AKP កំពង់ស្ពឺ ថ្ងៃទី០៨ ខែមេសា ឆ្នាំ២០២៥-- រដ្ឋបាលខេត្តកំពង់ស្ពឺបានរៀបចំពិធីក្រុងពលីបួងសួងសុំសេចក្តីសុខសេចក្តីចម្រើនក្នុងការរៀបចំព្រឹតិ្តការណ៍ កំពង់ស្ពឺសង្រ្កាន្ត ឆ្នាំ២០២៥ ក្រោមអធិបតីភាពឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាលនៃគណៈអភិបាលខេត្តកំពង់ស្ពឺ និងលោកជំទាវ ព្រមទាំងមានការអញ្ជើញចូលរួមពីឯកឧត្តម លោកជំទាវ សមាជិកក្រុមប្រឹក្សាខេត្ត ឯកឧត្តម លោកជំទាវ អភិបាលរងនៃគណៈអភិបាលរងខេត្ត លោកអភិបាលក្រុង ស្រុក និងសមាជិកសមាជិកា ស.ស.យ.ក ខេត្ត តំណាងមន្ទីរអង្គភាពជុំវិញខេត្តជាច្រើនរូបទៀត ដែលប្រារព្ធធ្វើនៅអគាររដ្ឋបាលសាលាខេត្ត។

ឯកឧត្តមបណ្ឌិត ជាម ច័ន្ទសោភ័ណ បានលើកឡើងថា ពិធីក្រុងពលី សូត្រមន្តចម្រើនព្រះបរិត្ត នាថ្ងៃនេះគឺគោលបំណងដើម្បីប្រសិទ្ធិពរជ័យ សិរីមង្គល អបអរសាទរឆ្នាំថ្មីប្រពៃណីជាតិខ្មែរ ជាពិសេស បានបូងសួងដល់ទេវតាឆ្នាំថ្មី ដែលនឹងមកគ្រប់គ្រងភពផែនដីបន្តពីទេវតាឆ្នាំចាស់ សូមប្រោះព្រំសព្វសាធុការពរជ័យ សិរីមង្គលបវរមហាប្រសើរ ជូនដល់ថ្នាក់ដឹកនាំ មន្ត្រីរាជការ និងបុគ្គលិកទាំងអស់របស់រដ្ឋបាលខេត្ត ក៏ដូចជាប្រជាពលរដ្ឋខ្មែរគ្រប់ៗរូប ឱ្យទទួលបានសុខភាពល្អ សេចក្តីសុខចម្រើនរុងរឿង មានសុភមង្គលគ្រុមគ្រួសារ ព្រមទាំងទទួលបានជោគជ័យ រាល់ការបំពេញភារកិច្ចនានាក្នុងឆ្នាំថ្មី និងជានិច្ចនិរន្តរ៍តរៀងទៅ។

សូមបញ្ជាក់ផងដែរថា កំពង់ស្ពឺសង្ក្រាន្តនឹងប្រារព្ធធ្វើឡើងចាប់ពីថ្ងៃទី១៤-១៦ ខែមេសា ឆ្នាំ២០២៥ នៅបរិវេណវិមានឯករាជ្យខេត្តកំពង់ស្ពឺ ដែលការលេងល្បែងប្រជាប្រិយ ការប្រឡងចម្រៀង ការប្រគំតន្ត្រីខ្នាតយក្ស ពិធីស្រង់ព្រះ ពិធីទទួលទេវតាឆ្នាំថ្មី និងការបាញ់កាំជ្រួចផងដែរ៕

ដោយ លឹម សាន្ត