AKP កំពង់ធំ ថ្ងៃទី១២ ខែមេសា ឆ្នាំ២០២៥-- ដើម្បីអបអរសាទរពិធីបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស.២៥៦៩ដែលនឹងឈានចូលមកដល់នាពេលដ៏ខ្លីខាងមុខនេះ កាលពីព្រឹកថ្ងៃទី១១ ខែមេសា ឆ្នាំ២០២៥ រដ្ឋបាលខេត្តកំពង់ធំបានរៀបចំសម្អាតអនាម័យ បរិស្ថាននៅសួនស្ទឹងសែន និងតាមបណ្ដាទីតាំងមួយចំនួនទៀតក្នុងក្រុងស្ទឹងសែន ដោយមានការអញ្ជើញចូលរួមពីថ្នាក់ដឹកនាំមន្ទីរអង្គភាពជុំវិញខេត្ត កងកម្លាំងទាំងបីសិស្សនិស្សិតនិងបងប្អូនប្រជាពលរដ្ឋជាច្រើននាក់។

 
លោក ញ៉ឹក បានខេង អភិបាលរងខេត្តកំពង់ធំ បានមានប្រសាសន៍ថា ឆ្នាំនេះរដ្ឋបាលខេត្តនឹងរៀបចំសង្ក្រាន្តកំពង់ធំដោយមានការតុបតែងលម្អតាមបណ្តាសួនច្បារសំខាន់ៗ ផ្លូវ ស្ពានក្នុងក្រុងស្ទឹងសែនឱ្យមានភាពស្រស់ស្អាតគួរជាទីមនោរម្យ ជូនបងប្អូនប្រជាពលរដ្ឋ និងភ្ញៀវទេសចរជាតិ-អន្តរជាតិចូលកម្សាន្តសប្បាយនាឱកាសបុណ្យចូលឆ្នាំខ្មែរប្រពៃណីជាតិ។ ម្យ៉ាងវិញទៀតដើម្បីចូលរួមចំណែកក្នុងការលើកសោភ័ណភាព អនាម័យ បរិស្ថានក្នុងក្រុងស្ទឹងសែនឱ្យកាន់តែមានភាពស្រស់បំព្រង ដើម្បីលើកកម្ពស់សោភ័ណភាពក្រុង និងទាក់ទាញអ្នកទេសចរជាតិ អន្តរជាតិ ចូលមកទស្សនាកម្សាន្តក្រុងមួយនេះ ឱ្យកាន់តែច្រើនឡើង។

លោកអភិបាលរងខេត្តបានមានប្រសាសន៍ថា ក្នុងយុទ្ធនាការសម្អាតអនាម័យបរិស្ថាននៅពេលនេះពិតជាមានសារៈសំខាន់ណាស់ដែលធ្វើឱ្យក្រុងស្ទឹងសែនរបស់យើង ក្លាយជាទីក្រុងគ្របដណ្តប់ដោយបរិស្ថានស្អាត មានបរិយាកាសល្អ ផ្កាចម្រុះពណ៌និងបង្កើនការយល់ដឹង អំពីអនាម័យបរិស្ថានដល់សាធារណជនក្នុងគោលបំណងបង្កើនបរិស្ថានស្អាត ក្នុងការរស់នៅរបស់ប្រជាពលរដ្ឋ ប្រកបដោយអនាម័យល្អដែលនាំមកនូវសុខភាពល្អ។ 

ដើម្បីឱ្យយុទ្ធនាការសម្អាតអនាម័យបរិស្ថានឱ្យកាន់តែមានប្រសិទ្ធភាព និងប្រសិទ្ធផល សូមបងប្អូនប្រជាពលរដ្ឋចូលរួមសម្អាតអនាម័យបរិស្ថានតាមទីលំនៅដ្ឋានរៀងៗខ្លួន និងទីសាធារណៈដោយទុកដាក់សំរាមក្នុងធុងសម្រាមឱ្យបានត្រឹមត្រូវ ប្រកបដោយផាសុខភាព “បរិស្ថានស្អាត ផ្តើមចេញពីយើងទាំងអស់គ្នា”៕

ដោយ ស៊ុម វណ្ណា