AKP កំពង់ស្ពឺ ថ្ងៃទី១១ ខែមេសា ឆ្នាំ២០២៥-- រដ្ឋបាលខេត្តកំពង់ស្ពឺបានប្រារព្វពិធីសូត្រមន្តចម្រើនព្រះបរិត្ត ប្រសិទ្ធិពរជ័យ សិរីមង្គល ជាកិច្ចជូនដំណើរឆ្នាំចាស់ និងទទួលអំណរសាទរឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស.២៥៦៩ ក្នុងស្មារតីមហាគ្រួសារ នៅបរិវេណសាលាខេត្តនាថ្ងៃទី១០ ខែមេសា ឆ្នាំ២០២៥ ក្រោមអធិបតីភាពឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្ត មបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងលោកជំទាវ និងមានការចូលរួមពីឯកឧត្តម លោកជំទាវជាថ្នាក់ដឹកនាំ ព្រមជាមួយមន្ត្រីរាជការ មន្ទីរ អង្គភាពជុំវិញខេត្តផងដែរ។

ពិធីសូត្រមន្តចម្រើនព្រះបរិត្តបានប្រារព្ធទៅតាមគន្លងប្រពៃណី ព្រះពុទ្ធសាសនាដ៏ផូរផង់ដោយមានការបូជាទៀនធូប ផ្កាភ្ញីគ្រឿងសក្ការៈនានាថ្វាយព្រះរតនត្រៃ និងបាននិមន្តព្រះសង្ឃដើម្បីចម្រើនព្រះបរិត្ត ស្វាធ្យាយ ជយន្តោ ពុទ្ធជ័យមង្គល និងបានរៀបចំឱ្យមានការសម្តែងរបាំត្រុដិ ដើម្បីបណ្តេញនូវឧបទ្រពចង្រៃក្នុងឆ្នាំចាស់ ដើម្បីទទួលអំណរសាទរ និងសេចក្តីសុខ ចម្រើនសិរីឆ្នាំថ្មីផងដែរ។

ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្ត បានលើកឡើងថា ពិធីបុណ្យចូលឆ្នាំ ជាប្រពៃណីជាតិខ្មែរ ឆ្លងឆ្នាំចាស់ ផ្លាស់ចូលឆ្នាំថ្មី និងបួងសួងសូមឱ្យទេវតាឆ្នាំថ្មីប្រោះព្រំ ជូនដល់ថ្នាក់ដឹកនាំព្រះរាជាណាចក្រកម្ពុជា ដឹកនាំនាវាកម្ពុជាឆ្ពោះទៅរកសុខសន្តិភាព និងការអភិវឌ្ឍលើគ្រប់វិស័យ។ សូមទេវតាឆ្នាំថ្មីជួយប្រោះព្រំ សេចក្តីសុខចម្រើន ដល់ថ្នាក់ដឹកនាំគ្រប់ជាន់ថ្នាក់ និងប្រជាពលរដ្ឋក្នុងខេត្ត តរៀងទៅ និងសូមជៀសឱ្យផុតគ្រោះចង្រៃផ្សេងៗដូចជា គ្រោះរាំងស្ងួត ទឹកជំនន់ ខ្យល់ព្យុះរន្ទះផ្គរ ចាប់ពីពេលនេះតទៅ កុំឱ្យកើតមានឡើង មកលើប្រជាជនខេត្តកំពង់ស្ពឺ និងពលរដ្ឋខ្មែរគ្រប់រូប ចាប់ពីពេលនេះតទៅ៕ 

ដោយ លឹម សាន្ត