AKPបន្ទាយមានជ័យថ្ងៃទី៨ខែមេសាឆ្នាំ២០២៥--ក្រុមសម្ដែងរបាំត្រុដិដ៏ល្បីល្បាញមួយក្រុម បានធ្វើឱ្យបរិវេណមុខមន្ទីរព័ត៌មានខេត្តបន្ទាយមានជ័យ ក្លាយទៅជាទីចាប់អារម្មណ៍យ៉ាងខ្លាំង ជាមួយនឹងការបង្ហាញនូវក្បាច់រាំដ៏រស់រវើក និងអត្ថន័យដ៏ជ្រាលជ្រៅនៃរបាំបុរាណខ្មែរមួយនេះ។

ការសម្ដែងនេះបានធ្វើឡើងកាលពីថ្ងៃទី០៧ ខែមេសា ឆ្នាំ២០២៥ក្នុងឱកាសដ៏ជិតនៃបុណ្យចូលឆ្នាំថ្មីប្រពៃណីជាតិខ្មែរ ឆ្នាំម្សាញ់ សប្តស័ក ព.ស ២៥៦៩ គ.ស ២០២៥ ដែលនឹងឈានចូលមកដល់ក្នុងពេលឆាប់ៗខាងមុខ។

វត្តមាននៃការសម្ដែងរបាំត្រុដិនេះ មិនត្រឹមតែជាការកម្សាន្តសប្បាយសម្រាប់អ្នកទស្សនាប៉ុណ្ណោះទេ ប៉ុន្តែវាក៏ជាការរំលឹក និងលើកកម្ពស់នូវតម្លៃវប្បធម៌ដ៏ឧត្តុង្គឧត្តមរបស់ជាតិខ្មែរផងដែរ។ របាំត្រុដិត្រូវបានគេចាត់ទុកថាជាផ្នែកមួយដ៏សំខាន់នៃទំនៀមទម្លាប់ និងជំនឿរបស់អ្នកស្រុកខ្មែរតាំងពីបុរាណកាលមក គេជឿថា របាំនេះមានថាមពលក្នុងការបណ្ដេញនូវឧបទ្រពចង្រៃ និងនាំមកនូវសិរីសួស្ដី ព្រមទាំងសេចក្ដីសុខចម្រើនសម្រាប់ឆ្នាំថ្មី។

លោក សេក សុខុម ប្រធានមន្ទីរព័ត៌មានខេត្តបន្ទាយមានជ័យ បានបង្ហាញនូវចំណាប់អារម្មណ៍យ៉ាងជ្រាលជ្រៅចំពោះការសម្ដែងរបាំត្រុដិនេះ។ លោកបានថ្លែងថា "ខ្ញុំពិតជាមានកិត្តិយសណាស់ដែលបានឃើញផ្ទាល់ភ្នែកនូវការសម្ដែងរបាំត្រុដិដ៏ល្អឥតខ្ចោះបែបនេះនៅមុខមន្ទីររបស់យើង។ នេះមិនត្រឹមតែជាការបង្ហាញនូវទេពកោសល្យដ៏ប៉ិនប្រសប់របស់ក្រុមសិល្បករប៉ុណ្ណោះទេ ប៉ុន្តែវាក៏ជាការរំលឹកដល់សារៈសំខាន់នៃវប្បធម៌ជាតិរបស់យើង ជាពិសេសនៅមុនពេលចូលឆ្នាំថ្មី។ របាំត្រុដិមានអត្ថន័យដ៏ពិសិដ្ឋក្នុងការបន្សាបនូវភាពមិនល្អ និងនាំមកនូវក្តីសង្ឃឹមសម្រាប់ឆ្នាំថ្មី។ ខ្ញុំគិតថា ការបង្ហាញនេះនឹងជួយឱ្យបងប្អូនប្រជាពលរដ្ឋកាន់តែយល់ដឹង និងស្រឡាញ់នូវសិល្បៈបុរាណរបស់ខ្មែរយើងថែមទៀត"។

ស្របពេលជាមួយគ្នានោះដែរ លោក យ៉ង់តាំង កួយ ប្រធានមន្ទីរវប្បធម៌និងវិចិត្រសិល្បៈខេត្តបន្ទាយមានជ័យ ក៏បានបង្ហាញនូវការកោតសរសើរយ៉ាងខ្លាំងចំពោះការខិតខំប្រឹងប្រែងរបស់ក្រុមសម្ដែង និងសារៈសំខាន់នៃរបាំត្រុដិចំពោះប្រពៃណីជាតិ។ 

លោកបានមានប្រសាសន៍ថា៖ "របាំត្រុដិគឺជាកេរដំណែលវប្បធម៌ដ៏មានតម្លៃមិនអាចកាត់ថ្លៃបានរបស់ខ្មែរយើង។ វាឆ្លុះបញ្ចាំងពីជំនឿ សាសនា និងរបៀបរបបនៃការរស់នៅរបស់ដូនតាខ្មែរតាំងពីយូរលង់ណាស់មកហើយ។ ការសម្ដែងនៅថ្ងៃនេះគឺជាការបង្ហាញឱ្យឃើញពីការបន្តថែរក្សា និងលើកស្ទួយនូវសិល្បៈដ៏វិសេសវិសាលនេះឱ្យបានគង់វង្សទៅមុខ។ ខ្ញុំសូមកោតសរសើរដល់ក្រុមសម្ដែងទាំងអស់ដែលបានលះបង់កម្លាំងកាយចិត្តក្នុងការហ្វឹកហាត់ និងបង្ហាញនូវការសម្ដែងដ៏ល្អនេះ។ ខ្ញុំក៏សង្ឃឹមថា ព្រឹត្តិការណ៍បែបនេះនឹងមានការរៀបចំកាន់តែច្រើនឡើងថែមទៀត ដើម្បីឱ្យប្រជាជន ជាពិសេសយុវជនជំនាន់ក្រោយបានស្គាល់ និងឱ្យតម្លៃទៅលើសិល្បៈវប្បធម៌ជាតិរបស់ខ្លួន"។

ការបង្ហាញរបាំត្រុដិនៅមុខមន្ទីរព័ត៌មានខេត្តបន្ទាយមានជ័យនាពេលនេះ គឺជាសញ្ញាដ៏ល្អមួយដែលបង្ហាញពីការយកចិត្តទុកដាក់ និងការលើកកម្ពស់នូវតម្លៃវប្បធម៌ជាតិរបស់អាជ្ញាធរខេត្ត ក៏ដូចជាការចូលរួមអបអរសាទរនូវបុណ្យចូលឆ្នាំថ្មីប្រពៃណីជាតិខ្មែរដែលចូលមកដល់នៅពាក់កណ្តាលខែមេសាឆ្នាំ២០២៥នេះ។ការបង្ហាញវត្តមាននៃរបាំត្រុដិនេះ បានបន្សល់ទុកនូវភាពសប្បាយរីករាយ និងក្តីសង្ឃឹមសម្រាប់ឆ្នាំថ្មី ព្រមទាំងជាការដាស់តឿនដល់ប្រជាជនខ្មែរគ្រប់រូបឱ្យបន្តថែរក្សា និងការពារនូវកេរដំណែលវប្បធម៌ដ៏រុងរឿងរបស់ខ្លួនឱ្យបានស្ថិតស្ថេរជានិរន្តរ៍៕

ដោយ៖ ឈុនសារ៉ាត