺដើម្បីសិក្សាទាក់ទងទៅនឹងឯកសារមួយចំនួនដែលប្រធានាធិបតីចិនបានចុះកិច្ចព្រមព្រៀងកាលពីពេលថ្មីៗនេះផងដែរ ដោយសារប្រទេសចិន និងកម្ពុជាមានទំនាក់ទំនង និងកិច្ចសហប្រតិបត្តិការល្អជាមួយគ្នា។ ខេត្តស៊ីឈួន ជាខេត្តមួយដែលមានសេដ្ឋកិច្ចលូតលាស់មួយក្នុងចំណោមខេត្តនានាក្នុងប្រទេសចិនមានដូចជា ផ្នែកអេឡិចត្រូនិក គ្រឿងចក្រ ចំណីអាហារ ថាមពល គីមី និងឱសថជាដើម។ ខេត្តស៊ីឈួន ក៏ជាខេត្តមួយដែលមានយុវវ័យចូលចិត្តទៅលេងកម្សាន្ត ព្រោះនៅទីនោះមានទេសភាពស្រស់បំព្រង វប្បធម៌ និងរមណីយដ្ឋានល្អស្អាតជាច្រើនផ្សេងទៀត។

លោក He Yanzheng បានបញ្ជាក់ថា ខេត្តស៊ីឈួន និងទីក្រុងចំនួន៥ បានចងសម្ព័ន្ធមេត្រីភាពជាមួយព្រះរាជាណាចក្រកម្ពុជា។ ទន្ទឹមនោះមានសហគ្រិនរបស់ខេត្តស៊ីឈួន បានមកចូលរួមសាងសង់ផ្លូវល្បឿនលៀននៅកម្ពុជា ព្រលានយន្តហោះខេត្តសៀមរាប ហើយក៏មានសហគ្រិនខេត្តស៊ីឈួន បានមកធ្វើការវិនិយោគនៅក្នុងតំបន់សេដ្ឋកិច្ចពិសេសក្រុងព្រះសីហនុ ហើយនេះជាទស្សនកិច្ចលើកទីមួយសម្រាប់រូបលោកដែលទទួលបាននូវអនុស្សាវរីយ៍ល្អៗពីកម្ពុជា។  លោកយល់ឃើញថា ខេត្តស៊ីឈួននឹងផ្តល់ឱ្យគ្នាទៅវិញទៅមកលើផ្នែកសេដ្ឋកិច្ច ថាមពល អប់រំ និងសុខាភិបាល ទន្ទឹមនោះឆ្នាំ២០២៥ ក៏ជាឆ្នាំនៃការផ្លាស់ប្តូរប្រជាពលរដ្ឋ និងវប្បធម៌រវាងប្រទេសទាំងពីរ។

ក្នុងឱកាសនោះ លោក He Yanzheng ក៏បានអញ្ជើញគណៈប្រតិភូខេត្តព្រះសីហនុ ទៅបំពេញទស្សនកិច្ចនៅខេត្តស៊ីឈួននាពេលខាងមុខ៕

ដោយ ងូ សុមុនី